1 Kɛ̀ ti Yiɛ̀ nKuyie nní nsɔkɛ́ ku nɑ́ɑǹtì kɛ́nɑ́kɛ́ Mɔyiisi kɛ dɔ̀: Nɑ́kɛ́ ikuɔ́ nìùbɛ̀ Anɔɔ bí kɛ dɔ̀:

Ikuɔ́ nìùtì mɔù bɑ́ɑ́ tɔ́ɔ́nnɛ̀ o cĩ́ɛ̃̀tɛ̀ kóo cíì mɔù kɛ́sĩnkùnnɛ omɑ́ɑ̀. 2 Kɛ̀ dɛ̀ sɑ̀ɑ̀ í tú o cĩ́ɛ̃̀tɛ̀ kou mɔ́mmuɔ nwe. O cicɛ yoo o yɔ̃ yoo o birɛ yoo o nɑntɛ̀ yoo o kóo kótì. 3 Nɛ̀ o tɑ̃ũ̀ wèè kpɑɑ́ tɛcĩ́ɛ̃̀tɛ̀ kɛ mu nyí yĩ̀ɛ̃́tɛ́ onitidɔ̀ù kɛ yɛ̃́ ò mu nyí yenkɛmɛ̀, ò bo nɑ kóò kɑ̀ɑ́kɛ́. 4 Wenwe wèè ni bɛnìtìbɛ̀, ò bɑ́ɑ́ dɔɔ̀ dɛ̀ɛ̀ ci o cĩ́ɛ̃̀tɛ̀ miɛkɛ kɛ́sĩ̀nkùnnɛ omɑ́ɑ̀.

5 Ikuɔ́ nìùbɛ̀ níí bɑ́ɑ́ fentɛ́ fentɛ́ tiyùtì bɛ yɔ ĩ́nkɛ̀, yoo bɛ̀ɛ kuó bɛ nucìtì kɛ́soó mbɛ dɛbìi, bɛ̀ mɛ mbɑ́ɑ́ dúɔ́kɛ́ bɛmɑ́ɑ̀. 6 Bɛ̀ cɑ̃̀ɑ̃́mmu kɛ bo n kó mutɔ̃mmú kpɛ́í. Bɛ̀ bɑ́ɑ́ cɑkɛ n yètìrì, bɛɛ̀ n feu iwũɔ̃ bɛ̀ m pɑ̃ɑ̃ nyì. Nɛ̀ dɛ kpɛ́í mbɛ̀ dò nkɛ́ndò mpɑ́íí nwe.

7 Dɛ̀ cimu ikuɔ́ nìùtì bo puokɛmɛ̀ onitipòkù wèè dɔuti dɔutinɛ̀ bɛnitidɑɑbɛ̀ yoo osɑpɑ̀ɑ̀ mbɛ̀ cɑ̀kɛ wè, yoo onitipòkù wèè yenkɛ kɛ yentɛ́, ikuɔ́ nìùtì cɑ̃̀ɑ̃́mmu kɛ tú n kóo nìtì. 8 Di dò nkɛ́nwúó nyikuɔ́ nìùbɛ̀ bɛnìtìbɛ̀ n tɑ̃ɑ̃tɛ́ bɛ̀mbɛ n tɔ̃mmú kpɛ́í bɛ̀ cɑ̃̀ɑ̃́mmu, kɛ yɛ̃́ bɛɛ̀ n feumɛ̀ iwũɔ̃ di m pɑ̃ɑ̃ nyì. Dí mbɛ̀ wùó mbɛnìtìbɛ̀ bɛ̀ɛ̀ cɑ̃̀ɑ̃́ nkɛ dò mpɑ́íí. Mí ndi Yiɛ̀ nKuyie mmíì bɛ̀ cɑ̃̀ńnɛ́.

9 Kɛ̀ ikuɔ́ nìùtì mɔù kóo sɑpɑ̀ɑ̀ ncɑ̀kɛ omɑ́ɑ̀ kɛ dɔuti dɔutinɛ̀ bɛnitidɑɑbɛ̀ ò ɑ̃nnɛ́ o cicɛ nwe ifɛi, bɛ̀ɛ cɔ́u ndɛ kóo sɑpɑ̀ɑ̀.

10 Ikuɔ́ nìùtì diɛwè wèè bɑkɛ́ bɛsɔmbɛ, bɛ̀ còú nwèè yuu mɛkùɔ̀ nkoò cɑ̃̀ńnɛ́ kòò dɑɑti ikuɔ́ yɑ̀ɑ̀tì, ò bɑ́ɑ́ yóu kòo yùtìi yɛ̃kɛ́ ò mɛ mbɑ́ɑ́ yóu kòo yɑ̀ɑ̀tìi kɛ̃rí. 11 Ò bɑ́ɑ́ tɔ́ɔ́nnɛ̀ ocíì kɛ́sĩnkùnnɛ omɑ́ɑ̀, bɑ́ kòo cicɛ nwe yoo o yɔ̃. 12 Ò bɑ́ɑ́ yɛ̀ mɛtɑummɛ̀ tou, ò yɑ̀ɑ̀ bo dì sĩ̀nkùnnɛ mɛ̀ɛ̀ kpɛ́í. Bɛ̀ ò còú mmɛkùɔ̀ mmɛ koò cɑ̃̀ńnɛ́ mí nKuyie n kpɛ́í. Míì tu di Yiɛ̀ nKuyie.

13 Wèe puokɛ osɑpɑ̀ɑ̀ nwèè mu nyí yɛ̃́ onitidɔ̀ù. 14 Ò bɑ́ɑ́ puokɛ okúpokù yoo wèè yenkɛ kɛ yentɛ́ yoo wèè dɔuti dɔutinɛ̀ bɛnitidɑɑbɛ̀ kɛ cɑ̀kɛ omɑ́ɑ̀. Ikuɔ́ nìùbɛ̀ botí miɛkɛ nkɛ ò dò nkɛ́tɑ̃ɑ̃tɛ́mɛ̀ osɑpɑ̀ɑ̀ nwèè mu nyí yɛ̃́ onitidɔ̀ù, kɛ́puokɛ. 15 Ò yɑ̀ɑ̀ bo sĩ̀nkùnnɛ o fuku. Mí ndi Yiɛ̀ nKuyie mmíì ò cɑ̃̀ńnɛ́.

16 Kɛ̀ ti Yiɛ̀ nKuyie nyíɛ́ kɛ́nɑ́kɛ́ Mɔyiisi kɛ dɔ̀: 17 Nɑ́kɛ́ Anɔɔ kɛ tú n yɛ̃ nnɛ̀ bɛ̀ bo mbomɛ̀ nɛ̀ bɛ yɑɑ̀bío ikuɔ́ nìùtì wèè mɔ̀kɛ kuyɛ̀nkù ó bɑ́ n féútɛ́ fɛɔ̃̀fɛ̀ yoo ò m pɑ̃ tidiitì. 18 Kòò mɔ̀kɛ kuyɛ̀nkù bɑ́ kùù botí ò bɑ́ɑ́ nɑ kɛ́pĩ́ ndɛ kó mutɔ̃mmú, kòò tu kuyũ̀ɔ̃̀nkù yoo dikpɛ̃nnì yoo dɛ̀mɑrɛ̀ yetɛ́ o ììkɛ̀. 19 Kòo tɑ̀ɑ̀ku kuù mɛ nkèétɛ́ yoo o bɑkù. 20 Kòò tu tɛhùtɛ̀ yiɛ̀, yoo ò dò ndɛcĩ̀ĩ̀rɛ̀ yoo ò ɑ̃ dinɔmpénnì yoo mɛkpɑ̃̀ɑ̃̀, yoo tɛwũɔ̃tɛ̀ mɑtɛ̀ ɑ̃ o kɔ̃̀ntì yoo o tɑkuò mpɔ̀ntɛ. 21 Anɔɔ kó kufuku miɛkɛ ikuɔ́ nìùtì mɔù bɑ́ n féútɛ́ fɛɔ̃̀fɛ̀ yoo ò m pɑ̃ tidiitì kɛ́nsɑ̀ kòò mɔ̀kɛ kuyɛ̀nkù, ò bɑ́ɑ́ nɑ kɛ́pĩ́ nyikuɔ́ nìùtì kó mutɔ̃mmú. 22 Dɛ yiɛ̀ mbo nɑ kɛ́di bɛ̀ m pɑ̃ tìì diitì yoo bɛ̀ m pɑ̃ dɛ̀ kɛ yɛ̃tɛ́ kɛ tuɔ nkɛ sùɔ́. 23 Ò mɛ mbɑ́ɑ́ tɑ mɛtɑummɛ̀ tou kuyɑ̀ɑ̀kù kpetí dɛ̀ yoo wèe tɔ́ɔ́nnɛ̀ diwũɔ̃tɔ̀nnì, ò tu kuyɛ̀nkù yiɛ̀ nwe, ò yɑ̀ɑ̀ bo sĩnkùnnɛ mɛtɑummɛ̀ tou nɛ̀ di nɛntì. N tú di Yiɛ̀ nKuyie nku kɛ míì dɛ̀ cɑ̃̀ńnɛ́.

24 Mɛm̀mɛ, kɛ̀ Mɔyiisii tì nɑ̀kɛ́ Anɔɔ nɛ̀ o bí nɛ̀ Isidɑyɛɛribɛ sɔmbɛ.

<- Ikuɔ́ Nìùbɛ̀ 20Ikuɔ́ Nìùbɛ̀ 22 ->