1 Dɛ mɔ̀nnì kɛ̀ dɛ̀ɛ yonkɛ Sonɑɑsi, kòo miɛkɛɛ pɛikɛ mɛdiɛ̀. 2 Kòo nɑ́kɛ́ Kuyie nkɛ dɔ̀: N Yiɛ̀ nKuyie n do ti nyɛ̃́ m bo dìì mɔ̀nnì nh ɛì, dɛɛ̀ do te kɛ̀ m pɑ̃̀nkɛɛ cokɛ́ kɛ́nkɔri Tɑsisi. N do yɛ̃́mu kɛ dò nhɑ sɑ̀ɑ̀ ndɛu ɑ í ɔɔtí ɑ bo yóumɛ̀ ɑ bo potɛ́mɛ̀ bɛnìtìbɛ̀. 3 N Yiɛ̀ nKuyie nyóu kɛ̀ n kú, m bo kúmɛ̀ tɔ̃ũnɛ̀ m bo nfòùmɛ̀. 4 Kɛ̀ ti Yiɛ̀ nKuyie ndɔ̀: Dɛ̀ wenni ɑ miɛkɛ bo pɛikɛmɑ̀ɑ̀?

5 Dɛ̀ do sɔ̃́ nSonɑɑsi yɛ̀mu dihɛì kɛ kɔ̀tɛ diyiè yìɛ̀ní kɛ̀ɛ̀ bíɛ́kɛ̀ kɛ dɔ̀ɔ̀ difii kɛ díɛ́kɛ́, kɛ bo yɑ̀ tìì yóó tuɔkɛní dihɛì. 6 Kɛ̀ Kuyie nduɔ́ nkɛ̀ mutie mɑmùu yɛ̀nní kɛ́ndònnɛ̀ munɑsińyɑ̀ɑ̀, kóò dɛ̀ɛ́ nkòo yɛ̀mmɛ̀ɛ cɑ́tɛ́, kɛ̀ mu dɛ́ɛ̀ nnɑ́ríkùnnɛ o yɛ̀mmɛ̀. 7 Kukṹnwentóo kɛ̀ Kuyie nduɔ́ nkɛ̀ dibɛù mɑrìi mù cɑ̀ɑ́kɛ́, kɛ̀ mùu kpeí. 8 Diyiè yɛ̀nní dìì mɔ̀nnì, kɛ̀ Kuyie nduɔ́ nkɛ̀ diyiè yìɛ̀ní kɛ̀ɛ̀ bíɛ́kɛ̀ kó kuyɑɑkùu yɛ̀nní kɛ tonnì mɛdiɛ̀ nkɛ́potɛ́ Sonɑɑsi yuu, kòo fiu kɛ́bekɛ mukṹṹ nkɛ dɔ̀: Kɛ̀ n ku dɛ̀ ntɔ̃ũnɛ̀ m bo nfòùmɛ̀. 9 Kɛ̀ Kuyie nnɑ́kɛ́ Sonɑɑsi kɛ dɔ̀: A í nɑɑti ɑ miɛkɛ bo pɛikɛmɛ̀ mutie muu ǹkpɛ́í.

Kòò dɔ̀: N nɑɑtimu, m miɛkɛ pɛikɛmu kɛ̀ n dɔ́ mukṹṹ.

10 Kɛ̀ Kuyie ndɔ̀: A kuɔ́ mmutie mmu mɛsémmɛ̀ ɑ í dɔ̀ɔ̀ mùù kpɛ́í ndɛ̀mɑrɛ̀ ɑ í te kɛ̀ mùù kòtɛ́, mùù yɛ̀nní kɛyènkɛ̀ kɛ kpeío. 11 Kɛ nɛ́ yɛ̃ m bɑ́ɑ́ kuɔ́ mmɛsémmɛ̀ Ninifu dihɛidiɛ̀ bɛnìtìbɛ̀ bo dɛ̀ tɛkɔùpíkɔ̀ùtɛ̀ nɛ̀ sikɔùpísìdɛ́ (120000) kɛ í yɛ̃́ bɛ ììkɛ̀ nɛ̀ bɛ fɔ̃nkó kɛ iwũɔ̃ múnkɛ dɛ bo pɛ́uɑ̀?

<- Sonɑɑsi 3