1 Diyiè mɑrì kɛ̀ Dɑfitii bekɛ kɛ dɔ̀: Òmɔù í kpɑɑ́ fòù Sɑuri nɑɑ̀mùnkù miɛkɛ kɛ̀ nh ò dɔ̀ɔ̀ mɛsɑ̀ɑ̀ nnɛ̀ Sonnɑtɑ̃ɑ̃ kpɛ́ínɑ́ɑ̀?

2 Kɛ sɔ̃́ nSɑuri mɔ̀kɛ otɔ̃ntì mɔù kòo yètìrì tu Sibɑɑ kòo kɔtɛní Dɑfiti borɛ̀ kòo ò bekɛ kɛ dɔ̀: Fɔ̃́ nwe Sibɑɑ? Kòò dɔ̀: Ɛ̃ɛ̃, mínwe ɑ kóo tɔ̃ntì. 3 Kòo kpɑ̀ɑ̀tì Dɑfiti dɔ̀: Sɑuri nɑɑ̀mùnkù miɛkɛ òmɔù í kpɑɑ́ fòù kɛ̀ nh ò dɔ̀ɔ̀ mɛsɑ̀ɑ̀ nKuyie nkpɛ́ínɑ́ɑ̀? Kòo tɔ̃ntì dɔ̀: Sonnɑtɑ̃ɑ̃ birɛ kpɑɑ́mu kɛ tu kuhɔ̀ùkù. 4 Kòo kpɑ̀ɑ̀tì dɔ̀: Ò borɛ? Kòo tɔ̃ntì dɔ̀: Ò bo Doo-Dɑbɑɑ nwe Mɑkiiri Amiyɛɛdi birɛ cĩ́ɛ̃̀tɛ̀.

5 Kɛ̀ Dɑfitii tɔ̃ nhòmɔù kɛ̀ bɛ̀ɛ kɔtɛ Mɑkiiri cĩ́ɛ̃̀tɛ̀ kɛ́tɔní Mɛfibosɛti. 6 Sɑuri kóo dɑpɑ̀ɑ̀ Sonnɑtɑ̃ɑ̃ birɛ, ò tùɔ̀kɛní dìì mɔ̀nnì okpɑ̀ɑ̀tì Dɑfiti borɛ̀ kɛ́nínkú kɛ́sĩ́nnɔ́ɔ o ììkɛ̀ kòo ò bekɛ kɛ dɔ̀: Fɔ̃́ɔ̃̀ tu Mɛfibosɛtɑɑ? Kòò dɔ̀: Ɛ̃ɛ̃, mínwe ɑ kóo tɔ̃ntì. 7 Kòo kpɑ̀ɑ̀tì Dɑfiti dɔ̀: A bɑ́ nyĩɛ̃̀kù n yóó dɑ dɔɔ̀mu mɛsɑ̀ɑ̀ nhɑ cicɛ Sonnɑtɑ̃ɑ̃ kpɛ́í, n yóó dɑ tɛ̃́nnɛ́mu ɑ yɑ̀ɑ̀kù Sɑuri tenkɛ̀ kɛmɔu kɑ̀ɑ nyo m borɛ̀ yɛwe yɛmɔu.

8 Kɛ̀ Mɛfibosɛtii nínkú kɛ́sĩ́nnɔ́ɔ kɛ dɔ̀: Okpɑ̀ɑ̀tì, dɛ̀ dòmmɛ kɑ̀ɑ dɑ̀kɛ n kpɛ́í mmí ndɛmɔcírɛ̀?

9 Kòo kpɑ̀ɑ̀tìi duɔ́ nkɛ̀ bɛ̀ɛ yúní Sibɑɑ Sɑuri kóo tɔ̃ntì kòo ò nɑ̀kɛ́ kɛ dɔ̀: Sɑuri kpɛrɛ dɛmɔu nɛ̀ o cĩ́ɛ̃̀tɛ̀ kɔbɛ kpɛrɛ, n dɛ̀ duɔ́ nho yɑɑ̀birɛ Mɛfibosɛti nwe. 10 Fɔ̃́ nnɛ̀ ɑ bí díì yó nhò kuuti, kɛ tɔuní ò bo nyo mmù. Mɛfibosɛti yó nyo m borɛ̀ ndɛ sɑ̃́ɑ̃̀.

Sibɑɑ do mɔkɛ initidɑbí tɛpíítɛ̀ nɛ̀ ìnùmmù ndi, bɛtɔ̃mbɛ̀ sipísìdɛ́. 11 Kòo nɑ̀kɛ́ okpɑ̀ɑ̀tì Dɑfiti kɛ dɔ̀: N yóó dɔɔ̀mu ɑ n nɑ̀kɛ́ tìì kó dimɑ̀ɑ̀. Mɛm̀mɛ kɛ̀ Mɛfibosɛti nyo nhokpɑ̀ɑ̀tì Dɑfiti borɛ̀ kɛ dònnɛ̀ o bí.

12 Mɛfibosɛti do mɔkɛ dɛdɑpùmbirɛ dɛ̀mɑ́ɑ̀ ndi kɛ̀ dɛ yètìrì tu Mikɑɑ, kɛ̀ Sibɑɑ cĩ́ɛ̃̀tɛ̀ kɔbɛ bɛmɔu tu Mɛfibosɛti kó bɛtɔ̃mbɛ̀. 13 Kɛ̀ Mɛfibosɛti mbo Sedisɑdɛmmu kɛ́nkɔrì kɛ yo nhokpɑ̀ɑ̀tì Dɑfiti borɛ̀. Ò do tú kuhɔ̀ùkù nku.

<- 2 Sammuyɛɛri 82 Sammuyɛɛri 10 ->