1 Kɛ̀ Dɑfiti ntotí o yɛ̀mmɛ̀ kɛ tú bɑ́ nɛ̀ dìì yiè Sɑuri yó n nintɛmu, n yí mɔkɛ m bo yĩ́mɛ kɛ̀ n yí cokɛ́mu kɛ kɔtɛ Fidisitɛ̃ɛ̃bɛ ciɛ koò yentɛ́nɛ̀, kòò n yóu mubɛ̀tìmù Isidɑyɛɛribɛ tenkɛ̀. 2 Mɛm̀mɛ kɛ̀ Dɑfitii ítɛ́ nɛ̀ o kɔbɛ sikɔusìkuɔ̀ (600) kɛ́kɔtɛ Mɑɔki birɛ Akiisi Kɑti kpɑ̀ɑ̀tì borɛ̀. 3 Kɛ bií bɑ́tɛ́ kɛ́mbo Kɑti Akiisi borɛ̀ bɑ́ wè nɛ̀ o cĩ́ɛ̃̀tɛ̀ kɔbɛ, Dɑfiti nɛ̀ o pobɛ̀ bɛdɛ́ Ainnɔɑmmu Sisedɛɛdi ɛì kou nɛ̀ Abikɑyɛɛdi Nɑbɑɑdi Kɑdimɛɛdi kou wèè ku o pokù. 4 Kɛ̀ Sɑurii keè Dɑfiti bo mɛ̀ Kɑti kɛ́yóu, ò tɛ̃́nkɛ í nhò bɛ̀tì.

5 Diyiè mɑrì kɛ̀ Dɑfitii nɑ́kɛ́ Akiisi kɛ dɔ̀: Okpɑ̀ɑ̀tì kɑ̀ɑ yiemmu kɛ n cɔutɛ́ m pɑ̃ kɛtenkɛ̀ tɛhɛitɛ̀ mɑtɛ̀ kɛ̀ nní mbo, bɑ nte kɛ̀ ti bo nwɛ̃ nkɛ bo dikpɑ̀ɑ̀tìhɛì miɛkɛ.

6 Dɛ kó diyiè kɛ̀ Akiisii ò duɔ́ nSikidɑɑ ɛì. Dɛɛ̀ te kɛ̀ dɛ kó dihɛì nɑɑ́ nSudɑɑ kpɑ̀ɑ̀tìbɛ̀ kpɛri nɛ̀ yíenní.

7 Kɛ̀ Dɑfiti mbo Fidisitɛ̃ɛ̃bɛ tenkɛ̀ kɛ dɔ̀ dibenni dìmɑ́ɑ̀ nɛ̀ bɛtɑ̃̀ɑ̃̀bɛ̀ bɛ̀nɑ̀ɑ̀. 8 Kɛ bo Sikidɑɑ kɛ dokùnɛ̀ bɛ̀ɛ̀ do bo dɛ kó kɛtenkɛ̀, kɛ́pɔntɛ Kesuriibɛ nɛ̀ Kidisiibɛ yoo Amɑdesiibɛ bɛ̀ɛ̀ do dɛ̀ bo nɛ̀ dimɔ̀nnì Suudi bíɛ́kɛ̀ kɛ bií tuɔkɛnɛ̀ Esibiti ɛì. 9 Kɛ̀ Dɑfiti nkɔù bɛnìtìbɛ̀ bɛmɔu, bɛnitidɑɑbɛ̀ nɛ̀ bɛnitipòbɛ̀ bɑ́ ò í nsùɔ́ nhòmɔù kɛ́hɛí iwũɔ̃ sɑ́m̀pɔ́ì nɛ̀ idiɛyì, sɑ̃mmɑrímúbɛ̀ nɛ̀ yòyóbɛ̀ nɛ̀ tiyɑ̀ɑ̀tì. Kòo konní wèe kɔtɛ Akiisi borɛ̀. 10 Kɛ̀ Akiisi ò bekɛ kɛ yĩ ɑ pɔ̀ntɛ ɔ̃mbɛ yíe? Ò dɔ̀: Sudɑɑ ɛì kubɑkù yoú, kòo mɛ ndɔ́ ò dɔ̀: Yedɑmɛdiibɛ yoo ò dɔ̀: Keniibɛ ɛì kubɑkù yoú. 11 Dɑfiti do ɔ̃ɔ̃ í nkonnɛ̀nní Kɑti òmɔù ofòùwè, onitidɔ̀ù yoo onitipòkù bɛ̀ yɑ̀ɑ̀ bo nɑ́kɛ́ Akiisi tìmɑtì kɛ dɔ̀: Ntɛ Dɑfiti dɔ̀ɔ̀mɛ̀. Dɑfiti borimɛ do mɛ ndò nhò bo dìì mɔ̀nnì Fidisitɛ̃ɛ̃bɛ tenkɛ̀. 12 Kɛ̀ Akiisi nhò tɑ̃́ mɛdiɛ̀ nkɛ́ntú nɛ̀ o yɛ̀mmɛ̀ miɛkɛ Dɑfiti kɔbɛ Isidɑyɛɛribɛ tɛ̃́nkɛ bɑ́ nhò dɔ́, ò bo ntú o kóo tɔ̃ntì sɑ̃́ɑ̃̀.

<- 1 Sammuyɛɛri 261 Sammuyɛɛri 28 ->