1 Ka tine lak veil le ekom a ngo vati nambei vya nindenduing ngandoung wei xel ngenongakes di taxe eivek tyoung gheyapu yo: “Xey a sanghoxe xe xe Anutu en vind xe veil meyeing me e lei laeing me nikanzek eno na wou xe xe Anutu, 2 en e xe zeimeing qayeeng nei nyei zonghek me la bombek ayang. Anutu wo qayeeng en vex wei sakwaingta wei wo nol wou tembuing en e xe kwapesiv o. Anutu wong myaveweeng lox wou vex on en gyand wei e xe xukxeyeiw wei vex on leis xel mey yo.”

3 Me xel taxe luyuw no: “Xey a sanghoxe Anutu! Nenyexlu wei beyeeng Babilon on mi la gheyapu takwei takwei.” 4 Me xel 24 teivateiv me lul mapieing vey eno ev vaxend qatu eivek de wo lalo wou Anutu wei toundei lek e xe siaking o. Me xel neil, “Zonghek. Aleluya!”

5 Woyom vya ti lam anghei siaking me neil: “Xey a sanghoxe xe xe Anutu, xam dalus wei e xe xukxe yo, xam wei ghe mi waleeng en e yo, xam xouing wei lei maeing me lei laeing o!”

6 Woyom a ngo vati nambei vya lukeing wei xel ngenongakes o me xok ambei memiing nindenduing wei mi veimya yo me xok ambei dewek toungheing me neil: “Aleluya! En xe xe Tambiy Ngandoung Anutu nikanzekta wo King me yeiteyei lulul sapa sapa. 7 Xey a wong xeindlala me na pamilexe xow me na sanghoxe e lei zekna en iingama wei Sipsip Lingheing eno lam, me e venei wei e bei di eno yeiwou xow woy. 8 Nimemis teleing wei siing me wo vako eno xel wong wou e bei e byex lek xow.” Nimemis teleing eno nale ghanang xuk bombek wei xel vambuing xe.

9 Woyom angela neil wou ay, “Wa byex bei, ‘Mata e na wou xel wei qayeeng la wou xel bei xel nam en mata ngandoung wei iingama wei Sipsip Lingheing o.’ ” Me neil qayeeng lek mapu is ambei nyon, “Inye qayeeng beimambei ne zonghek wei Anutu yo.” 10 Lek qayeeng tine eno a teila wou e vaxa bei bong lalo wou e. Ekom neil wou ay, “Wa seng bong ambei nyon. A ne xe xouing xukxe is xam limim wei mi tul pavulek wei Yesu yo teyei. Wo lalo wou Anutu! En pavulek wei Yesu yo inyei laweeng wei qayeeng Poropet o.”

11 A xei tyoung gheyapu eno tax me a xei vuteiv laxuv ti toungale wou a manghalus me tambiy wei mindei lek vuteiv on eno lei “Tambiy wei mi betiwou e xe qayeeng” me “Zonghek”. Moxo mi zeim qayeeng ela teyei lek me wo vevek la bombek. 12 Moxo manghalus nei nambei nenyex tumeing dom lek e lu eno qelumking ngenong toundei lek. E lei ti eno xel byex lek e wei xelti se woulek qe e venaxow woulek lei ne. 13 E vunek en teimb ding tiwei pelei eivek gyand me e lei eno nambei nye, Xoulek wei Anutu yo. 14 Xel vevek wei tyoung gheyapu yo di betiwou e, me di la lek xel vuteiv laxuv me vunek en qaeing teleing nimza me vako. 15 Ngeyeing vevek manewou ti lam lox e mya wei embei semaleeng xomaxoneing wei tembuing sapa sapa ne nangya yo. Tyek e gyeiteyei xel bo nikanzek is aen patongeeng. Me moxo qei wain neing eivek beyeeng wei qeing wain wei Anutu Nikanzekta xe myavanei ngandoung o. 16 Lek e xe teimb ding me lek e vaxa sepomb eno xel byex lei tine: