Matai 2

Xel lundpeyei wei mendalus eno lam yei Yesu

1 Ka Yesu umbek eivek Betelem wei Yudia nei, eivek bouk wei king Herot eno xel lundpeyei wei mendalus wei mi yei dee lek betum eno lam anghei ninei me lam Yerusalem 2 me teling, “Tambiy tiwei umbek ambei king wei Yudayeiw eno toundei inya? Xa xei e xe betum anghei ninei me na lam en xa bei bong lalo wou e.”

3 King Herot ngo qayeeng tine eno moxo is xel Yerusalem dalus wounaleind ngenong. 4 Woyom moxo taxe xel lumuki leitata me xel putoung wei petieing wei xomaxoneing dalus o, moxo teling wou xel bei Kilisi tyek dumbek anghei inya? 5 Xel neil elox, “Eivek Betelem wei Yudia nei, en inye qayeeng vati wei poropet byex takwei yo:

6 “ ‘Ekom Betelem wang eivek tembuing danghei wei Yuda yo

wa leim se nayak en beyeeng leilaing wei Yuda yo,

en eivek wang eno tyek wa xe tambiy ti bong ambei wa xe leilaing

me tyek mendei bei gyovaxa wei a xe xomaxoneing wei Israel o.’ ” Maika 5:2

7 Woyom Herot taxe xel lundpeyei wei mendalus o xupekeing me ngo teyei wou xel bei lek bouk vati eno betum lam nale. 8 Moxo wong xel la Betelem me neil, “Xam la me wimexe e wo nimza en yak on. Ka xam ghe gweiwou e, xam ghe bong qayeeng nam wou ay, en kandek ana bong lalo wou e is.”

9 Ka xel ngo king xe qayeeng woy, xel la wou sakwaing no me la, me betum wei xel yei ghei ninei eno la tax en xel, dekalekom la nale ghey lek beyeeng kawei yak on toundei ghei yo. 10 Gyeik xel yei betum eno xel wo xeindlala ngandoung. 11 Xel la eivek xomek lalei me yei yak on is ta Maria, de xel ev vaxend qatu eivek dom wo lalo wou e. Woyom xel tax xel xe vaxak malew dom wong ghol, me xax myalouk, me xax myalouk nge wei mi wo xeimangou yo la wou e. 12 De Anutu peti xel eivek maviing bei xel se nox wou Herot, qe xel na nox sakwaing ba me nox bend.

Yesu ma luw ta qou e me pek me la Izip

13 Ka xel lundpeyei wei mendalus la veil, Tambiy Ngandoung xe angela lam wou Yosep eivek maviing. Me neil, “Qandi lek me qou yak on aluw ta me pek me la Izip. Xam a mi mendei inyon deka a neil wou wang bole, en Herot di yimexe yak on en embei nyeis e mey.” 14 Om moxo qandi lek, me qou yak on aluw ta me la eivek boukeing me la Izip, 15 de moxo mindei inyon deka Herot mey le. Me lul tine la teyei lek ambei Tambiy Ngandoung neil eivek poropet mya yo.

“A taxe neung moux bei e nam veil Izip.” Hosea 11:1

16 Gyeik Herot woulek bei xel wei lundpeyei wei ninei eno tyoxe e, moxo lalei wo vanei mouyo, om wong qayeeng nikanzek bei xel nyeis xel yak moux dalus eivek Betelem me xel yak wei beyeeng paviyeing wei xel xe vakovek qes yuw o me e teiloum axo, teyei lek bouk wei e ngo wou xel lundpeyei wei ninei yo. 17 Woyom lul tine la teyei lek ambei Anutu neil eivek poropet Yelemia mya yo.

18 “Vya ti eno xel ngo eivek beyeeng Rama,

inyon engeing me talot ngandoung,

Resel di eng en neuyeiw dalus mey,

me vexo embei xel se bong e lalei bo nimza,

en nambei neuyeiw dalus mey de ti se toundei mapieing.” Yeremia 31:15

Yosep loumelam Nasaret

19 Ka Herot mey woy eno Tambiy Ngandoung xe angela ti lam wou Yosep eivek maviing nanghei Izip 20 de neil, “Qandi lek, me qou yak on aluw ta me lox me la tembuing wei Israel nei, en xel wei embei nyeis yak on na mey eno mey.”

21 Om moxo qandi lek me qou yak on aluw ta me lal lox me la tembuing wei Israel o. 22 Ekom e ngo bei Arkelaus yeiteyei Yudia eivek ma Herot nimbeeng, om moxo yaleeng en embei se na inyon. Ekom Anutu neil wou Yosep eivek maviing ti, om moxo la distrik Galili, 23 me la dei eivek beyeeng wei xel mi taxe bei Nasaret. Om tine la teyei lek ambei ingwei neil eivek poropet myend o. “Tyek xel taxe e bei tambiy wei Nasaret o.”

<- Matai 1 Matai 3 ->