1 Yesu neil embei, “A maxow yis wain zonghek de Mang on xuk wain ma. 2 Moxo pyaw mema dalus wei byexlek ay eno veil en xel se vuk neing lek, de mema mema wei mi vuk eno Mang qateiv veil en kandek embuk neing ngenong lek. 3 Xam ghe wo vako woy en qayeeng wei a mi neil wou xam o. 4 Xam a mi mendei eivek ay, de tyek a mi mendei eivek xam. Mema ti tyek se buk neing lek nangya emaxow, qe e mendei eivek wain bole. Xam is tyek xam seng buk neing lek qe ka xam mendei eivek a bole.

5 “A maxow wain qes, de xam mema mema. Wangwei tambiy ti embei mendei eivek ay me a mendei eivek e, ond tyek buk neing ngenong, ek wambei mendei beyaleing veil ay on tyek wa seng bo lulti. 6 Xelti embei se mendei eivek ay, ond inyon nambei mema wei xel nex ela me e mupek o, om mema nambei nyon tyek xel qekuwou me banex ena me besei lek nenyex. 7 Wangwei xam mendei eivek ay me a xe qayeeng mendei eivek xam, ond xam teling vatiyeiw en woueing nalei wei xam o, on tyek bong wou xam. 8 Xam ghe buk neing ngenong lek en e talex bei xam on a xe betiyeing, de inyon embong lei ngandoung wou Mang.

9 “Nambei ingwei Mang lalei vind ay, om a laleing vind xam. Gweimbeeng xam a mi mendei eivek a xe lalei vineing. 10 Wangwei xam betiwou a xe petieing ond tyek xam mendei eivek a xe lalei vineing, nambei ingwei a betiwou Mang xe petieing me na toundei eivek e xe lalei vineing o. 11 A neil wou xam en tine en kandek a xe xeilala e mi mendei eivek xam de xeilala tiyon e pup xam laleimim lek. 12 A xe petieing eno nambei nye: Xam titi laleimim e mi devind xel nge nambei ingwei a laleing vind xam o. 13 Lalei vineing ngandoung wei xelti eno nambei nye, tambiy ti e saing e xe mapieing en e xe gweleeng. 14 Xam on a xe gweleeng wangwei xam betiwou petieing wei a neil wou xam o. 15 Tyek a se nox me na taxe xukxe lek xam no, en nambei xukxe se woulek vati wei e xe teiv mi wong o, qe a taxe gweleeng lek xam, en lulul dalus wei a ngo wou Mang eno a neilteyei wou xam. 16 Xam seng beyal ay, qe a beyal xam bei xam ghe na me ghe buk neing lek, neing on tyek na mi mendei enden. Woyom Mang tyek bong vati wei xam ambei teling en eivek a leing eno wou xam. 17 Inye a xe petieing: Xam titi laleimim e mi devind ama.

18 “Wangwei moux alis vex wei tembuing ne bo lalei vanei wou xam ond xam ghe bou naleimim bei xel wong lalei vanei wou ay a tax. 19 Wangwei xam on ingwei tembuing ne yo, on tyek xel laleind devind xam nambei xel venaxow. Ekom xam se ingwei tembuing ne, en a beyal xam veil tembuing. En qes tiyon om moux alis vex wei tembuing ne di wo lalei vanei wou xam. 20 Xam ghe bou naleimim en qayeeng wei a neil wou xam o: ‘Xukxe ti se ghanaw e xe teiv.’ Wangwei xel bo nol wou ay, ond tyek xel bo nol wou xam is. Wangwei xel betiwou a xe teyoxeing ond tyek xel betiwou xam xe is. 21 Xel tyek bo nol wou xam en sakwaing ambei nyon en nambei a leing, en xel se woulek tambiy tiwei wong a lam o. 22 Wangwei a se nam me baluk wou xel nei ond sewokeing ma veil xel. Ekom gweimbeeng ne xel se teyei bei dax sewokeing wei xel eno vun. 23 Xelti embei bo lalei vanei wou ay ond wo lalei vanei wou Mang is. 24 Wangwei a se nam mendei eivek xel senghoing me na bong pok ngandoung wei xel nge se mi wong o ond tyek sewokeing ama veil xel. De xel yei lulvako beimambei ne woy, ekom xel laleind se vind ay me Mang is. 25 Ekom inye embei na teyei lek vati wei xel byex eivek petieing o:

26 “Gyeik tiwei embei devind en ghanduxoun xam eno nam ond tyek ambong e nak wou xam, inyei lam wou Mang, inyon Laweeng wei zonghek o wei mindei is Mang me lam eno tyek moxo na neil qayeeng en ay. 27 Me xam a neil qayeeng en ay is ambei nyon, en nambei xam ghe mindei is ay eivek myaxeeng selis.

<- Yoan 14Yoan 16 ->