Wogeletana 19

1 Geka u mulina ma hoi yada gololo banei dumana gehouna a noonoli mei lawa bolu banei dumana ponaponahi ma hi ibaabani hi pa,

‘Haleluya, Yaubada ta wotalagiyeya

tauna tu wiluyagohanita po tu kadikadidili dumana.

2 Babana a luhetala i dewadewa po apapoe mihana i lidumaluya

po tu matamaga dumana wawinena a matamaga uyahinei hipuli atapuna i iapapoeya

mihana amaka i weleya.

Ma dobuna uyahina Yaubada a tu bagibagi talahi hi laikololohi

mihana i wiapapoeya.’

3 Ma mala luwaga hi otu labatana hi pa,

‘Haleluya, Yaubada ta wotalagiyeya

babana dobu baneina e alalahi

ma bogahuna houga magomagouna e gegae.’

4 Ega yaka tanitaniwagahi magouhi 24 ma mimituwa magouhi wohepali, hi polou hopu Yaubada anani mae wasawasa u matana hi wotalagae hi pa,

‘Moina, Haleluya, to wotalagiyem.’

Sipi Natuna a tawine tolehana

5 Ega yaka ani mae wasawasa uyahinei baha gehouna i nenei i pa,

‘Taumi ata Yaubada a tu bagibagi

po tu matutena muhomuhomi

po balubalumi ona wotalagiyana duma.’

6 Ma apoma gololo banei dumana gehouna a noonoli mei lawa bolu banei duma ma mei guletutu gololona ma mei palele gololona baneina ma hi ibaabani hi pa,

Haleluya,

Babana Guyau Yaubada tu kadidili dumam e tanitaniwaga.

7 To gwauyala ma to kaoha labatana

po to wotalagiyem

babana Sipi Natuna a tawine tolehana i geleta

yaka agona amaka i wihiya tawine binei.

8 Agona a kaleko gegehi,

yeuyeuhi po wakewakekehi Yaubada i weleya.’

(Ma luiluina naka Yaubada tu wiwoiyawena hai dewa dumadumaluhi.)

9 Ega yaka tu winoyanoya uyahiu i baha mai i pa, ‘Baha geka una gilumi,’ po a gilumi, ‘Taumi iyawoi Yaubada i ototugemi Sipi Natuna a tawine tolehana uyahina apo ona kaoha.’ Ma tu winoyanoyana uyahiu i baha meme i pa, ‘Geka Yaubada a baha dumana.’

10 Ega yaka a guli hopu tu winoyanoyana u aena po a polopolou ma uyahiu i baha mai i pa, ‘Ega naka pite, tau Yesu a tu bagibagi mei tam, po mei walewalehimi tauhi Yesu gowana tu kawamoinena. Tamogi Yaubada uyahina una polopolou babana Yesu tu kawamoinena tauhi galenahi mei tu bahapiko.’

Hosi wakewakekena tu geluna

11 Yada a gagaleya ma i gunahoeya ma hosi wakewakekena i memae po tu geluna hi wigowaya hi pa, ‘Tu limoina po Tu lidumalu.’ Uyahinei taniwaga dumadumaluhi uyahihiyei e imeiha ma e igawiya. 12 Ma tu geluna matana galenana mei mayau alalatana ma unununa unuhau gegehi boluhi he memae. Ma gowana hi gilugilumi ega emoemotana iyai ina hanapugeya. Tauna tunawana i hanapugena meya. 13 Ma a luilui i ototeni tala i wihogoya ma gowana hi baheya hi pa, ‘Yaubada a Baha.’ 14 Ma tu wigawiya mi yadena hai hosi wakewakekehi hi geluhi ma hi wootagoya, hai kaleko gegehi, yeuyeuhi po wakewakekehi. 15 Ma gamonei kwasikwasi komkomna i gelegeleta apo uyahinei ani taniwaga hoi hipuli ina taniwaga lagonihi po a kodila pawasigei ina taniwagehi po gasi wine ani’mpihagana uyahinei ina lumutumutuhi, naka Yaubada Tu kadidili a houga uyogigai baneina. 16 Ma a luilui po aena hi gilugilumihi hi pa,

TU WIWASAWASA HAI WASAWASA
PO TU WIGUYAU HAI GUYAU

17 Tu winoyanoya gehouna a gagaleya ma kabudala uyahina i towotowolo po i otu labatana kiu lupalupahi atapuhi uyahihi i pa, ‘Ona liya mai Yaubada a toleha baneina uyahina, 18 po on’am wasawasa uyogohi po gawiya kapekapenahi uyogohi po tu wigawiya uyogohi po hosi uyogohi po tu gelugeluhi uyogohi po lawa magomagouhi uyogohi po babada uyogohi po hai tu bagibagi uyogohi po lawa muhomuhohi po balubaluhi uyogohi.’

19 Ega yaka mimituwa bogei i gelegeletai ma hipuli wasawasahi hai tu wigawiya mitehi hi’mboina gogona ma ipa hina witona tauna hosi wakewakekena i gelugeluya a tu wigawiya mitehi. 20 Po ega yaka Yaubada mimituwana a tu bahapiko koyakoyama mitehi i womomohihi po a yautuhi ma i wihulu hopunehi domo waipoya dumana galenana mei baya u hinena. Tu bahapiko waikoyakoyamana tauna lolowa a manini i ibagibagi mimituwana u matana po uyahinei lawa i koyamehi po tauhi mimituwana a wekiwekilala uyahihi i memae ma a talaoloto uyahina hi polopolou. 21 Ma kwasikwasi komkomna hosi tu geluna gamonei i hopuhopu uyahina mimituwana a bolu unihi po hi hilage, ega yaka kiu hi nei po uyogo hi’mam po koibahi hi hogohi.

<- Wogeletana 18 Wogeletana 20 ->