1 Geka u mulina tu winoyanoya gehouna a gagaleya ma yadei i hopuhopu mai tauna a taniwaga i lata duma po namalana hipuli atapuna i tunu yayahi. 2 Ponana i lata ma i otu i pa,
‘Hei, Babiloni dobu baneina amaka i peu,
amaka i peu,
po apo mimituwa apapoehi po alugo palopaloumahi po kiu apapoehi po gobugobuhi apo hina widobugeya,
3 babana Babilonina a wine uyahinei
tupo atapuhi lawahi i wiumahi po hi badebade.
Wine naka matamaga dewahi apapoehi,
uyahinei hipuli wasawasahi mitehi hi eneno gwau
po hini luhogalana uyahinei hi wiwasawasa
po tu uneune gapola baneina hi tutuhagaya.’
4 Hoi yada pona gehouna a noonoli ma i pa,
U lawa, dobu naka ona hopu haleya, inapa ona memae
yaka apo a apapoe ina damanahi uyahimi
po a meiha wiyuwa ona tuhagaya.
5 Matababana a apapoe i lata duma po a gae mei oya,
a dewahi apapoe ubeihi
ma Yaubada i nugonugotuhu po ipa ina wimiheya.
6 Una imiheya a apapoe a lata naka pitenana
po mala luwaga maiha una weleya,
yaka a keyaka apapoena mihana mala luwaga una weleya.
7 Tauna i hunena meya i pa,
“Tau wawine wasawasa,
ma ega tau hiwape po ipa a tutou.”
Uyahinei gapola i wasawasagehi ma i yamgaganu.
Mihana una weleya po wiyuwa ina tutougeya.
8 Uyahinei mala emosi hota apo witai ina tuhagahi:
hilahilage ma witutou ma gomala,
ma mayau ebalana ina liyababahi.
Babana Guyau Yaubada tauna Tu Kadidili dumana
tauna apo geka wawinena a meiha ina weleya.
9 ‘Ma hipuli wasawasahi tauhi wawinena mitehi hi matamatamaga ma hi igapola tauhi dobuna binei apo hina tou babana hougana apo ina alalahi ma bogahuna ina gegae ma hina gagaleya. 10 Ma apo hina matouta duma a wiyuwa binei po uheiya hina towolo ma hina laudalili hina pa,
“Aee, aee, kihoni, Babiloni dobu baneina
ma kadikadidilina mala emosi libahibahi u tuhagaya.”
11 ‘Tu uneune hoi hipuli apo hina nugodubu duma dobuna binei po hina tou, matababana ega iyai gehouna emoemotana po hai gapola ina gimalehi. 12 Hai gapola naka gole, po siluba po gaima namanamalihi po giniuba matahi po kaleko gegehi po luilui namanamalihi po mayau dimudimumuhi po dona baneihi po gawi po kopa po pawasi po gaima wakewakekehi, 13 po naiya po dadi dimudimumuhi, gasi dadi ani apuna binei po wakatu po gohogoho po wine po bunama po pegapega po bulumakau po sipi po hosi po womtiteina po tu bagibagi hinihi po alugohi gimagimalahi.
14 ‘Ega yaka tu uneune hi baha nae dobuna uyahina hi pa, “Ginouli dewadewahi u lauhogalehi amaka hi kokoe mei gasi om wasawasa wigiyanana atapuhi amaka hi yababa po apega una tuhaga mehi.” 15 Ma tu uneunehi tauhi naka gapola baneina hi tutuhagaya dobuna uyahinei, uheiya hi towotowolo babana dobuna a wiyuwa hi gagaleya po hi matouta duma po anai nugowiyuwahi ma hi tutou, 16 hi pa,
“Aee, aee, kihoni, dobu noka tupo baneina
lolowa a wihiya gole kaleko gegehi po luilui wakewakekehi po kayakayahi,
ma gaima namanamalihi po giniuba matahi uyahina,
17 mala emosi hota ma a wasawasa atapuhi amaka hi yababa.”
‘Ma tauhi wam tanitaniwagahi po tu gelugelu po tu bagibagi po tu uneune atapuhi uheiya hi towolo, 18 ma dobuna i alalahi bogahuna hi galeya ma hi laudalili hi pa, “Odubona ega dobu baneina gehouna mei noka dobuna ma geka hougana iyowai?” 19 Ega yaka tauhi tepahi hi gibahi ma hi tou labatana hi pa,
“Aee, Aee, kihoni, noka dobu baneina
uyahinei tu kadakadau hai gapola hi tutuhagahi
mala emosi hota ma a wasawasa atapuna i yababa.
20 Ona kaoha labatana taumi Yaubada a lawa hoi yada,
po a tu wiwoiyawona po a tu wituwetuwega po a tu bahapiko ona kaoha labatana,
babana omi ani wiyuwa dobuna Yaubada a meiha amaka i weleya.” ’
21 Ega yaka tu winoyanoya kadikadidilina gaima banei dumana i wohepaya po i halena hopuneya hoi boga ma i baha i pa,
‘Babiloni dobu baneina apo ina peu duma
po mei geka gaimana apega hina galena meya.
22 Uyahinei dobuna a kaoha apo ina kokoe
po apega iyai gehouna ina lauinainaga
bo ina igita bo himogo ina huwehuweni,
po nima bagibagina tu hanahanapugehi apega hina memae,
ma ulo gololona ina kokoe.
23 Lampa yayatahi apega hina gelegeleta,
po tu witawine ponahi apega hina nonoli dobuna uyahina.
Matababana dobuna tu uneunehi hipuli atapuna hi gelagonihi
babana hai balau uyahinei tu mehipuli atapuhi hi koyamehi.
24 Ma Yaubada a tu bahapiko po a lawa waiwoiyawahi po lawa gehouhi
