1 Mpo Kotio, nana kaarae are tinavu qaqira kaaro? Are ekaa entae tinavu qaqira kenarave?

Mpo, nana kaarae tenavu ai sipisipi vauraukara arara itaivara variaro?

2 Ho iritaane. Haaru Isipi vatanaaka tinavu Isareri rumpa taamanta vaurara are tinavu ruaruama timitera, tinavu Isareriara vika tinta vaiinti nahenti variate tivakera tinavu kaama taanarave.

Saioni Aiqinaravata iritaane. Haaru are tinavu hampata vaireva, Saioni Aiqinaqaa variqira vuanarave.

3 Mpo, are vi vatukaraqi nihara tavaane. Navutaaka ai Naavu ekaama ravantiaqa aqu kaavo.

4 Haaru tenavu ai vataake ruvaaqumavi vaunanaini ai navutaaka vora ntuvaqi viha, vika nái vutora/qarareqa voqi voqi arataarave.

5 Mpo, vaiintinavu roriqohai nantaqi vo katari vo katari teqa taaqama kaantemake, navutaaka ai Naavuqi vahehema/vaataiqama taa katarira, vo katari vo katari teqa taaqama kaarave.

6 Vika nora roriqohaive, inaara roriqohaive, ai Naavuqi koqemake nkauruke qara ntuvataa katarira teqa taaqamake 7 viraqaahai vika ai Naavu viravata qumpiarama taavaro ekaa ita taiqa virave.

Mpo, vika mintima keha are tinavu Isareri hampata variana Naavura qoraiqama kaarave.

8 Navutaaka tinavuara tiha, Tenavu vika ekaa ruqutu taiqa karerave tivakeha, tinavu vataini vi aniha ekaa ai maara naavu qumpiarama taiqa kaarave.

9 Maa entara are nora kaiqa vo kaiqa vo kaiqa varaarava kia qaiqaavata qovaraiqivo. Ekaa ai paropeti vaiintinavu taiqa vuavaro kia voqavanovata vaivo. Mpo, tairentae qora enta viva taiqa vuanarove?

10 Mpo Kotio, navutaaka nanti nanti entae ai naaraihama amitaqi vivarave? Vika ekaa entae ai autuara qora uva tivaqi vivarave?

11 Mpo, nana kaarae are tinavu qaqira kera kia nena kauqu tanaraqohaira tuvu tinavu kahaqiaro? Nantiharae are nena kauqu kia tutiraitira, qaqi variaro?

12 O Kotio, nai haaru are tinavu Isareri Avuhainaava vaihara tinavuqaa raqikiqira vuanarave. Are airi tataa tinavu Isareri ruaruama timitaanarave.

13 Are nena kempukaqohaira nora namari raira kaanarave.

Qaakau haika airi qiata vataava nora namariqi vaira are vira qiatanavu rukavu kaanarave. (Vi uvara okara: Isipi iqoka vaiinti namariqi aru taiqa kairara tura.)

14 Are qaakau haika airi qiata vataara vira qiatanavu rukavu kera, vira vaata qaakau vairinavu aahara vataini variaka nimiaramanta naarave.

15 Arema vata qantua kaararo viraqihairo aruvu namarivano qovaramaviro tuvi vaira.

Arema namari tuvi vaira vo namari vo namari aaharaiqama kaanara.

16 Arema aatitairavata enta iravata autu kera vataanara. Arema kuarivata, toravata naaruvaini nái vatukaini vataanara.

17 Arema vi vatava vi vatava mini mini mintimakero varianarove tivakera vataanara.

Arema nora kuari itaaina entarave, aaqu ntuaina entarave, autukera vataanara.

18 Noravauvo, are mintiarava variaramantavata, ai navutaaka ai naaraihama amite variarave.

Kia avu aato vataa vaiinti nahenti vika ai autu vatainiqamake variarave.

Ho virara virara iritaane.

19 Tinavu navutaaka qaakau vairinavu voqaara variamanta tenavu qaqi mirura voqaara vaunara. Are virara iriharama tinavu navutaaka kauquqi kerora.

Vika tinavu ai vaiinti nahenti qoraiqama timite variara. Mpo, tinavuara irihara tinavu kahaqiraqe tenavu kia qutu viraiti, qaqi variqi vuare.

20 Vaiinti nahenti ntaiheha qoraiqama nimite variaka mantaaqainaini voqi voqi kukeqavi variarara tira, haaru are tinavu Isareri vataakera vaihara uva tiva taatau taanara irihara tinavu kahaqiane.

21 Hauri qora kaiqa vare variaka vaiinti nahenti qoraiqama nimiteha nora maara vikaqaa vataqi vivora. Are vi vaiinti nahentika ike mpo tiva nimitehara, vika kahaqira kia kaurira haika varaate.

Are vehi vaiinti nahentive, ekaa haikara aavoqiakave, kahaqira vika vika ai autu tuahera kaate.

22 Mpo Kotio, kia avu aato vataaka vo enta vo enta ariara mometa ti varia uvara iriharama, himpira nena auta ntina uvara tiramanta ai navutaaka kia ai ko ho aatara kaate.

23 Ai navutaaka naverai tiha ariara qora uva ti variarave, vika vo enta vo enta qora uva noraiqaake ti variarave, kia vi uvara vi uvara tauru kaane.

<- Ihi 73Ihi 75 ->