1 Kotiva tinavu antua timiteharo tinavu kempukaiqama timite vaivama vairo.

Maaravano tinavuqi qovaraiqivaro viva vaaka tinavu kahaqireva auti vaira.

2 Viva minti vairara ti, tenavu kia vo haika aatu qetarera. Maa vatava voqamakero qaki qaki i vairaro vo aiqina vo aiqinavano nora namariqi aqu virera, tenavu kia qetarera.

3 Nora namarivano hari hari tiharo taarapara ntiharo kumpetaqiro viharo aiqinanavu kauru kaaruma kairaro rapatutirera, tenavu kia qetarera.

4 Namari vovanovata vairo. Vi namariva Kotira vatukaqi tuvi vaimanta viraqi variaka quaheha variara. Vi vatukaraqi nai virini kantaaqaini vai Variqava turuaraini tuekaama kero vairo.

5 Kotiva vi vatukaraqi vairara ti, kia ho vi vatukara qoraiqama kevara. Vokika vi vatukara qoraiqama kareka ivera, Kotiva aatitare inaraqaa vaakama vi vatukara kahaqianaro.

6 Vo vatanaa vo vatanaaka voqamake arara ite vaimanta iqoka raqi variamanta vika avuhainaaka nái vaiinti nahenti hampata qoraiqamavi variarave.

Vika minti variavaro Kotira kempukavano vika naatara kaira. Naaruvavano uva tintemakero, Kotiva uva tivaro vira uvavano vata ravita kairave.

7 Noravano Kotiva ekaa kempuka vataava, viva tinavu hampata vairo. Ti kaivaqara Iekopira Variqavano, viva tinavu antua timite vaivama vairo.

8 Noravano Kotiva vare vai kaiqara ne ani tavaate. Ne ani viva nora kaiqa, vo kaiqa vo kaiqa vare vaira taveha kauqu runkinkiri iate.

9 Ekaa vata maata iqoka raqi variara viva taveharo taiqake vairave.

Viva vika huruve, vaantaarave, rauhaantima keharo vika kainkevata iha quarake vairave.

10 Viva tiharo, Kia qaiqaavata iqoka raquate. Ne kankomake ti tavaate. Te Kotika Noravanoma vauro.

Te Noravano variari ekaa naato vatanaaka ti hutuqai tuaheraqi vivarave. Ekaa vataini variaka ti hutuqai tuaheraqi vivarave, tiro.

11 Noravano Kotiva ekaa kempuka vataava viva tinavu hampata vaimantama vauro.

Tinavu kaivaqara Iekopira Variqavano tinavu antua timite vaivama vaivo.

<- Ihi 45Ihi 47 ->