Vira autuvano koqe autu vairara ti, ne virara ihi tivaqi viha vira autu tuahera kaate.

4 Noravano tinavu kaivaqara Iekopira anku vika nai kaama tero tiharo, Isareri vika ti anku tarukama vaivarave, tira.

5 Te maa uvara kankomake irunara: Noravano Kotiva nai noravano vaiharora tiro, viva ekaa ˻una˼ variqa uri aatarakero vairave.

6 Noravano Kotiva nana nana haika autuataa ivaro viva naaruvainive, vataqaave, nora namariqive, nora namari veva muntukaraqive, auti vaira.

7 Viva tonavu vara kaivaro tonavuvano vo vata vo vataihairo virini oru vi vaira.

Viva aaquakaa vara kaivaro aaquakaavano uti vaivaro aaqu nti vaira.

Viva uvai vara kaivaro uvaivano maa vataraqaa utiharo vi ani vaira.

8 Viva Isipi vatanaaka qorainti vainti kara hunka vatataakave, quara vairi avuni vatataakave, ekaa arukaira.

9 Viva Isipini Pero vaiintivata vira nora vaiintinavuvata qoraiqama nimitareva iharo, nora kaiqa, vo qara vo qara i kaiqara qovarama keharo vika qoraiqama nimitaira.

10 Ike, Noravano Kotiva airi vatanaaka qoraiqama nimiteharo avuhainaa vaiinti kempuka vataaka vikavata arukaira.

11 Viva Amo vatanaaka King Sihonira arukero, Basaani vatanaaka King Okura arukero, ekaa Kenaani vatanaaka avuhainaukavata aru taiqa kaira.

12 Viva vika aru taiqa kero, vika vata varakero nai vaiinti nahenti Isareri nimira.

13 Noravauvo, ai autuvano ekaa entama variqiro vuanarove.

Maa entara variakavata, naantiara qovaraiqikavata, ekaa vika ai autuara iriha ai autu tuaheraqi vivara.

14 Noravano Kotiva tinavu nai vaiinti nahentiara iriharo tinavu auta ntuva timitero tinavu uva taiqa timitaanaro.

Viva tinavu nai kaiqa vaiinti nahentiara mpo ike tiva timitaanaro.

15 Vo vatanaa vo vatanaaka korive silvaave varakeha vo qara vo qaramake maraqura/varaha nái kauquqohai autuke, vi haikarara tinavu variqave ti variara.

16 Vika no vaimantavata, viraqihai kia ho uva tivara. Vika avu vaimantavata, kia ho tavevara.

17 Vika aato vaimantavata, kia ho uva irivara. Ike, vika aihovata kia ho varevarave turo.

18 Oho, una variqa auti variaka variqi vi, naantiara vika nái aututaa haikara vira voqaantemake vaivara.

Vaiinti nahenti una variqara noraiqaake iri variaka, vikavata vohaa qaramake vira voqaara vaivara.

19 Ho ne Isareri, Nora Kotira autu tuahera kaate. Eronira anku Nora Kotira kaiqa vara amite variaka, nevata vira autu tuahera kaate.

20 Rivaira anku, ne Nora Kotira autu tuahera kaate. Vaiinti nahenti Nora Kotira aatu qete variaka, ne ekaa vira autu tuahera kaate.

21 Ne Saioni Aiqina Ieruharemiqi variaka, nevata Nora Kotira autu tuahera kaate.

Kaiqe tenavu ekaa Nora Kotira autu tuahera kaare.

<- Ihi 134Ihi 136 ->