Te vira vaiinti nahenti ruvaaqumavi vainaini vaiha, ekaa tenta muntukaqihai Nora Kotira autu noraiqama keha, viva varai kaiqara vika tiva nimiqi virera.

2 Noravano Kotiva tinavu vara timite vai kaiqava, nai nora kaiqa, vo kaiqa vo kaiqa vaimantara ti, virara voqamake quaheha variaka vira okara irireka aato tara iha variarave.

3 Viva vo kaiqa vo kaiqa vare vaiva, vi kaiqava vira mpeqa okaravano takuqi vairavata, viva uritarero avuhainaava vairaravata, tinavu humiqe vaira.

Mpo, viva avuqavuqama keharo vaiinti nahentiqaa raqikiqiro vi vairava kia taiqa viraitiro, ekaa enta qaqi variqiro vuanarove. 4 Viva aahuva kaiqa, vo kaiqa vo kaiqa tinavu vara timite vaiva nora kaiqa vairara ti, tenavu virara kia tauru karaiti, qaqi iriqi virerave.

Mpo, Noravano Kotiva tinavu koqema timiteharo tinavuara aaqurihama timite vaivama vaivo.

5 Vira aatu qeteha koqemake vira uva iriqi vi variakaqaa viva raqikiharo kara nimi vairave.

Viva nai vaiinti nahenti hampata uva tiva taatau taira kia tauru karaitiro, ekaa enta vi uvara iriqiro vi vairave.

6 Viva tinavu nai vaiinti nahenti nai kempuka humiqeharo, vo vatanaa vo vatanaaka ia vatara tinavu timimanta varaunara.

7 Viva vare vai kaiqava, ekaa vi kaiqava avuqavu vai kaiqava vaivaro, viva uva maara tiva taivavata tinavu kahaqiaina uvava vaimanta tenavu homa vi uvaraqaa muntuvi vairara.

8 Noravano Kotiva tinavuara noraiqaakero iriharo tinavu avuqavuqama timi tareva nai uva maara tivataiva kia taiqa viraitiro, ekaa enta variqiro vuanaro.

9 Viva nai vaiinti nahenti kuvantu nimitero, vika hampata vaiharo uva tiva taatau kero vataira. Viva vi uvara kia qaqira kairaro ekaa entama qaqi varianaro.

Mpo, tenavu vira mpeqa okara takuqi vairara iriha, voqamake qeteha vauro.

10 Vaiintivano koqe avu aato varareva irera, viva hoqare Kotira aatu qeteharo variarire.

Vira uva maara iriqi vi variaka variavaro viva vika koqe avu aato nimimanta variara.

Ho kaiqenavu vira autu ekaa enta ekaa enta tuaheraare.

<- Ihi 110Ihi 112 ->