Kaarantura 21

Isareri Kenaani hampata raqiha vika naatara kora

1 Vi entara Kenaani vatanaaka avuhainaa vaiinti vovano viva Araati vatuka Nekevini vaiharo irumanta Isareri Atarimi aaraqaa ani vaura. Mintimake ani vauvaro avuhainaa vaiinti viva iriro nai iqoka vaiintivata ntita varero otu Isareri hampata raquqi viharo Isareri vokuka ravaaqavu varero vura.

2 Mintumanta viraqaahai Isareri nái kauqu aiqiqaa aqukeha Nora Kotirara tiha, Are tinavu qaqi kairaqe tenavu vi vaiintika naatara kaarera, tenavu kia vika vatukanavuqihai vo haikavata vararaiti, ekaa vi vatukara vehi autu taiqa karerave, ti.

3 Vika minti tuvaro Noravano Kotiva vika uva iriro Isareri vika kahaqumanta vika Kenaani vatanaaka hampata raquqi viha vika naatara kora. Isareri Kenaani vatanaakavata, vika vatukavata ekaa vehi autu taiqa korara ti, vi vatara autu nteha Homaave – Vehi autu taiqa korave tura.

Baraasi oriqohai memaru aututora

4 Isareri Horu Aiqina mini ke, Idomuni vuarorave tivake vika vo aara, Naare Namarini vira inaara autu Akapa Namarini vu aararaqaa rante vura. Vika vi aararaqaa vi vauvaro voqama kero popohora.

5 Vika nuntu nauntu tiha Kotika Mosika nitiha tiha, Nana kaarae netanta tinavu Isipiqihai tivita vare, maini aahara vataini viri kaavo? Tenavu maini vaiha qutuma virarave. Karavata namarivata kia maini vaivo. Vo kara timi varianara virara tinavu voqamakero popohaivo, ti.

6 Isareri vika minti ti vauvaro Noravano vika nuntu nauntu ti vau uvara iriro, vira kaara quqahi/quaiha varakomanta vika vaiinti nahenti nkaqe vaumanta airitahaa qutu vura.

7 Mintumanta vaiinti nahenti Mosiva unaini aninte virara tiha, Mpo, tenavu Nora Kotiravata aivata qora uva tiva nimitauro. Are Kotira aarairaro viva quqahi/quaiha vika tinavuqihairo vara kaarire, tuvaro ho Mosiva vaiinti nahentiara iriharo Kotira aarora.

8 Mintuvaro Noravano Kotiva Mosirara tiharo, Are quqahi/quaiha maraqura/varaha vo autu kera, katari aratera viraqaa vira hiritaane. Tau vaiinti nahentikae quqahivano/quaihavano nkaqa tairauka vira maraqura vuruvi tavaivera, vika kia qutiraiti, qaqi vaivarave, tiro.

9 Kotiva minti tuvaro ho Mosiva quqahi/quaiha maraqura baraasi oriqohairo autu kero, katariqaa hiritero. Mintiakero hiritomanta quqahivano/quaihavano nkaqato vaiinti nahentika vuruvi vira maraqura taveha, vika kia qutiraiti, qaqi vaura.

Isareri Horu Aiqina ke Moapi vataini oruntora

10 Isareri vika Horu Aiqina ke, vivi, Obotini oru naavu maaqa kaqate vaura. 11 Obotini varike qaiqaa vihai katu vare oru haarua naavu nuqihi vaunaini Abarimini qaiqaa naavu maaqa kaqate vaura. Moapi vatavano vauvaro kuari avu uruntonaini Abarimivano aahara vataini vaura.

12 Qaiqaa vika Abarimi ke, katu vare Sereti uqitaini naavu maaqa kaqate vaura.

13 Qaiqaa vika Sereti ke, katu vare Aanoni Namari hini mantaraini aahara vataini naavu maaqa kaqate vaura. Vi vatava aahara vatavano viviro, Amo vatanaaka vata avutaini oruntora. Aanoni Namarivano o ntuvataantema kero, Moapi vatanaaka vata hini antuarero Amo vatanaaka vata hini antuarero vaura.

14 Vo vuku vira autu, Noravano Kotiva raqurave tu vukuraqi mintima tiro:

Wahepi vatukavano Sufaa vata mantaraini vaivaro uqita vatavanovata Aanoni Namarivanovata 15 viviro vatuka vo Aruni oruntero, Moapi vata auvahinivata oruntairave, tura.

16 Qaiqaa Isareri vika mini ke, katu vare, oru vo vata, Namariara Quvitonainive tunaini vura. Isareri mini vauvaro Noravano Kotiva Mosirara tiharo, Vaiinti nahenti naarairamanta ani ruvaaqumavi vaiqe te vika namari nimiare, tiro.

17 Tumanta vi entara Isareri maa ihira tiha:

Ruvu namarivauvo, nena qovarama vira vuane. Qovarama viraqe tenavu vira taveha quaheha ihi tiare.

18 Qiata vaiintivata nora vaiintivata vi ruvu namarira quvitaarave.

Qiata vaiinti kauruqohaivata, qaqi uruqi nua kaururaqohaivata quvitaarave.

Kaiqenavu virara ihi tiare, tura.

Qaiqaa Isareri aahara vata ke, katu vare Matanaini vura. 19 Qaiqaa vika Matana ke, katu vare Naharieri uqitaini otu vaura. Qaiqaa vika katu vare oru veraini Bamoti vataini vura. 20 Qaiqaa vika Bamoti ke, katu vare otu uqita vataini Moapi vata Pisiga Aiqina vaunaini vura. Pisiga Aiqinaqaahai vaiinti nahenti aahara vata maata vutu vuru taveva ho vaura.

Isareri raqiha Sihonika Okuka naatara kora

21 Isareri mini vaiha uva varakovaro Amo vatanaaka avuhainaa vaiintivano Sihoniva inaini vura. Vika mintima ti:

22 Hoe are tinavu qaqi kairaqe tenavu ai vata tavaarana vitare vuare? Tenavu tentanavu purumakau hampata kiama ni uiti naahoqive, uaini naahoqive, aiqu ntavaqi viraiti, ne namariara quvitaaraqi kia kaqake naraiti, tenavu qaqi nora aaraqaa avata vare vitare virarave, ti.

23 Vika minti tuvaro King Sihoniva Isareri vikara tiharo, Ne kia ho mintivarave, tivakero viva nai iqoka vaiinti ruvaaquma kero ntita varero oru Jahasi vatukaini aahara vataini vaiharo Isareri hampata iqoka raqura.

24 Iqoka raqumanta Isareri vika kempukaiqamake raqiha airi Amo aru taiqa keha vika vatavata varora. Vika Amo vatanaaka vata varova vaireva, Aanoni Namariqaahairo hoqarama kero viviro vuru Jaboku Namari noti mantaraini vuru taiqora. Mini vo vatanaaka Amoni vatanaaka kempuka vatanaaka vaumantara ti, Isareri Amo vatanaaka vataqai vare, kia Amoni vataini vura. Amoni vata auvahini Amoni iqoka vaiinti airitahaa vaumanta Isareri kia mini vura.

25 Ho Isareri Hesaboni vatuka vare, hini vatukanavu vira tataaqa vauravata vare, ekaa Amo vatukavata vare, vi vatukara vi vatukaraqi oru vaura.

26 Amohainaa King Sihoniva Hesaboni vatukaqi vaura. Haaru Sihoniva Moapi avuhainaa vaiinti vontiro raqiharo vira aatarakero vira vata ekaa varora. Vi vatava viviro Aanoni Namarivano otu vunaini muntu taiqora.

27 Haaru Sihoniva mintimakero Moapi vatanaaka naatara korara ti, ihi ti vau vaiintika maa ihira tura:

Ne Hesabonini vatukaqi ani vaiha qaiqaa vi vatukara autuate.

Sihonira vatukavano haaru koqema kero vauntemake, vi vatukara qaiqaa autuate.

28 Ihavano iteharo ukau itakontemake, haaru Sihonira iqoka vaiinti Hesaboni vatukaihai iqoka raquqi vivi, Aru vatuka Moapi vataini vaura vehi autu taiqake, verara Aanoni Namari aruvuni vaukavata aru taiqa kora.

29 Moapi vaiinti nahentivauvo, niara oho tiva nimitauro. Una variqa Kemosira autu tuahere variaka, mpo, ni vehi autu taiqama kaavo.

Ni una variqavano kia ni iqoka vaiinti kahaqiraitiro, viva ni navutaaka qaqi kaimanta vika ni iqoka vaiinti aru ntata kaarave.

Ni una variqavano Amohainaa King Sihonira qaqi kaivaro viva ni nahentinavu ravaaqavu kairave.

30 Mintiaveravata, vate tenavu vika naatarama kauro. Tenavu iqoka raquqi vivi, Hesaboni vatukavata Diboni vatukavata vehi autu taiqake, qaiqaa raquqi vivi, Medeba vatuka aumanto vai vatukara Nofainivata vehi autu taiqa kaunarave, ti.

Minti tivake ihi tura.

31 Ho Isareri vika Amo vatukanavu vare mini vaura.

32 Mini vauvaro viraqaahairo Mosiva vaiinti vonavu Jase vatuka ampeqama keha tavaate tiro, vinavuka nititomanta oru tavora. Viraqaahai Isareri iqoka raqiha Jase vatuka vare, vira tataaqa vau vatukaravata varora. Vika mintiake vareha Amo vatanaaka vi vatukaraqi vauka aru ntata komanta vurama.

33 Viraqaahai Isareri tuqantaavi Basaani vataini vu aarara avata vare vura. Vika mini oruntovaro Basaanihainaa King Okuva nai iqoka vaiinti ntita varero tuvuntero Isareri hampata Edarei vatuka vaunaini raqura.

34 Noravano Kotiva Mosirara tiharo, Ne kia King Okura aatu qetaate. Te ni kahaqiari ne vira aatarake, vira vatavata varevarave. King Sihoniva Hesaboni vatukaqi vaiharo Amo vatanaakaqaa raqiki vaira qoraiqama amitaantemake, ne viravata vohaa qarama amitaate, tiro.

35 Noravano Kotiva minti tumanta Isareri viva tuntemake, King Okuravata, ekaa vira maaqunavuvata, ekaa vira iqoka vaiintinavuvata aru taiqa kora. Aru taiqake viraqaahai Isareri vika vatavata varora.

<- Kaarantura 20 Kaarantura 22 ->