Link to home pageLanguagesLink to all Bible versions on this site

1 Ho tenavu vaantaavura vira taiqake, vaantaavura qenti, vo qenti vo qenti vaaviaramate, viraqaahai qentiqaa raqiki vaiintinavukave, ihi tikave, Rivaira ankuqihai Kotira kaiqa vara amitekave, vika vika kaama taunara.

2 Te taara vaiinti Ieruharemiqaa raqikiate ti, tenta qata Hanaanirave, iqoka vaiintiqaa raqikura Hananiaarave, vitanta noraiqama kaunara. Hananiaava Kotira aatu qeteharo avuqavu ni vaurara tiro, viva ni vau okarava uritarakero nai hana vaiinti hinikuka nu okararavata aatara kora.

3 Te vitantara tiha, Netanta timanta ekaa enta toqaqi vaantaavura qentinavu kiama vaaka qantuara karaiti, vaivaro kuarivano uruntero anomakero itainaraqaa qentinavu qantuara kaate. Kuarivano ruhunkireva inaraqaa qentinavuqaa raqikika qenti vinavura tintate, taurini tinte ainiravata veta vate, taiqake vuate. Netanta timanta mintiaqi vuate, tunara.

Te qaiqaa vitantara tiha, Netanta Ieruharemiqihai vaiinti vonavu kaama taimanta hininavu voqi voqi maimaraara raqiki vaimanta, hininavu nái naavu maaqa vainaini vi aniha maimaraara raqikiate, tunara.
Isareri vo vataihai orurante anuka vika nutu
4 Vi entara Ieruharemi vatukavano nora vaumantavata, kia airi vaiinti nahenti viraqi vaumanta kia airi naavu maaqavata viraqi kaqate vaura.

5 Mintuvaro Kotiva vo uva ti aatoqi vatomanta te vi uvara avateha ekaa vaiinti nahenti nutu vukuqi vainara tavaariraro vika nutu viraqi vairove kiae vairove tivake, vaiinti nahentive, vika nora vaiintinavuve, vo kaiqa vo kaiqaqaa raqiki vaukave, ekaa vika vika vohaaraqaa ruvaaquma kaunara. Te vo vuku varake tavauraro vi vukuraqi vo vataihai hoqare orurante ani Iutaini vau vaiinti nahentika nutu vaura. Vi vukuraqi vaiinti nahenti nutu vaireva maantima vaura:

6 Haaru King Nebukanesaava Iutaa vaiinti nahenti rumpa varero vuru nai maaqa Babironini kokaqihai maa vaiinti nahentika qaiqaa orurante Iutaa vataini, nái hoqare vau vatukara Ieruhareminive, vo vatuka vo vatukainive, ani vaura.

7 Vika qaiqaa ani vaumanta vika nora vaiintinavu Serubabelivave, Iosuaavave, Nehemiavave, Asariaavave, Ramiaavave, Nahamaanivave, Motekaiavave, Bilisaanivave, Misiperetivave, Bikivaivave, Nehumivave, Baanavave, vinavukavata vika hampata orurante anura.

8 Babironihai orurante anuka vika anku nutuvata, vika nampavata maantima vaura:

Parosira anku 2,172
9 Sefatiaara anku 372
10 Araara anku 652
11 Pahati-Moapira anku (Jesuaara vaintivaravata Ioaapira vaintivaravata) 2,818
12 Elaamura anku 1,254
13 Satura anku 845
14 Sakaira anku 760
15 Binuira anku 648
16 Bebaira anku 628
17 Asagaatira anku 2,322
18 Adonikaamira anku 667
19 Bikivaira anku 2,067
20 Adinira anku 655
21 Atera (vira vo autu Hesekiaara) anku 98
22 Hasumura anku 328
23 Besaira anku 324
24 Haripira anku 112
25 Gibeonira anku 95

26 Vika vika orurante anumanta vo vaiinti nahentinavuvata orurante ani haaru nai kaivaqaukavara vau vatukara, vo vatuka vo vatukaini ani vaura. Vi vatukara autuvata vaiinti nahenti nampaavata maantima vaura:

Betarihemi vatukavata, Netofa vatukavata 188
27 Ananoti vatuka 128
28 Beti-Asamaveti vatuka 42
29 Kiriati-Jearimi vatukavata, Kefira vatukavata, Berotira vatukavata 743
30 Raama vatukavata, Geba vatukavata 621
31 Mikimaasi vatuka 122
32 Beteli vatukavata, Ai vatukavata 123
33 Nebo vatuka nampa 2 52
34 Elaamu vatuka nampa 2 1,254
35 Harimu vatuka 320
36 Ieriko vatuka 345
37 Loti vatukavata, Haditi vatukavata, Ono vatukavata 721
38 Senaa vatuka 3,930
Vika vika vihai orurante vi vatukara vi vatukara mini ani vaura.

39 Kotira kaiqa vara amite vau vaiintika ankuqihai vo vaiintinavu orurante Ieruharemini anura. Vika anku nutuvata vika nampavata maantima vaura:

Jedaiaara anku (vika kaivaqava Jesuaara) 973
40 Imerira anku 1,052
41 Pasurira anku 1,247
42 Harimura anku 1,017
Vika vikavata vihai orurante Ieruharemini ani vaura.

43 Rivaira ankuqihai vaiinti vonavu vihai orurante Ieruharemini anura. Vika anku nutuvata vika nampaavata maantima vaura:

Jesuaara ankuvata Katmielira ankuvata (vi ankutanta kaivaqava Hodaviaava) 74
44 Kotira Naavuqi vaiha ihi ti vau ankuka vika kaivaqava Asaapiva 148
45 Kotira Naavuqaa maimaraara raqiki vau ankuka, Salumira ankuve, Atera ankuve, Talamonira ankuve, Akupira ankuve, Hatitaara ankuve, Sobaira ankuve 138
Vika vikavata vihai orurante Ieruharemini ani vaura.

46 Kotira Naavuqi qaqi kaiqa vare vau ankukaqihai vaiinti vonavu vihai orurante anura. Vika ankunavu nutu maantima vaura:

Sihaarave, Hasufaarave, Taboaatirave, 47 Kerosirave, Siaarave, Padonirave,
48 Lebanaarave, Hagabaarave, Salmairave,
49 Hanaanirave, Gidelirave, Gahaarave,
50 Reaiaarave, Resinirave, Nekodaarave,
51 Gasaamurave, Usaarave, Paseaarave,
52 Besairave, Meunimirave, Nefusesimirave,
53 Bakabukirave, Hakufaarave, Hahurave,
54 Basalutirave, Mehidave, Hasaarave,
55 Bakosirave, Siseraarave, Temaarave,
56 Nesiaarave, Hatifaarave.
Vika vikavata vihai orurante Ieruharemini ani vaura.

57 Haaru Soromonura kaiqa vaiintinavu vika nainti vo anku vo ankuvata orurante anura. Vi ankuka nutu maantima vaura:

Sotairave, Soferetirave, Peridaarave,
58 Jalaarave, Dakonirave, Gidelirave,
59 Sefatiaarave, Hatilirave, Pokereti-Hasebaimirave, Emonirave,
vika vikavata vihai orurante Ieruharemini ani vaura.

60 Kotira Naavuqi qaqi kaiqa varo vaiintikavata, Soromonura kaiqa vaiintinavu vika naintinavuvata, vihai orurante anu vaiintika vika 392 vaiintinavu vaura.

61-62 Vaiinti vonavu 642navu Tel-Mela vatukaihaive, Tel-Hasa vatukaihaive, Kerupi vatukaihaive, Adoni vatukaihaive, Ime vatukaihaive vihai vihai anura. Vi ankuka taaramo ankuqihai Delaiaara ankuve, Tobiaara ankuve, Nekodaara ankuve, vaura. Vika kia nái kaivaqaukavara nutu kankomake irurara ti, vika Isareri nái kaivaqaukavara okara numiqe aarava kia ho vaura.

63-64 Vo ankunavu Hobaiaara ankuve, Hakosira ankuve, Basalaira ankuve, vika tiha, Tinavu kaivaqaukavara Kotira kaiqa vara amite vau vaiintika vaurave, tuvarovata, vika kaivaqaukavara nutu kia vukuqi vaura. (Haaru Gileaati vatukaihainaa vaiinti vovano Basalaira raavura vara tero vaura. Vi vaiintiva nai airaavira autu naiqaa ntava tora.) Ho vika nutu vukuqi qumina ranta tavovaro kia vaumanta Isareri nora vaiintinavu vika qioqamate tiha, Nenavu kiama ho Kotira kaiqa vara amitevarave, tura.

65 Vika minti tuvaro kamaanira avuhainaava vivavata tiharo, Kotira iha quara amite kararavata nenavu kia ho nevarave. Nenavu vaivaro naantiara Kotira kaiqa vara amite vaina vaiintiva, viva Urimi Tumimi [a] okara kankoma kero tavairava vairera, vi vaiintiva ninavu uva homa avuqavuqama nimitaanarove, tura.

66 Ho ekaa Isareri rumpa vare vuru konaihai orurante anuka vaireka, 42,360 vaiinti nahenti vaura.

67 Vika mintima vaumanta vika kaiqa vaiinti nahenti 7,337 vaumanta vika ihi tiva nimite vauka 245 vaura.
68-69 Vika ohi 736 vauvaro kameri 435 vauvaro vika donki 6,720 vauvaro vika mulivata 245 vaura. † muli vaireva, vira qova donkivano vaivaro vira nova ohi vaira. English = mule

70-72 Kotira Naavu qaiqaa kaqerara iriha airi vaiinti nahenti maantimake monuve, vo haika vo haikave, ruvaaquma kora:

Kamaanira vaiinti avuhainaava:
kori ori vira maaravano 8 kilo
kori oriqohai aututo tanura 50navu
Kotira kaiqa vara amite vau vaiintika utavaaqa 530navu.
Vo anku vo anku vika nora vaiintinavu:
kori ori vira maaravano 168 kilo
silvaa ori vira maaravano 1,250 kilo.
Qaqi vaiinti nahenti:
kori ori vira maaravano 168 kilo
silvaa ori vira maaravano 140 kilo
Kotira kaiqa vara amite vau vaiintika utavaaqa 67navu.
Mintimake Kotira Naavuara iriha vi haikara vi haikara ruvaaqumake vatora.

73 Ho Kotira kaiqa vara amite vaukave, Rivaira ankuqihainaukave, Kotira Naavu qentiqaa raqiki vaukave, Kotira Naavuqi qaqi kaiqa vare vaukave, ihi tiva nimite vaukave, Isareri hini vaiinti nahentive, vika vika nai vatuka nai vatukaini orurante ani vaura.

<- Nehemia 6Nehemia 8 ->