7
Mi 144,000 bu Israel
1 I murien ine, o nga pare ba angelo voveit gituo ta nga tuir siba tangatson voveit mi kaber. Gituo nga por vangvangasie ba mata mour voveit simi kaber, terengien va mi mour ta kap mang uvie mi kaber ma mi barateis ma bu ei. 2 Samo o nga pare mi angelo mene ta nga kien kuvu simi korot mi matanias ta rar tsour en. A nga poro mi totourkilal se Raban ian ta tino. Ma a nga koup ngeisngeis rakot siba angelo voveit ese e Raban ta nga teir ngeisngeis segituo nia tsang vatsakatie mi kaber ma mi barateis. 3 A nga koup ven ne, “Kian va nga ta tsang vatsakatie mi kaber o, mi barateis o, ka ei, tuir oit gei ta terie ka totourkilal i matadigie ian ta tourtelekiran va egie ken sar petspets magiet Raban.” 4 Ma o nga rongomie mi aesaes kokouk simi kulou gi ta suvu totourkilal, a nga oit mi 144,000 i kotubuon bu matabu kokouk sibu Israel.
5 Io, mi 12,000 kulou simi matabu se Iuda gi nga suvuon mi totourkilal,
ma simi matabu se Ruben, mi 12,000,
ma simi matabu se Gat, mi 12,000,
6 ma simi matabu se Aser, mi 12,000,
ma simi matabu se Naptali, mi 12,000,
ma simi matabu se Manase, mi 12,000,
7 ma simi matabu se Simeon, mi 12,000,
ma simi matabu se Levi, mi 12,000,
ma simi matabu se Isakar, mi 12,000,
8 ma simi matabu se Sebulon, mi 12,000,
ma simi matabu se Iosep, mi 12,000,
ma simi matabu se Beniamin, mi 12,000.
Mi bineit leong gi nga tsekie bu tsetseik puneits
9 Ma i muir sien, i aron ine mi baidendeng ta nga tsorubeit seou, o nga pare mi bineit leong ian a kap ka mene va a nga oit nia ase mi aesaes kakakuon segie. Ine mi bineit, gi nga kuvu sibu vuna enamon kokouk, sibu matabu kokouk, sibu suasua da kuirkuir, ma sibu suada vuna nama. Gi nga tuir i matan mi mogomogos ni vuor ma i matan mi Natu sipsip. Gi nga tsekie magi sar tsetstseik kuar puneits, ma sibu rimagie gi nga poro bu pakapaka bebei. 10 Ma gi nga koup ngan mi ien leong ven ne,
“Mi vavato a kuvu si magiet Raban
ese ta mogos i popon ken mogomogos ni vuor,
ma a kuvu simi Natu sipsip.”
11 Ma bu angelo kokouk gi nga tuir viririsie mi mogomogos ni vuor meie bu komosi ka ni tsientsang ma ba vinagoso voveit ian ta tino. Gi nga sege pukupukukaek i matan mi mogomogos ni vuor nge rengeir rakot se Raban. 12 Gi nga pevien,
“Amen!
Mi tietienengei ma mi matvinavaso
ma mi banga vienviendon ma mi ni vuot kalei ma mi minangarei
ma mi ngeisngeis ni vuor ma mi ngeisngeis
ta mon rovoriu si magiet Raban.
Amen!”
13 Ma samo mi mene segie bu komosi ka ni tsientsang a nga vereie iou, “Ine mi bineit gi ta tsekie bu tsetstseik kuar ian ta puneits, egie ese mune? Ma ivie gi nga kuvu en?”
14 Ma o nga kuil nama, “Mi ka leong, evoi ngas e telekira gie.”
Ma a nga pevien, “Ine mi bineit arie egie ese gi tate nga rovotsour vekenan mi vinekikin leong. Ma gi nga suruvie magi sar tsetstseik nge vara puneits nge gie ngan mi daran mi Natu sipsip. 15 Surie ine mo,
“gi tuir i matan ken mogomogos ni vuor.
Ma sibu rosisiat ma sibu rokati gi ko tsatsang sien i aron ken vona rengeir.
Ma eie ese ta mogos si ken mogomogos ni vuor, eie ta kuva gie ngan mi minoruvien.
16 Ma gi ta kap ba buer vitor.
Ma gi ta kap ba buer moruo.
Ma mi matanias ta kap ba buer rapa gie.
Ma ka kepineits rarap beitsak ta kap ba buer asuo gie.
17 Simi vunan, mi Natu sipsip ese ta mon i kutum si ken mogomogos ni vuor, ta tsorubeit mi ka nennei segie malan mi ka nennei sipsip.
Eie ta kir terie gie simi matada ni tino ian ta kilikilivueit.
Ma e Raban ta dou vopura kegi sar dunutina kokouk sibu katsomatagie.”
<- PUEK VASANGAN 6PUEK VASANGAN 8 ->