1 O lalaron va nga ta onvidit ngan kong sar nama misasien o ta vokokotie bu nama ian ta malan va bu namani be. A tuktuk nga te onvidit nge iou. 2 O teir putan kong vienviendon surie nga malan mo e Raban ta teir putan ken vienviendon surie mi kuoluon. Nga malan mi vevien vour ese ta kap ngas telekire ka, ma o nga vouo nge nga ngan mi ka kes, eie e Karisito. 3 Eiekesen o moungmoung va bu vinavinadodonga ta masi kor sorvekenan kenga sinavei nia teir putan kenga sar tino se Karisito ngan mi sinavei ian ta tuktuk ma a melemelen, malan mo e Iva ta nga rorong si ken nama binit ian mi tsotsoi. 4 Nga ko sunurie mi siger mei nia me vavatei, misasien va ta me vavatei ngan ka Iesu mene ian ta kekineits se Iesu gei ta vateie nga ngan o, ka moromoruo mene ian ta kekineits simi Moromoruo Tamat nga ta nga suvuon o, ka suada banga vinavatei mene ian ta kekineits simi Banga Vinavatei nga ta nga vodovodon tuktuk sien. 5 Eiekesen o kap vodon va o lili segie bu ‘aposol asna’. 6 Misasien o ta vakokoit batbat, o telekiran misa o ta vokokotie. Io, gei nga ko munu vakatsepa nga ngan ine mi kepineits sibu rosar kokouk.

7 O kap nga por man voirvoir sien o ta nga vateie nga ngan man Banga Vinavatei e Raban. Ma o nga vilikitie iou nia tsuok terie nga i kur. Vasa, ine mi sinaviung, a vasangan va o te nga tsana mi sinavei tsokor? A kap. 8 Sien o ta nga me tsatsang i kotubunga, bu vona rengeir mene gi nga vorie iou. Io, o nga pure gie nieng nia me tsatsang tuvuon senga? 9 Ma si kong sar pinat simi tino i aron kong minon meie nga, o kap nga puputungie ken tino ka mei senga. Bu kasigei kuvu i Makedonia gi nga me vaotie kong sar pinat. Ma sibu kepineits kokouk, o te nga vuortie kong tino va o ta kap mang nga puputungie kenga sar tino, ma o ta tsana malan ngan buer. 10 Surie mi tuktuk se Karisito a to i aroung, o ta kap oit nia maes nia pouts vakam ngan ine i aron mi enamon leong i Akaia. 11 Nge kia va o pevien malan ine surie o kap tovie nga? A kap, e Raban a telekiran va o tovie nga! 12 Eiekesen, o ta vor ve tsanatsana misa o ta tsana ine, terengien va o ta mang tsang rivie mi vunan mi sinavei ni pouts vakam segie mi kulou ese gi ta lalaron mi kientsep nia tsorubeit venvenioit meie gei simi tsientsang gi ta ko pouts vakam ngan. 13 Ine mi kulou egie bu aposol bitbit ma egie mi kulou tsiktsik pipius ngan kegi tsientsang. Gi si vurisan egie kesegie nge tsorubeit malan ken aposol e Karisito. 14 O kap kudier, simi vunan e Satan buer a ko vurisan eie kesen nge tsorubeit malan mi angelo simi berber. 15 Io, a kap ka kepineits nia kudier ngan sien va ken sar petspets gi ta vurisa gie kesegie nge tsorubeit malan bu petspets simi sinavei duis. Si man votovoto kegi tino, gi ta ba so suvuon misa ta sogove bu sinavigie.

16 Malan o tate muna vokokotie, o kap lalaron va ka mene ta vodon va eou mi be. Eiekesen sien va nga ta vodon va eou mi be, ta kalei va nga ta rorong seou malan va nga rorong si ka be, terengien va o ta be ki vakokoit vakam. 17 Si kong sinavei nia pouts vakam meie ngan mi aor ngeisngeis, o kap vakokoit malan mi Nguts ta vakokoit, eiekesen o vakokoit malan mi be. 18 Ma sien bu mene palan gi pouts vakam vemusurie mi tino simi kaber, eou buer o ta pouts vakam malan! 19 Enga nga sievei nieng? Nga ko res nge terie nga nia rorong sibu namani be. 20 A tuktuk, nga ko terie nga mo misasien va gi ta vara petspets nge nga, o, bit kisie kenga sar kepineits, o, pure nga, o, kakaleong nge nga o, pantsie bu piringa. 21 Tavakier nieng o mengemengeir nia pevien va egei gei kap nga ngeisngeis oit nia tsang malan ngan ian.

Eiekesen misana suada kepineits gi ta lalaro pouts vakam ngan, eou buer o oit nia pouts vakam ngan. Tavakier nieng o te buer vakokoit mala be. 22 Vasa, egie bu Iburu? Eou buer mi Iburu. Vasa, egie bu kangi Israel? Eou buer mi kangi Israel. Vasa, egie gi tubunien e Abaraam? Eou buer o tubunien e Abaraam. 23 Ma vasa, egie ken sar petspets e Karisito? O vakokoit malan va eou mi be rovoriu, eiekesen eou ken banga petspets e Karisito rio gie. O nga tsatsang ngeisngeis beitsak te. Ma o nga mon i aron bu vona vinatoreis palan bu ra. Gi nga tsatsakie iou ngan mi belibelits palan bu keipkepide ra. Palan bu keipkepide ra, o nga vatvatta mesei. 24 Ba keipkepide ra napaririem, bu Iuda gi nga tsatsakie iou ngan mi belibelits mi aesaes a nga oit ba sinangavur ma mi napaririem potsu voveit (mi 39). 25 Ba keipkepide ra tour, bu Roma gi nga tsatsakie iou ngan bu poko ei. Mi keipkepide ra kes, bu mei mene gi nga tome iou nge vout. Ba keipkepide ra tour, gei nga luluis ngan mi mon, io, mi ra kes sien ian ba keipkepide ra tour o nga mon i aron mi barakatsep mi rosisiat ma mi rokati. 26 I aron kong sar vineis palan, o nga samvesuei meie bu tsienakor sibu da gi ta nga taev ma meie mi kulou kenken. O nga samvesuei meie bu tsienakor si kong sar nama kes meie buer bu Kibang. O nga samvesuei meie mi tsienakor i aron bu taon leong, sibu korot beir, ma simi barateis ta nga tsokor. Ma o nga samvesuei meie mi tsienakor sibu mei gi ta nga pevien va egie mi kulou vodovodon tuktuk eiekesen a kap. 27 O nga tsatsang ngeisngeis beitsak ma o kap nga por minuang kalei sibu rokati palan. Ma palan bu keipkepide ra, o nga vitor nge moruo ma o nga mon sibu ra palan meie kap ka nginonginou. Palan bu keipkepide ra, o nga dendeir ngan mi tinuong simi vunan o kap nga suvu lavlav. 28 Ma i popon ine bu kepineits, kong vienviendon a nga ko putu surie mi kulou vodovodon tuktuk kokouk. 29 Sien va ka mene a kap suvu ngeisngeis, eou buer o ta kap suvu ngeisngeis. Sien va ka mene ta vokorongie ka mei simi sinavei tsokor, mi aroung ta ngang tamtuir veie.

30 Sien va o ta ngas pouts vakam, o ta pouts vakam ngan mo bu kepineits ian ta vutuir vasangan bu bienangaev ivie o ta kap suvu ngeisngeis en. 31 E Raban a telekiran va o kap bit. Ma e Raban eie e Taman magiet Nguts e Iesu, ese mi tietienengei ta ngas rakot sien sibu ra bu ra. 32 Sien o tate nga mon i Damasko, mi gavana i pakien mi kovakova ka leong e Areta, a nga terie mi kulou ni minakiur sibu matavanuo rumrubukien simi taon nia rakopie iou. 33 Eiekesen bu polopoloung gi nga vunurie iou ka simi mat simi oiroir ngan mi leke ma o nga vi sorvekenan.

<- 2 KORINTO 102 KORINTO 12 ->