1 O oeng ngeisngeis sevoi. I muan va e ta tsana ka kepineits mene, e ta ngas vengeis nia no rakot se Raban va ta teir vaotie kegi pinat bu mei kokouk, ma e ta ngas no surie bu mei mene, ma e ta ngas tuir nia tourtelekiran bu mei kokouk nge no surie gie, ma e ta ngas vuot kalei se Raban surie mi sana kienlei ta nga tsana sibu mei kokouk. 2 E ta ngas no surie bu kovakova ka leong ma egie ese gi ta muomuo, terengien va kegiet mienagos ta mang menemenen ma ta suvuon mi molu sien giet ta rangarie e Raban ngan mi minangarei. 3 Ine mi suada sinavei, eie a kalei ma a varese e Raban kegiet ka ni vavato. 4 E Raban a lalaron nia vatoa mi kulou kokouk ma a lalaron va gi ta me telekiran mi tuktuk. 5 Mi Raban a kes mo ma mi ka ta tuir i kutum a kes buer i kotubuon e Raban ma mi kulou. Ine mi ka arie e Karisito Iesu, 6 ese ta nga tsupuk rivie ken tino nia voir muerngan mi kulou kokouk. Ine arie mi vinakokoit katsep e Raban ta nga terie duis si man keipkepide ra. 7 Arie mi vunan e Raban a nga vile iou va eou mi ka ni vavatei ma mi aposol. O oeng tuktuk, o kap bit. A nga vile iou va o ta vavasengei sibu Kibang surie mi vodovodon tuktuk ma mi tuktuk.
8 Io, o lalaron va bu ka sibu enamon kokouk ese kegi tino ta tamat, gi ta tsuok terie i kur bu rimagie nia vasangan mi minangarei rakot se Raban nge no. Sien gi ta no, gi ta ngas ketseketseng sorvekenan mi sinavei ni petseir o, vevetsuar.
9 O lalaron va mi langei gi ta vavaso kalei mo ma mi baidendeng si magi sar vinavaso ta matmatot, ma gi ta kap vavalos ngan mi pal vuruvuru kov o, mi gold o, mi reamon, ma bu lavlav man lakep ta leong. 10 Eiekesen gi ta ngas vavaso ngan mi banga sinavei ian ta sogove mi langei ese gi ta pevien va gi ko rengeir rakot se Raban.
11 Mi vevien ta ngas rorong susuir sibu vinasengei ngan mi sinavei menemenen. 12 O kap sunurie va ka vevien ta vavasengei o, ta vuortie mi ka. Eie ta ngas mon menemenen. 13 Simi vunan e Raban a nga muna tsana e Adam ma i muir e Iva. 14 Ma a kap va e Adam a nga muna kor simi binit, eiekesen mi vevien arie eie a nga muna kor ma a nga tsorubeit mi mei tsokor. 15 Eiekesen mi langei gi ta suvuon mi vavato sien va gi ta tino ngan mi vodovodon tuktuk, ma mi tentoiv ma mi tino ta tamat, meie mi sinavei nia vuor vakalaie kegi sar lalaron, simi vunan gi ta kakkav.
