KITABU KYA

MAPINDA
BULONDOLOZI
Kitabu kya Mapindani mukolonghano wa bulanzi bwa mulangue wakua Solomoni. Bakalemba bengi ba-ampeene nakue ni kulundapo mapinda, inzi Likolo Solomoni mwana mwalalume mwina likolo Daudi i waalembelemo mapinda engi. Solomoni waali wamanikile pa mulandu wa mulangue wakue, ni 1 Makolo 4.32 mulandile nangue Solomoni waalembele mapinda 3,000. Ni pakako, twebo twingi twa mu keki kitabu kya mapinda twaalembelue Solomoni lu-aali wakikosele mu elia myaka 1,000 NK. Tunge twebo twa mu keki kitabu, tuli nga twaali twalembua ni kukolonghaniiwa pa musita waali wateeka Hezekia mu kyalo kya Yudea kutula mu mwaka wa 715 kwita mwaka wa 686 NK (Mapinda 25.1).
Mapinda, ni bulanzi bwa mulangue buli ni kisinka kiinekiine, inzi bupuseneko ni bulayo ao bukabika. Kipalo, Mapinda 22.6 mulandile nangue Sambilizia mwana nzila i apalile kukonka, pantu anzia akakota takafumamo. Anzia kili evio, aza mapinda te bulayo bwakwana nangue tekuli kintu kisikavinda kukitika ao kwinooneka mu bwikazi bwa mwana waakuziiziwe mu nzila ipalile. Ni pakako, aza mapinda ni nsokezi iweme imaniine pa bintu bya kisinka. Kitabu kiine kya Mapinda kilandile kikata kya mapinda mu katue ka 1.2-6. Kikata kya aza mapinda ni kukwasia babipuba ni balumendo kuti baye bali ni mulangue, ni nsokezi iweme pamo ni kulengia balia bali ni mulangue bakile kuba ni mulangue.
Bwipi bwa bili mu kitabu kya Mapinda
1. Mu katue ka 1 kwita mu katue ka 22.16, ni mapinda akua Solomoni.
2. Mu katue ka 22.17 kwita mu katue ka 24, ni mikolonghano ibili ya twebo twa mulangue.
3. Mu katue ka 25 kwita mu katue ka 29, ni mukolonghano wa unge wa mapinda akua Solomoni. Aza mapinda aakolonghaniziwe na babombi bakua likolo Hezekia.
4. Mu katue ka 30 muli bulanzi bwakua Aguri.
5. Mu katue ka 31.1-9 muli bulanzi bwakua Lemueli.
6. Mu katue ka mpeleezio 31.10-31 mulondolwelue palua mukazi ali ni mibeele iweme.

Kikata kya Mapinda

1 [a]Mapinda akua Solomoni likolo wa Baizraeli, mwana mwina Daudi.

2 Aza mapinda i alialengia muntu kuba ni mulangue pamo ni masambilizio,

ni kumana ndubulwilo ya mukati,

3 Pamo ni kumusambilizia bikitua bya mulangue,

ni bya bulunghami, ni bya nsambu pamo ni biweme.

4 Kabili i aliapeela babipuba mulangue,

ni kupeela balumendo maano ni bukengezi,

5 Evi wa mulangue onvue ni kulundiluapo masambilizio,

akile kuya wali ni mulangue pamo ni nsokezi iweme,

6 Pakuti enike mapinda pamo ni bipalo,

ni kwinika bulanzi bwa balia bali ni mulangue pamo ni bitandiko byabo.

7 [b]Kumutiina Yawe i ntendeko ya maano,

inzi babipuba balibafuupula mulangue ni masambilizio.

Nsokezi ku balumendo

8 We mwana wane, unvua masambilizio akua so,

kabili tekufuupula mafunde akua noko.

9 Pantu alikuya ali ngala ya buwame ku mutue obe,

kabili nga mikufu mu mukosi obe.

10 We mwana wane, kine wabembua na bantu ba bibalo,

tekwitabila.

11 Kine balanda nangue, “Iza tuye nobe,

tuye tufyaminepo muntu umo asili na mulandu ni kumwipaya,

12 Tuye tubateleke bakosele nga vilivyateleka kilibu,

tubateleke balingi nga balia balibakookela mu kiina.

13 Tulikusanga bunonsi bonse bwa mponvu,

tulikwizuzia nghanda yetu na bintu bitulikupoka.

14 Ale iza wampane ni fwefue,

byonse bitulikupoka tulikukasana.”

15 We mwana wane, tekuba waenda pamo nabo,

kaania lukasa lobe tekuti luye lwapita molia mubalibapita.

16 Pantu makasa abo aliakundukila ku bubi,

kabili tebezi kukokola kuzuumia mulopa.

17 Pantu bukila bulibwateiwa tooni twamwene,

bwa mpuni.

18 Baba bantu balibabenza mulopa wabo bene,

balibafyamina bukose bwabo bene.

19 Evi i vili mibeele ya bantu balibatokamua bunonsi bwa bupompo,

bupompo bulibwaputukizia bukose bwabo.

Mulangue wakuuta

20 [c]Mulangue aliwasamuna mu kisaakaanino kya bantu,

aliwasamuna lizui lyakue pa kisisiizio.

21 Aliwapunda mu mampetompeto,

pa milyango ya kwingililamo mu muzi, aliwalanda.

22 “Mwe basili na maano! Mwaakaba mwatonenetonene sie kusiba na maano?

Mwe ba mufuupula! Mwaakaba mwawamiinuewamiinue sie kufuupula?

Mwe babipuba! Mwaakaba mwasuulilesuulile sie maano?

23 Pilibuke pa mulandu wa nsokezi yane.

Unvue, nene ndikumipongwela Mweo wane,

ndikumibwila masambilizio ane.

24 Inzi nakimikuuta, ni mwe mwakaana kwitaba,

nakimyolwela kuboko kwane, temwakipoozako maano,

25 Mwakipuulula nsokezi yane yonse,

ni kukaana mwano wane,

26 Ni nene wenka naakaseka pa musita wa busanzo bwenu,

naakamipunika musita waakeeza maavia,

27 Lubebue palukamifikila nga mwela ukata,

ni lwinoono palukamifikila nga mulula,

ni pamukafikilua na busanzo ni misa.

28 “Pabakankuuta, nsikaba-asuka.

Baakankeba inzi tebakan'mona.

29 Pantu bakisuula maano,

kabili pantu tebakisaakula kumutiina Yawe.

30 Bakisuula nsokezi yane,

bakifuupula mwano wane.

31 Ni pakako, bakaba kuya balia mazabo a mu bikitua byabo,

ni kwikuta nsokezi yabo bene.

32 Pantu misango ibi ya bupuba yaakabeepaya,

balia balibatwalilila mu bupuba, bwaakabeenoona.

33 Inzi muntu aliwantwilizia wakaba kuya waikeele mu mutende,

kabili wakaba kuya wateekameene pasili kutiina bibiipile.”

MAPINDA 2 ->