1 [a]Bobo busiku baabelengele kitabu kyakua Musa ni bantu batwiliziizie, mu kitabu baasangile mwalembelue nangue Ba-amoni ni Bamoabu tebapalile kwingila mu kulonghana kwa bantu bakua Leza, 2 [b] pantu tebaabapokeleele Baizraeli ni kubapeelako bilio ni menda, inzi baamulipile Balama kuti abatiipe, anzia kyaali evio, Leza wetu wa-alwile ntiipu yabo kuba mapaalo. 3 Bantu lubaunvwile ezi mizilo, baafumiizie Bazima bonse mu Baizraeli.

4 Ntanzi, kitambua Eliasibu waabiikilue pa mwilo wa kusunga milue ya mu Nghanda yakua Leza wetu. Ozu Eliasibu waali wa mu mukowa wakua Tobia, 5 Kabili waali wamukitiile Tobia muputule ukata ubaali babiikamo kamo ka pa lyanondo ka bunga pa ozo musita, ni bubaani, ni bibombelo bya mu Nghanda yakua Leza, ni kamo ka pa lyanondo ka pa nghano, ni bupe bwa bya kumina, ni bwa mafuta, bintu byaali byafumiiwa na Baizraeli pa mulandu wa Balawi, ni bakemba, ni bakalinda ba pa milyango, pamo ni bupe bwa babitambua. 6 Pa ozo musita onse waali wakitika bebio, ne nsyaali ku Yeruzalemu, pantu mu mwaka wa 32 mu kuteeka kwakua Artasasta likolo wa ku Babeli, naabwelele kuli likolo. Pa kyamba naalombele nsambu kuli likolo 7 ni kubwelela ku Yeruzalemu. Koko i kunainikile bubi bwaakitile Eliasibu bwa kumupeela Tobia muputule mu misolo ya Nghanda yakua Leza. 8 Naafiitilue sana. Ni pakako, naapoozele bintu byonse byakua Tobia panze pa ozo muputule. 9 Pa kyamba naabiikile lifunde lya kuswesia miputule, kabili naabweziizie bibombelo bya mu Nghanda yakua Leza, pamo ni ngelelo ya nghano ni bubaani.

10 [c]Kabili naamwene nangue Balawi tebaali bapeelua kabili nsempu yabo. Ni pakako, Balawi ni bakemba baali babomba, baabutukile kubalua muntu waya ku kulima bukaba bwakue. 11 Nene naasasiliile bakateeka nalanda nangue, “Ale Nghanda yakua Leza yasiiluaki?” Naabakolonghaniizie ni kubabwezia pa miilo yabo. 12 [d]Bayuda bonse baaleetele kamo ka pa lyanondo, ni bupe bwa nghano, ni bya kumina, ni mafuta mu mulue. 13 Bantu banaasaakwile kuba bakalinda ba mulue ni baba: Kitambua Selemia, ni kalemba Sadoki, ni Mulawi Pedaia, Hanani mwina Zakuri, Zakuri mwina Matania i waali nkonkani wabo, pantu baba i baali bamwenue kuba ba kisinka, ni miilo yabo yaali ya u byabupe ku Balawi nabo.

14 We Leza wane nanguluke pa ozu mulandu, kabili tekulaba bikitua byane biweme binaakitiile Nghanda yakua Leza wane ni miilo inaali nabombamo.

15 [e]Mu ezio nsiku naamwene Bayuda bange baali bafina bya kumina busiku bwa Sabata, ni bange baali batwama bitwamo, ni kutwika bapunda nghano, ni divai, ni mizabibu, ni tini, pamo ni misango yonse ya bitwamo bibaali batwala ku Yeruzalemu busiku bwa Sabata. Ni nene naabasokele nangue tebali na nsambu ya kusisia mu bobo busiku. 16 Kabili ni balia baafumine ku Tiro bekeele mu Yeruzalemu baaleetele masabi, ni busulu bwa misango yonse balimukusisia ku Bayuda mu Yeruzalemu busiku bwa Sabata. 17 Nene naasasiliile bakulu ba Bayuda nabaana nangue, “Ale bobu bubi bumulimukukita bwa kutiikaania busiku bwa Sabata ni bwa musangoki? 18 Kubako basiinue tebaakitilepo bintu bya ozu musango pakuti Leza wetu aleete busanzo pali fwefue, ni pa ono muzi? Mone vimutwaliliile kuleeta bwavia pa Baizraeli pa mulandu wakutiikaania busiku bwa Sabata.”

19 Ni musita wa kyungulo lupaali pasyafiita, naalandile kuti milyango ya Yeruzalemu iizalue ntanzi ya kutendeka busiku bwa Sabata, tekuti iizulue mpaka Sabata paikaba kupua. Naabiikile bange ba pa babombi bane mu milyango ni kubaana nangue mu muzi tekuti mwingiziwe makwebo a misango yonse busiku bwa Sabata. 20 Ni pakako, basulu ni balibasita misango yonse ya bintu mu nsiku imo imo baali baaleele panze pa muzi. 21 Naabasokele nangue, “Ale kimulimukulaalila panze pa muzi ni kiki? Kine mukabe kukita kabili evi vyenka, nakaba kumyuma.” Kutula papo tekuli muntu waabwelele kabili busiku bwa Sabata. 22 Naabaanine Balawi beswesie ni kuya kulinda milyango pakuti busiku bwa Sabata buzuukiwe.

We Leza wane nangulukeko palua ozu mulandu, kabili ungeleele kukonkana ni bwingi bwa ntono yobe.

23 [f]Mu ezio nsiku naamwene Bayuda baali baupile banakazi ba ku Ashdodi, ni ba ku Amoni, ni ba ku Moabu. 24 Nsempu ya baana baavyelue na baba bantu, baali balanda lulimi lwa Ba-asidodi, ni ndimi ya bange bantu. Inzi tebaamanine kulanda lulimi lwa Kiyuda. 25 Naabasasiliile ni kubatiipa, ni kunakulapo bamo pakati kabo, ni kubavukula misisi yabo, ni kubalapizia mu Liina lyakua Leza nangue, “Tekukoofie baana benu banakazi ku baana babo balalume, ni baana benu balalume tekuti bakoope baana babo banakazi, ni mwe benka tekuti mukakite evio. 26 [g]Eba, te byupo bya ozu musango byaamulengiizie Solomoni likolo wa Baizraeli kuti aluvie? Mu byalo byonse temwaali likolo nga wene, kabili waali watonenue na Leza wakue, ni Leza waamubiikile kuba likolo pa Baizraeli bonse. Anzia kyaali evio, banakazi baeni i baamulengiizie kuti aluvie. 27 Ati emwe, i kulanda nangue mutonene fwefue tukonke mibeele yenu ni kukita bubi bukata bwa ozu musango, bwa kusinakila Leza wetu mu kuupa banakazi Bazima?”

28 [h]Umo wa mu baana bena Yoyada, mwinzikulu wakua Eliasibu Kitambua Mukulu, waali waupile mwana mwanakazi mwina Sanibalati wa mu muzi wa Beti-Horoni. Naamukumbile mu Yeruzalemu.

29 We Leza wane, balangulukeko pantu bakitiikaania bukitambua ni kipingo kya bukitambua ni kya Balawi.

30 Evi n'mbaswesiizie babitambua ni Balawi ku bintu byonse bifumine ku Bazima, ni kubapeela kubalua muntu mwilo wakue u-apalile kukita. 31 Naabaanine kuleeta bupe bwa nkuni, ni buzombozi bwa ntomono pa musita upalile.

We Leza wane nanguluke pa bebi byonse ni kunkitila biweme.

<- NEHEMIA 12