1 Inzi Yona taawaamiinue, waafiitilue. 2 [a]Yona waamwanine Yawe nangue, “We Yawe, evi te i vinaalandile lunaali nakili mu kyalo kyane? Ni pakako, i kyaalengele kuti nenge n'mbutukile ku Tarsisi, pantu naamanine nangue wewe uli Leza wa buwame, ezuzi nkumbu, asiliwalenga kufiitua, wa kyonko, aliwaibwelamo mu kukanda bantu babi. 3 [b] Ni pakako, we Yawe, nakulomba ungipaye sie, pantu kyawama kuti nfue kukila kuba mukose.”

4 Yawe waamwanine evi, “Teuli na nsambu ya kufiitua.”

5 Kupwako, Yona wafuma mu muzi waya kwikala lya ku kabanga ka muzi, wakuula mutuule ni kwikala mu bulelo amone kilikukitika pa ozo muzi. 6 Yawe Leza waameniizie musila ni ku-ukuzia kuti umuleetele Yona bulelo pa mutue wakue pakuti bumupususie ku bulanda bwakue. Yona waawamiinue sana na ozo musila. 7 Inzi lukeele lwakue ku makia, Leza waatumine mufwinzi waafwinziizie musila, ni kuuma wauma. 8 Koba lukaaselele, Leza waatumine mwela ubi kufuma ku kabanga. Koba kaamusaamiine Yona pa mutue. Yona lu-aali wasyaumiine kupenzuka, waali wasyapupila sie alenge afue. Waalandile evi, “Kufua kwawama kukila kuba mukose.”

9 Leza waamwipuziizie Yona, “Ati, wakita bwino kufiitilua ozu musila?” Wa-asukile nangue, “Nakita bwino kufiitua, kine kufua nfue sie.”

10 Yawe waamwanine evi, “Wewe waunvwilanga nkumbu musila u-usimeniizie ni ku-ukuzia, ozo wakimena busiku bumo ni kuuma busiku bumo. 11 Eba, ale nene i alikwandua kunvwila nkumbu muzi ukata wa Ninawe ulimo bantu bengi kukila pa 120,000 basili na buvinde bwa kwinika biweme ni bibiipile, kabili mwali ni nama ingi iteekelue?”

<- YONA 3