KUTENDEKA 48

Yakobo wapaala Manase ni Efraimu

1 Pa kyamba kya nsiku, muntu umo waamubwilile Yusufu nangue se Yakobo alwele ku Goseni. Kupwako, Yusufu watwama baana bakue, Manase ni Efraimu, baya. 2 Lubaafikile, muntu umo waamubwilile Yakobo nangue, “Mwana obe Yusufu waiza,” Izraeli waikoseleziizie, wabuuka ni kwikala pa bulita. 3 [a]Yakobo waamwanine Yusufu nangue, “Leza wa Maka onse lu-aan'mwenekeele ku Luzi mu kyalo kya Kanaani, waan'mpaalile. 4 Wanghanine nangue, ‘Naakakuvuzia ni kukusandulula, kabili naakakukita kuba libumba lya ntundu, ni pa kyamba kyobe, nvyalo yobe naakaipeela keki kyalo kuba bupyani bwabo lonse.’

5 “Ni evi baba baana babili bawaavyaliile mu Misri lunaali nsinaize kuli wewe, ni baana bane. Efraimu ni Manase baakaba bane nga Rubeni, ni Simeoni. 6 Inzi baana bawaakavyala pa kyamba kya baba, baakaba bobe, ni bupyani bwabo bwaakaba kuli Efraimu ni Manase. 7 [b]Nakita evi pa mulandu wakua noko Rakeli waafwiliile mu Kanaanni pepi ni Efura lunaali nalimukufuma ku Padani-Aramu. Naamuziikile mu Kanaani mumbali musebo ulungi ku Efura.” (Eno nsiku Efura i Betlehemu).

8 Izraeli lu-aamwene bena Yusufu waipuziizie evi, “Ale baba ni bani?”

9 Yusufu wa-asukile evi, “Baba ni baana bane banaapeelue na Leza mono mu Misri.”

Yakobo waalandile evi, “Ale bapalamike pano n'mbapaale.” 10 Menso akua Yakobo te aali amona pa mulandu wa bukote. Yusufu waamupalamikiile baana, Yakobo ni ye waabakwete ni kubakumbatila. 11 Izraeli waamwanine Yusufu, “Nsyaali naswapiile nangue twaakamonana kabili. Inzi evi Leza wan'mpaala namonako ni baana bobe.” 12 Kupwako, Yusufu wabafumia mu kyeni kyakua Izraeli. Yusufu waakontamiine pansi.

13 Yusufu waabakwete baana bonse babili. Efraimu ku kuboko kwakue kwa kulio walungheeme ku kuboko kuso kwakua Izraeli, ni Manase ku kuboko kwakue kwa kuso walungheeme ku kuboko kulio kwakua Izraeli ni kubapalamika kuli wene. 14 Inzi Izraeli waakilinghaniizie maboko akue, kuboko kulio wabiika pa mutue wakua Efraimu waali wali mwanike, ni kuboko kwakue kwa kuso wabiika pa mutue wakua Manase waali wali mukulu. 15 Yakobo waamupaalile Yusufu walanda,

“Leza waali watangiliile tawekulu Abrahamu ni tawe Izaaki,

Leza waali wanombwele mu bukose bwane bonse mpaka lenu,

16 olia malaika wan'mpususiizie mu maavia onse, abapaale baba balumendo.

Bakabe bakuutua mu liina lyane, ni mu liina lyakua tawekulu Abrahamu ni lyakua tawe Izaaki.

Bakakile kusanduluka mu kyalo kyonse.”

17 Yusufu lu-aamwene nangue se wabiika kuboko kwakue kwa kulio pa mutue wakua Efraimu, taawaamiinue. Ni pakako, waakwete kuboko kwakua se, wafumia pa mutue wakua Efraimu wabiika pa mutue wakua Manase. 18 Waamwanine se nangue, “We tawe, tekukita evi pantu mukulu ni ozu. Wene i wakuti ubiikile kuboko kobe kwa kulio pa mutue wakue.”

19 Se waakeene walanda nangue, “We mwana wane, n'manine kindimukukita. Manase waakaba mutundu ukata. Inzi mwalawakue waakaba mukulu kukila wene, ni nvyalo yakue yaakaba libumba lya ntundu.”

20 [c]Bobo busiku, Yakobo waabapaalile wabaana nangue ku ntanzi Baizraeli baakaba balombelana mapaalo balanda nangue, “Leza akupaale nga vi-aapaalile Efraimu ni Manase.” Yakobo waatangiziizie Efraimu pali Manase.

21 Kabili Izraeli waamwanine Yusufu, “Mona nene nsisyaumiine kufua, inzi Leza waakaba pamo nenu, kabili waakamilombola kuti mukabwelele mu kyalo kya babikolue betu. 22 Inzi wewe pantu uli nga mukulu pa ba kobe, nakulundilako nkendo imo pa nkendo inaapokele ku Ba-amori ku maka a kipanga ni buta bwane.”

<- KUTENDEKA 47 KUTENDEKA 49 ->