1 Pa ozo musita Yuda waasiile bakuluube ni kuya kwikala na muntu umo wa ku Adulamu liina lyakue Hira. 2 Yuda waamweneko mukazyana mwina Mukanaani umo liina lyakue Sua, waamuupile ni kukumana nakue. 3 Ozo mwanakazi waimitile ni kuvyala mwana mwalalume ni kumwinika Eri. 4 Kabili waimitile, wavyala unge mwana mwalalume ni kumwinika Onanu. 5 Lu-aimitile lya butatu, waavyele unge mwana mwalalume ni kumwinika Sela. Ozo mwana lu-aavyelue, Yuda wali ku Kezibu.

6 Pa kyamba, Yuda waakebele mwanakazi wa kuupua na mwana wakue libeli liina lyakue Eri. Ozo mukazyana waali wakuutua Tamari. 7 Inzi Eri, libeli wakua Yuda, waali wali mubi ku menso akua Yawe. Ni pakako, Yawe waamwipaile. 8 Yuda waamwanine Onanu, “We mwana wane, pyana ozu mwanakazi muka Eri evi umuvyalile wa kobe baana.” 9 Inzi Onanu waamanine nangue baana tebakaba bakue. Ni pakako, lu-aali walaala na ozo mwanakazi, waali waitilila mbezu ya buvyazi pansi watiina kumuvyalila wa kwakue baana. 10 Yawe taawamiinue na misango yaakitile Onanu. Ni pakako, ni ye waamwipaile. 11 Yuda waamwanine Tamari muka mwana wakue nangue, “Ikala mu bumukanfwilua mu nghanda yakua so wapembeele mpaka musita waakakula mwana wane mwalalume Sela.” Ki-aalandiile evio, waali watiina nangue Sela ni ye kuti wafua nga vyaafwile bakuluube. Kupwako, Tamari wabwelela ku nghanda yakua se.

12 Lupaapitile myaka ingi, muka Yuda, mwana mwanakazi mwina Sua, waafwile. Malilo lu-aapwile, Yuda ni kibuza wakue Hira wa ku Adulamu, baile ku Timuna kwaali kwatebulua mikooko yakue. 13 Muntu umo waile kumubwila Tamari nangue sevyala waya kutebula mikooko yakue ku Timuna. 14 Tamari waavuulile ngubo yakue ya bumukanfwilua, waikupa kitambala ni kwikala pa mulyango wa nghingililo ya muzi wa Enaimu waali mumbali musebo uwile ku Timuna. Waakitile evi pantu waali wamanine nangue Sela mwana mwalalume mwina Yuda waali wasyakulile, kabili pantu tanapeelue Sela kuba mulume wakue.

15 Yuda lu-aapitiile paali paikeele Tamari, waalangakeene nangue ozo mwanakazi waali wali mukambue pantu waali waikupile pa menso. 16 Waamukonkele mumbali musebo ni kumwana nangue, “Nene natona kuti ndaale nobe.” Taali wamanine nangue i waali muka mwana wakue.

Ozo mwanakazi waamwipuziizie evi, “Kine walaala ni nene ulikun'mpeelaki?”

17 Waamwasukile, “Nakaba kukupeela musoka wa mbuzi wa pa kisepe kyane.”

Mwanakazi waamwanine evi, “Ale kansi n'mpeele kikwatizi kya kuti nsyale nakio mpaka paukantumina ozo mbuzi.”

18 Mwalalume waipuziizie evi, “Ale ndikukusiila kikwatiziki?”

Mwanakazi waalandile evi, “Ulikunsiila kazele ka kumunue ni lwando pamo ni kabango kauliwaendelako.” Kupwako wamupeela. Lu-aaleele nakue, mwanakazi waimitile. 19 Kupwako, wabuuka waya, waivimbula kitambala kyakue ni kuvwala paakale ngubo ya bumukanfwilua.

20 Yuda waamutumine kibuza wakue Muadulamu kuti aye atwale mbuzi kuli ozo mwanakazi ni kupoka bintu bi-aasiileko, inzi taamusangile. 21 Waipuziizie bantu bamo ba ku Enaimu, “Emwe, olia mukambue waali waikeele papa mumbali musebo ali pi?”

Baamwasukile nangue, “Pano tetunamonepo mukambue.”

22 Waabweleele kuli Yuda. Waamwanine evi, “Nsyamusanghanga. Ni bantu ba koko banghananga nangue pano tetunamonepo mukambue.”

23 Yuda waalandile evi, “Muleke sie asyale ni bikwatizi. Tetutonene kusekua na bantu. Namutuminanga mbuzi, inzi we tewamusanghanga.”

24 Lupaapitile myezi itatu, muntu umo waizile kumubwila Yuda nangue, “Tamari muka mwana obe waakikita bukambue, kabili ali ni liimi lya mu bukambue.”

Yuda waalandile evi, “Ozo mwanakazi aziziiwe mu mulilo afue.”

25 Ozo mwanakazi lu-aali walimukutwalua, waatumine muntu umo kuli sevyala aye amwane nangue, “Nene nghimisiiziwe na mwine wa bebi bintu. Waalandile evi, ‘Nakulomba winike mwine wa kaka kazele ka ku munue ni lwando pamo ni kabango.’ ”

26 Yuda lu-aabiinikile, waalandile evi, “Ozu mwanakazi ali ni nsambu kukila nene, pantu nsyamupeele Sela mwana wane amuupe.” Ni pakako, taaleele nakue kabili.

27 Musita wakuvyala luwakumeene, kyaamwenekele nangue alikuvyala bampundu. 28 Misa luyaamukwete, mwana umo waafumiizie kuboko. Kinghombe waakakile nyunzi ya kasi ku kuboko. Waalandile evi, “Ozu i wa mambo.” 29 Inzi lu-aabweziizie kuboko, mwinakue waavyelue. Kinghombe waalandile evi, “Wewe i waizula nzila.” Ni pakako, ozo mwana wainikilue Perezi. 30 Mwinakue waakakilue nyunzi ya kasi ku kuboko lu-aavyelue, wainikilue Zera.

<- KUTENDEKA 37KUTENDEKA 39 ->