1 Yakobo lu-aali walimukubwelela kwabo, bamalaika bakua Leza baasaakeene nakue. 2 Yakobo lu-aamwene babo bamalaika waalandile nangue, “Leli i libumba lyakua Leza.” Ni pakako, pa ezio nkendo wainikilepo Mahanaimu.[a]

3 Yakobo waatumine mikenzi kuli mukuluube Esau mu Seiri, mu kyalo kya Edomu. 4 Waabalaiziizie wabaana baye balande nangue, “Mubombi obe Yakobo walanda evi, ‘We mukuluamwine, naile kwikala ni Labani nali mweni ezi myaka yonse, 5 ni evi naiza nali ni nghombe, ni punda, ni mikooko, ni mbuzi, pamo ni babombi balalume ni banakazi. Nalaizia evio naswapiile kwitabilua na we mukuluamwine.’ ”

6 Mikenzi yaizile kubwezia kapingu kuli Yakobo nangue, “Twayanga kuli mukuluubo Esau, ni ye alimukwiza kukupokelela wali ni bantu 400.” 7 Yakobo lu-aunvwile evio, waatoobokele ni kutiina. Ni pakako, waakasaniizie bantu ba-aali nabo pamo ni mikooko, ni mbuzi, ni nghombe, pamo ni nghamia mu mabumba abili. 8 Waalandile evi, “Kine Esau waiza kusakukila libumba limo, linge lilikupusuka.”

9 Kabili waamulombele Leza walanda nangue, “We Leza wakua tawekulu Abrahamu ni wakua tawe Izaaki, we Yawe wanghanine nangue, ‘Bwelela ku kyalo kyobe ni ku lupua lobe evi nkakukitile biweme.’ 10 Naikeefia ku buwame ni ku kisinka kyobe kiwaanangisiizie ne mubombi obe, pantu mwenzi wa Yordani naawabukile tekuba natweme kantu inga sie kabango, inzi evi nabwela natweme mabumba abili. 11 Nakulomba un'mpususie kuli mukuluamwine Esau, pantu natiina nkeeza kusakukilua, nene ni bakazi bane pamo ni baana bane. 12 [b]We Leza languluka bulayo buwandaile nangue waakankitila biweme ni kuvuzia nvyalo yane, ikabe yavulile nga musenga wa mumbali lyezi usili wavinda kupendua na muntu.”

13 Bobo busiku Yakobo waaleele penka papo. Kupwako, wabuulapo bimo pa bintu bi-aali nabio, evi amutwalile mukuluube Esau kilambu. 14 Waabuulile makota a mbuzi 200 ni tupwata 20 ni mikooko ikota 200 ni mpanga 20, 15 nghamia 30 yaali yaonsia pamo ni twana twabo, nghombe ikota 40 ni nghombe ndume lyanondo, punda ikota 20, ni punda ndume lyanondo. 16 Yakobo waakasaniizie bisepe, kubalua kisepe kyaali kyali ni musungi umo. Waabaanine basungi nangue, “Ale abuke mwenzi muntangilile, kubalua kisepe kiye kyaenda kyalekenkeene ni kinge.” 17 Yakobo waamwanine mubombi wa mambo nangue, “Esau pa-aya kusaakaana nobe ni kwipuzia nangue, ‘Wewe uli muntu wakua ni? Kabili ulimukuya pi? Ni ezi nama ikutangiliile ni yakua ni?’ ” 18 Uye umwane nangue, “Ezi nama ni yakua mubombi obe Yakobo. Wene wamutumina selenzi Esau. Inzi Yakobo alimukwiza pa kyamba kyetu.” 19 Evi i vya-anine ni musungi wa bubili, ni wa butatu, ni bange basungi ba bisepe. Evi i vyakuti muye mulande pamuya kusaakaana ni Esau. 20 Kabili muye mulande nangue, “Mubombi obe Yakobo alimukwiza pa kyamba.” Yakobo waali walangakana evi, “Bobu bupe bunamutumina, pange bulikumufuukiako mutima evi n'monane nakue ni kungeleela bilubo byane.” 21 Evi i vyaatangiile bupe bwakue. Yakobo waasyele kulaala papo pa tutanda.

22 Bobo bwenka busiku musita wa busiku Yakobo waabuukile, watwama bakazi bakue babili ni babombi bakue banakazi babili pamo ni baana bakue lyanondo ni umo, waya kwabuka pa musalala wa mwenzi wa Yaboki. 23 Yakobo wa-abusiizie lupua lwakue pamo ni bintu byakue byonse bi-ali nabio, 24 [c]inzi waasyele bunke ku kyamba.

Kwaizile muntu umo waabambile kukanzana nakue mpaka ku makia. 25 Ozo muntu lu-aamwene nangue wamwandua, waamukwete Yakobo pa kitungu, kitungu kyakua Yakobo kyaavyukile musita u-ali walimukulua nakue. 26 Ozo muntu waalandile evi, “Ndekele ngie naya! Mona pasyabukie.”

Yakobo waalandile evi, “Nsikulekela kine teunan'mpaale.”

27 Ozo muntu waamwipuziizie evi, “Liina lyobe uli ni?”

Wa-asukile nangue, “Nene ndi Yakobo.”

28 [d]Ozo muntu waalandile evi, “Wewe teukiya wakuutua Yakobo pantu wakanzana na Leza ni bantu, ni we wa-anzia. Inzi waya wasyakuutua Izraeli.” [e]

29 Yakobo waamwipuziizie evi, “Ale wewe uli ni?”[f]

Waamwasukile, “Wangipuziiziaki Liina lyane?” Kupwako, ozo muntu wamupaala Yakobo.

30 Yakobo waalandile evi, “Namonana ni Leza, kabili nasyala nakosele.” Ni pakako, pa ezio nkendo wainikilepo nangue, “Penueli.” [g] 31 Koba lukaali kasyatula, Yakobo waafumine pa Penueli ni kubamba kuya wasunkuta pantu waali wavyulilue kitungu kyakue. 32 Ni pakako, Baizraeli i kibasilibaliila buzwazua bwa mu kitungu, pantu pa buzwazua i paakumiiziwe Yakobo ni kuvyulua kitungu.

<- KUTENDEKA 31KUTENDEKA 33 ->