KUTENDEKA 28

1 Kupwako, Izaaki wamukuuta Yakobo. Wamupaala wamwana nangue, “Tekuti ukoope mwanakazi Mukanaani. 2 Inzi endo waya ku Padani-Aramu, ku nghanda yakua Betueli se kwa noko. Koko i kwa kuti ukaye kuupila. Ukoope mwana mwanakazi mwina mwinzyobo Labani. 3 Leza wa Maka onse akupaale ni kukusandulula ni kukuvuzia kuba libumba lya bantu! 4 [a]Leza apaale nvyalo yobe nga vi-aapaalile Abrahamu, evi kyalo kiwikeelemo wali mweni kibe kyobe, kyalo kyaapeelue Abrahamu na Leza!” 5 Izaaki waamwanine Yakobo ailepo bwino ku Padani-Aramu kuli Labani waali mwana mwalalume mwina Betueli wa ku Aramea. Labani waali ndumeze kwa Rebeka nghinabo kwa Yakobo ni Esau.

Esau waupa unge mukazi

6 Esau waamwene nangue Izaaki waamupaalile Yakobo ni kumutuma kuti aye oopile ku Padani-Aramu. Kabili waamwene nangue lu-aamupaalile, waamwanine tekuti akoope mwanakazi Mukanaani. 7 Esau waamwene nangue Yakobo waamunakiile se pamo ni nghina ni kuya ku Padani-Aramu. 8 Esau wainikile nangue se Izaaki taali wawamiinue na banakazi ba ku Kanaani. 9 Ni pakako, Esau waile kuupilapo mukazi unge pa balia bakazi ba-aali nabo. Ozo mwanakazi waali wakuutua Mahalati mwana mwanakazi mwina Isimaeli. Isimaeli waali mwana mwalalume mwina Abrahamu. Ozo mukazyana waali nkaziize kwa Nebayoti.

Kilooto kyakua Yakobo ku Beteli

10 Yakobo waafumine ku Beri-Seba waya ku Harani. 11 Waafikile pa nkendo imo, walaala pantu busiku bwailile. Waabuulilepo libue limo ni kusaaminapo mutue wakue. Papo i pa-aaleele ni kuona. 12 [b]Waalootele ni kumona kiselelo kyaimikilue pansi kyakumizie mwiulu, ni bamalaika bakua Leza balimukusela ni kukooka mu kiselelo. 13 [c]Yawe waali waimeene peulu kiselelo ni kulanda nangue, “Nene ndi Yawe Leza wakua Abrahamu ni wakua Izaaki. Keki kyalo ki-uleelepo naakakupeela wewe pamo ni nvyalo yobe. 14 [d]Nvyalo yobe yaakaba nga lufunko lwa pa kyalo. Kabili yaakakumana kufuma ku mboosi mpaka ku kabanga, kufuma ku nkungua mpaka ku nkungulua. Muli wewe pamo ni nvyalo yobe, ntundu yonse ya pa kyalo yaakapaaliluamo. 15 Nene ndi pamo nobe, naakakusunga konse ku waakaya, kabili naakakubweziizia mu keno kyalo, pantu nsikakusia mpaka nkafikilizie bulayo bunaakulaile.”

16 Yakobo lu-abuukile mu tulo waalandile evi, “Kisinka Yawe ali pano, nene nsyamananga!” 17 Yakobo waatiinine walanda nangue, “Iye, pano pantu pakila kutiinia! Pano te pange, inzi ni pa Nghanda yakua Leza, kabili i pa mulyango wa mwiulu.”

18 Lukeele lwakue paakili lukeelekeele, Yakobo waabuukile, wabuula libue li-aali wasaamiinepo, waliimika misiki nga lipumpu ni kupongwelapo mafuta. 19 Pa ezio nkendo waapeenikile Beteli.[e] Ozo muzi kale waali wakuutua Luzi. 20 Yakobo waalapile walanda nangue, “We Yawe, kine ulikunsunga mu lwendo lwane ni kun'mpeela bilio ni ngubo ya kuvwala, 21 ni kubwela nakosele ku nghanda yakua tawe, Yawe waakaba Leza wane. 22 Leli libue linaimika nga lipumpu lyaakaba Nghanda yakua Leza, ni pa byonse biwaakan'mpeela, naakafumiapo kamo ka pa lyanondo ni kukupeela.”

<- KUTENDEKA 27 KUTENDEKA 29 ->