1 Yawe waizile kuli Sara nga mu-aalandiile. Yawe waamukitiile Sara nga mu-aalandiile. 2 [a]Sara waimitile ni kumuvyalila Abrahamu mwana mwalalume wa mu bukote bwakue. Sara waavyele pa olia wenka musita waalandiilepo Leza. 3 Mwana waavyaliilue Abrahamu na Sara, Abrahamu waamwinikile liina lya Izaaki. 4 [b]Izaaki lu-aakumaniizie nsiku mwanda, Abrahamu waamuteetele yando nga vya-aninue na Leza. 5 Izaaki lu-aavyelue, Abrahamu waali wasyali na myaka 100. 6 Sara waalandile evi, “Leza wane wanengia kuseka. Kubalua muntu wakaba kunvuako ezi mpunda, wakaba kuseka pamo nane.” 7 Kabili waatwaliliile kulanda nangue, “Emwe, nani waali wamanine nangue Abrahamu waakavyalilua baana na Sara! Inzi evi namuvyalila mwana mwalalume wa mu bukote bwakue.”

8 Mwana waakulile mpaka wasumunua. Busiku bwaasumwinue Izaaki, Abrahamu waakitile nsikunkulu ikata.

9 Sara waamwene mwana mwalalume mwina Hagari wa ku Misri waavyaliilue Abrahamu walimukumupunika mwana wakue Izaaki. 10 [c]Sara waamwanine Abrahamu nangue, “Mukumbe ozu mwanakazi muzia pamo ni mwana wakue Isimaeli, pantu ozu mwana wakue takapyana pamo ni mwana wane Izaaki.” 11 Ozo mulandu waakilile kumubipila Abrahamu pantu Isimaeli ni ye waali mwana wakue. 12 [d]Leza waamwanine Abrahamu, “Tekufiitua palwakua Isimaeli ni nghina Hagari, inzi konka sie twebo tonse twakwana Sara, pantu muli Izaaki i mwaakafuma nvyalo yobe. 13 Mwana mwalalume mwina mwanakazi muzia naakamukita kuba mutundu ukata, pantu ni ye ni mwana obe.”

14 Lukeele lwakue paakili, Abrahamu waabuukile ni kumupailila Hagari bilio ni menda a kumina mu mbukulu ya mpapa ya nama, wamutwika pa nkombe, ni kumwana ailepo ni mwana wakue. Ozo mwanakazi waile wazeezooka sie mu kaseeba ka Beri-Seba. 15 Menda a kumina lu-aapwile mu mbukulu ya mpapa ya nama, waamulaalikile mwana wakue mwinsina kavuule 16 ni kuya kwikala pa nkendo imo paleepele mu pepi metre 100 ni kulanda nangue, “Nsitonene kumona kufua kwa mwana wane.” Hagari lu-aali waikeele papo, waatendekele kulila wa-angwile.

17 Mwana ni ye waali walimukulila. Leza lu-aunvwile kulila kwa mwana, malaika wakua Leza kufuma mu mulu waamukuutile Hagari ni kumwana nangue, “Ati Hagari, wasakamanapoki papa? Unvua, tekutiina pantu Leza waunvwanga kulila kwa mwana obe. 18 Ale endo ubuusie mwana umusungilile, pantu naakamukita kuba mutundu ukata.” 19 Leza waamwizwile Hagari menso, ni ye waamwene kiina kya menda. Kupwako, waya kwizuzia menda mu mbukulu ya mpapa ya nama ni kumunwinsia. 20 Leza waali wali pamo ni ozo mwana, ni ye waakulile. Waile kwikala mu kaseeba ni kwaluka mbwela wa nama mu kubombia buta ni mivui. 21 Lu-aali waikeele mu kaseeba ka Parani, nghina waamukebeele mukazi wa ku Misri.

22 [e]Pa ozo musita, Abimeleki ni Fikoli mukulu wa balukale bakue, baile kumwana Abrahamu nangue, “Leza obe ali pamo ni wewe mu bintu byonse bi-uliwakita. 23 Ale lapa mu kyeni kyakua Leza nangue teukikan'mbeepa ao kubeepa mwana wane, ao kubeepa mwinzikulu wane, inzi ukankitile biweme pamo ni keki kyalo kiwikeelemo nga evelia vinaakukitiile.”

24 Abrahamu waalandile evi, “Ee, ndikulapa.”

25 Kabili Abrahamu waamwanine Abimeleki nangue, “Nene nsiwamiinue pa mulandu wa kiina kya menda kyaapokelue na babombi bobe.” 26 Abimeleki waamwasukile evi, “Ewe, nene nsimanine muntu waakitile evio, ni we kumo tewan'mbwilileko, kabili nsinaunvuepo, ni evi vyenka lelo i kunvua.” 27 Kupwako, Abrahamu wabuula mikooko ni nghombe, wamupeela Abimeleki. Babo babili baakitile kipanghano. 28 Abrahamu waabuulile misoka kilooba ya mikooko ikota ni ku-ibiika pambali. 29 Abimeleki waamwipuziizie Abrahamu, “Ewe, ale ezi misoka kilooba ya mikooko ikota iwabiika pambali i kulanda syani?”

30 Abrahamu wa-asukile evi, “Ezi misoka ya mikooko ni ya kukupeela wewe, evi kiye kyali kisininkizizio kya kusininkizia nangue nene i mwine waimbile keki kiina kya menda.” 31 Ni pakako, pa ezio nkendo paakuutilue Beri-Seba i kulanda nangue, “Kiina kya menda kya kilooba ao kiina kya mulapo.” Pantu babo babili i pa baakitiile kipanghano.

32 Pa kyamba kya kwitabizyania ku Beri-Seba, Abimeleki ni Fikoli, mukulu wa balukale bakue, baabweleele ku kyalo kya Bafilistini. 33 Abrahamu waalimbilemo kamuti ka tamariski ni kukuutilapo Liina lyakua Yawe Leza wa muyayaya. 34 Abrahamu waikeele nsiku ingi mu kyalo kya Bafilistini wali mweni.

<- KUTENDEKA 20KUTENDEKA 22 ->