1 Kabili Yawe waamumonekeele Abrahamu lya ku bimuti bikata byakua Mamure lu-aali waikeele mu mulyango wa liema koba lukaali kazangukile. 2 [a]Abrahamu waakentele ni kumona bantu batatu baimeene ku ntanzi yakue. Ni lu-aabamwene, waafumine lubilo mu mulyango wa liema ni kuya kusaakaana nabo. Kupwako, wafwinamina pansi 3 ni kulandapo na umo nangue, “We mulopue wane, kine kuti wangitabizia, nakulomba tekuti mupitilile pa mubombi wenu. 4 Pembelenke muleetelue menda aniini a kusamba ku makasa enu mane mutuuzie mwinsina kimuti, 5 n'mileetele ni ka kulia evi muteekieko mitima yenu, pa kyamba mane mulunduluke ni lwendo lwenu pantu mwaizanga kuli mubombi wenu.”

Ni bo baalandile evi, “Ale kita muwalandila.”

6 Kupwako, Abrahamu waya lubilo lubilo mu liema ni kumwana Sara nangue, “Ewe, lenga uye uleete kilo 25 ya bunga buwamiisie ulenge ukite mikate.” 7 Kabili penka papo, wakundukila koko kwaali kisepe kya nghombe, watwamapo nghombe musoka enine ni kumutwala ku babombi balenge bamusinze. 8 Waabuulile mafuta ali afuma ku mabeele a nghombe, ni mabeele a kumina pamo ni bipusa byeleke, waya kubatwalila ku baali baikeele. Lubaali balimukulia, Abrahamu waali waimeene pambali mwinsina kimuti.

9 Baamwipuziizie Abrahamu, “Ewe, mukazi obe ali pi?”

Wa-asukile nangue, “Ali mu liema.”

10 [b]Yawe waalandile evi, “Kisinka nakaba kwiza kabili ozu mwaka waiza pa ono wenka musita, ni Sara mukazi obe wakaba kuvyala mwana mwalalume.”

Sara ni ye waali waimeene ku kyamba kyakue lya ku mulyango watwiliziizie. 11 Abrahamu ni Sara baali basyakilile kukota, ni musita wakuvyala waali wasyapitile. 12 [c]Sara lu-aunvwile evio, waasekeele sie mu mutima walanda nangue, “Kubako nasyakotele evi kuti nawaminua kulaala ni mulume wane mukote?”

13 Yawe waamwipuziizie Abrahamu, “Sara, wasekelaki evi ni kulanda nangue, ‘Kubako evi kuti navyala ni mwana nasyakotele?’ 14 [d]Eba, kuli ni kintu kili kya-anda kuli Yawe? Naakeeza kabili ozu mwaka waiza nga munalandilanga. Naakeeza kusanga mukazi obe Sara wavyele mwana mwalalume.”

15 Sara waakeene walanda nangue, “Nsisekele.” Pantu waali waunvwile mwezo.

Inzi Yawe waamwanine evi, “Wasekanga.”

16 Balia bantu baafumine papo ni kulunghama lya ku Sodoma. Abrahamu waile kubaseekezia. 17 Yawe waalandile evi, “Nene nsivinda kumufiika Abrahamu bintu binghumiine kukita. 18 Pantu kulanda kisinka Abrahamu waakaba mutundu ukata waakaba walumine, ni muli wene ntundu yonse ya pa kyalo yaakapaaliluamo. 19 Pantu naamusaakwile kuti akabaane baana bakue pamo ni nghanda yakue pa kyamba kyakue kuti bakasunge nzila yakua Yawe, ni kukita nsambu pamo ni bupinguzi, pakuti Yawe ni ye akafikilizie bintu byonse bi-aamulaile Abrahamu.”

20 Yawe waalandile evi, “Pantu malilo a mu Sodoma ni mu Gomora akila, ni bibalo byabo byakila kuvula, 21 ndikukookelako ngie n'mone kine kibalimukukita kipaleene ni malilo anakyunvua, kine te evio nakaba kumana.”

22 Babo bantu babili baafuminepo ni kuya lya ku Sodoma, inzi Abrahamu waali wakiimeene ni Yawe. 23 Abrahamu waamupaleeme walanda nangue, “Ati, ni kiine wakaba kulovia bonse mulunghami ni mubi? 24 Kine mu muzi muli balunghami 50, wakaba kulovia muzi onse? Teukaba kubeeleela pa mulandu wa babo balunghami 50? 25 Nakupaapaata tekuti uye wipailile mulunghami pamo ni mubi, evi mulunghami tekuti aye wali nga mubi. Tekuti ukabe kukita evio. Eba, Mupinguzi wa kyalo kyonse tavinda kupingula mu nsambu?”

26 Yawe wa-asukile evi, “Kine naya kusangamo balunghami 50 mu Sodoma, nakaba kweleela muzi onse pa mulandu wabo.”

27 Abrahamu waalandile evi, “Natwalilila kulanda na Mulopue ne ali sie lufunko, kabili nali mito. 28 Ale kine pabula basaano pa balia balunghami 50, wakaba kulovia muzi onse pantu papusa bantu basaano?”

Mulopue wa-asukile evi, “Kine naya kusangamo balunghami 45 nene nsikaba kulovia muzi.”

29 Kabili Abrahamu waipuziizie evi, “Ale kine bali sie 40?”

Waamwasukile, “Kine bakabe 40, nsikakita kantu pa mulandu wa baba bantu 40.”

30 Abrahamu waalandile evi, “We Mulopue, tekufiitua. Ntonene nandepo kabili. Ale kine bali sie balunghami 30?”

Waamwasukile, “Nsikakita kantu pa mulandu wa baba bantu 30.”

31 Abrahamu waalandile evi, “Natwalilila kulanda na Yawe, ale kine bali sie 20?”

Waamwasukile, “Kine bali 20 nene nsikaba kubalovia.”

32 Abrahamu waalandile evi, “We Yawe, napaapaata tekufiitua. N'mpeleeziepo sie limo. Ale kine bali sie lyanondo?”

Waamwasukile, “Kine bali lyanondo nsikaba kubalovia.” 33 Yawe lu-aapwile kulanda na Abrahamu, Waile. Abrahamu ni ye waabwelele kwakue.

<- KUTENDEKA 17KUTENDEKA 19 ->