1 Bobo busiku likolo taaonene tulo, wa-anine mubombi amuleetele kitabu kyaali kyalembeluemo bintu byaali byakitika pa musita wakuteeka kwakue, kuti bamubelengele. 2 [a]Lubaabelengelemo, kyaamwenekele nangue Mordekai i waasongeele bamasai, Bigtana ni Teresi, balia babombi babili ba pa mulyango wa nghanda yakua likolo baali bakambila kumwipaya likolo Ahasuero. 3 Likolo waipuziizie babombi nangue, “Mordekai waapeelue mukinziki, ao kilambuki pa bebio bi-aakitile?”

Babombi bakue ba-asukile nangue, “Tepali ka-akitiilue.”

4 Likolo waipuziizie evi, “Papa pa musolo pali ni?”

Ozo i musita waali waingila Hamani pa musolo wa nghanda yakua likolo kuti alanzyanie nakue evi bamukulike Mordekai ku kimuti ki-akiteania. 5 Babombi bakue baamwasukile nangue, “Pali sie Hamani i emeene pa musolo.”

Likolo waalandile evi, “Mwane engile.”

6 Kupwako, Hamani waingila. Likolo waamwanine nangue, “Kuli ni muntu undimukukeba kukindika. Ndikumukitilaki?”

Hamani waalandile mu mutima mwakue nangue, “Kubako kuli ni unge apalile kukindikua na likolo kukila nene?”

7 Hamani wa-asukile evi, “We likolo, ozo muntu u ulimukukeba kukindika, 8 aleetelue ngubo ya bukolo yaali yavwaluako na likolo ni farasi waali waseluapo na likolo mwine, ni ozo farasi aye wavwikilue kiteebo kya bukolo ku mutue, 9 ni elia ngubo pamo ni olia farasi bipeelue umo akindamiisie pa babombi bakulu bakua likolo, kuti amuvwike olia muntu likolo u alimukukeba kukindika, kabili aseziiwe pa farasi ni kumupisia mu musebo ukata wa mu muzi walimukupunda ku ntanzi yakue nangue, ‘Evi, i vyakukitilua olia muntu likolo u akebele kukindika.’ ”

10 Kupwako, likolo wamwana Hamani, “Ale lenga utwame ngubo pamo ni farasi nga muwalandila, umukitile Mordekai Muyuda ekeele pa mulyango wa nghanda yakua likolo pasili kusiapo ata kamo pa byonse biwalanda.”

11 Hamani i lu-aabuulile ngubo pamo ni farasi, wamuvwika Mordekai elia ngubo, wamusezia pa farasi, ni kumupisia mu musebo ukata wa mu muzi walimukupunda ku ntanzi yakue nangue, “Evi i vyakukitilua olia muntu likolo u-atonene kukindika.”

12 Kupwako, Mordekai wabwela pa mulyango wa nghanda yakua likolo. Inzi Hamani waile lubilo ku nghanda yakue waivimbiliile ku mutue walimukulila waunvwile bulanda ni busoni bukata. 13 Hamani waamulondolweleele Zereshi mukazi wakue pamo ni benakue bonse palua bintu byonse byaamukitikiile. Kupwako, bantu bakue ba maano ni Zereshi mukazi wakue bamwana nangue, “Kine ozu Mordekai uwabamba kufwinamina ni wa mu mukowa wa Bayuda, kisinka we teukikamuvinda, inzi wene waakakulovia.”

14 Ni musita u baali bakilanda sie nakue evio, babombi bamasai bakua likolo baiza, ni kulenga kumutwala Hamani ku matebeto ateaniiziwe na Esta.

<- ESTA 5ESTA 7 ->