7 जमाहेन्से जम्मान भन्दा ङाच्छापट्टि मुबा स्वर्गदूत गिकसे ह्राङला बिगुल ह्राप्जी। थेनोन धुइरी का दोङ्बा सेर्बादेन मे जम्बुलिङरी ल्हानान ताइजी। थेतबासेलमा जम्बुलिङला भो सोमरी भो गिक दोङगदेला भो सोमरी भो गिक ओच्छे जम्मान छेगदेएनोन क्रोजी।
8 न्हीरेमला स्वर्गदूतसे ह्राङला बिगुल ह्राप्बा धुइरी मे लुङ्बा घ्रेन गङ ह्रङ्बा स्हे गिक समुन्द्ररी भ्याङ्जी। ओच्छे समुन्द्रला क्युइ भो सोमरी भो गिक का दोजी। 9 ओच्छे समुन्द्ररी मुबा जम्मान जन्तुगदे भो सोमरी भो गिक सिजी। थेह्रङ् लसीन पानी जहाजगदेएनोन भो सोमरी भो गिक नाश तजी।
10 थेह्रङ् लसीन सोमरेमला स्वर्गदूतसे ह्राङला बिगुल ह्राप्जी। थेनोन धुइरी लुङ्बा मेला ल्हाम ह्रङ्बान घ्रेन सार गिक मुग्याम भो सोम स्योङगदेला भो गिकरीदेन क्युइला मुहानगदेरी ताइजी।[c] 11 थे सारला मिन “कम्बा” मुबा। थे सारसे भो सोम क्युइरी भो गिक कम्ना लजी। थे कम्बा क्युइ थुङ्बा ल्हानान म्हिगदे सिजी।
12 दोःसी ब्लिरेमला स्वर्गदूतसे ह्राङला बिगुल ह्राप्जी। थेनोन धुइरी धिनी, लनीदेन सारगदेला भो सोमला भो गिकरी तिगै स्हेसे तोजी। जमाहेन्से थेनीगदेला भो सोमरी भो गिक धोप तजी। चुह्रङ् लसी धिनदेन म्हुनएनोन भो सोमरी भो गिक धोपधोप तजी।
13 ङाइ च्याबान लमा मुरी ग्वाइ गिक फ्याङ्बान लबा म्राङ्जी। थे ग्वाइसे क्रिङ्बान चुह्रङ् भिसी भिजी, “दुखन दुख, जम्बुलिङरी मुबा म्हिगदेदा ल्हानान दुख तला। तिग्दा भिसम दाहेन्से बिगुल ह्राप्बारी बाँकी मुबा अर्गु गोर सोम स्वर्गदूतसे बिगुल ह्राप्बा धुइ तसी जिन्बा मुला।”
<- यूहन्नादा उन्बा ताम 7यूहन्नादा उन्बा ताम 9 ->