2 “एनीगदेसे प्राङबोगदेदा पिन्बा धुइरी कप्टीगदेसे ह्रङ् लसी म्हिगदेदा थेःना लसी थाभ्रउ। तिग्दा भिसम थेनीगदे म्हिगदेसे मान लगै भिसी यहूदीगदे ह्रुप तबा दिमगदेदेन ग्यामरीक्यार निसी स्य्हान्दोदा थेःना लसी भ्रमुला। च्यागो, एनीगदेसे ङाला ताम ङ्यान्गो, थेनीगदेसे याङ्तोःबा इनाम याङ्सी जिन्बा मुला। 3 तर एसे प्राङबोगदेदा पिन्बा धुइरी एला दाहिने यासे तिग लबान मुला थे ताम एला देब्रे यासेनोन था थायाङ्गै। 4 थेतबासेलमा एसे प्राङबोगदेदा पिन्बा स्हे खालैदा था आतगै। थेह्रङ् लजी भिसम खालैसे था आयाङ्बा तामएनोन था याङ्बा परमेश्वर आबासे एदा इनाम पिन्ना।
5 “थेतबासेलमा एसे प्रार्थना लबा धुइरी कप्टीगदेसे ह्रङ् लसी थालउ। तिग्दा भिसम थेह्रङ्बा म्हिगदेसे म्हिगदेदा उन्बाला लागिरी यहूदीगदे ह्रुप तबा दिमगदेदेन ग्यामला कुनीरीक्यार राप्सी प्रार्थना लबारी सेम लमुला। च्यागो, एनीगदेसे ङाला ताम ङ्यान्गो, थेह्रङ्बा म्हिगदेसे याङ्तोःबा इनाम याङ्सी जिन्बा मुला।[b] 6 तर ए प्रार्थना लबा धुइरी कोठा न्हङरी वाङ्सी म्राप ढुङ्गो, ओच्छे खालैसे आम्राङ्बा ग्लारी धन्छ्याबा परमेश्वर आबादेन छ्याम प्रार्थना लउ। जमाहेन्से खालैसे आम्राङ्बा तामएनोन म्राङ्बा परमेश्वर आबासे एदा इनाम पिन्ना। 7 ओच्छे प्रार्थना लमा अर्गु य्हुलला म्हिगदेसे ह्रङ् लसी ओह्रङ्नोन थाक्रिङ्गो। तिग्दा भिसम ह्रेङ्बा ह्रेङ्बा प्रार्थना लजी भिसम परमेश्वरसे थेःमुला भिसी थेनीगदेसे म्हन्मुला। 8 थेतबासेलमा एनीगदे थेनीगदे ह्रङ्बा थादोगो। तिग्दा भिसम एनीगदेसे ह्रीबा भन्दा ङाच्छान एनीगदेदा तिग तिग स्हे तोःबा मुला, थे एनीगदेला परमेश्वर आबादा था मुला।
14 “एनीगदेदा बिरोध लसी पाप लबागदेदा एनीगदेसे माफ लजी भिसम स्वर्गरी धन्छ्याबा परमेश्वर आबासेनोन एनीगदेदा माफ लला।[e] 15 तर एनीगदेसे म्हिगदेदा माफ आलनी भिसम परमेश्वर आबासेनोन एनीगदेदा माफ आल।
19 “ह्राङला लागिरी जम्बुलिङरी धन सम्पत्ति सोसी थाथान्गो, तिग्दा भिसम जम्बुलिङला धन सम्पत्तिगदे बुलुङदेन खियासे चला, ओच्छे दिम फोसी य्होगदेसे य्हो लसी भोर्ला।[f] 20 बरु ह्राङला लागिरी स्वर्गरी धन सम्पत्ति सोसी थान्गो। तिग्दा भिसम थेरी बुलुङसेएनोन आच खियासेएनोन आच, ओच्छे य्होसेएनोन वाङ्सी य्हो आल। 21 तिग्दा भिसम जुन ग्लारी एनीगदेला धन सम्पत्ति मुला, एनीगदेला सेमएनोन थेरीन तला।
22 “मी ल्हुइला लागिरी नाङसल ह्रङ्बान हिन्ना। थेतबासेलमा एला मी ज्यबा मुसम एसे ज्यना लसी म्राङ्ला, 23 तर एला मी न्होङ्जी भिसम एसे तिगै आम्राङ्। थेह्रङ् लसीन एला सेमला नाङसल सिजी भिसम एला लागिरी जम्मान धोपधोप तला। 24 “खालैसेनोन मालिक न्हीला गे लबारी आखम। तिग्दा भिसम थेसे गिकदा हेला लला, ओच्छे स्य्हान्दोदा माया लला। अथवा थेसे गिकसे भिबा ताम ङ्यान्ना, ओच्छे स्य्हान्दोदा वास्तान आल। थेह्रङ् लसीन एनीगदेसेनोन परमेश्वरदेन धन सम्पत्ति न्हीलान गे लबारी आखम।
25 “थेतबासेलमा एनीगदेसे ङाला ताम ङ्यान्गो, सोबाला लागिरी तिग चसे तिग थुङ्से ओच्छे तिग क्वान्से भिसी धन्दा सुर्दा थालउ। तिग्दा भिसम चबा थुङ्बादेन क्वान्बा भन्दा एनीगदेला प्राणदेन ल्हुइ घ्रेन आहिन? 26 मुरी चरागदेदा च्यागो, थेनीगदेसे न्ह ब्लु ढ्वला, न्ह बाली दुइसी पोप लला, तर स्वर्गरी धन्छ्याबा एनीगदेला परमेश्वर आबासेन थेनीगदेदा ख्वामुला। चरागदे भन्दा मी एनीगदे घ्रेन आहिन? 27 एनीगदे न्हङला खालैसे धन्दा सुर्दा लसी छिन्नङला लागिरी आयू काप्खम्ला?
28 “तिग्दा एनीगदेसे क्वान्ना लागिरी धन्दा सुर्दा लबा? ह्रिरी सार्बा म्हेन्दोदा च्यागो, थेसे गेएनोन आलमुला, क्वानएनोन आरामुला। तसैनोन थे खाह्रङ् लसी ल्हेमुला! 29 एनीगदेसे ङाला ताम ङ्यान्गो, सोलोमन ग्लेदेन ल्हानान धन सम्पत्ति मुसैनोन थेसे क्वान्बा क्वान थे म्हेन्दोगदे न्हङला गिक तेबै जेबा आरेमुबा।[g] 30 तिनी ल्हेबान निसी न्हङगर खर्माहेन्से मेरी फर्बा छेदा मी परमेश्वरसे चुह्रङ् लसी जेना लमुला भिसम झन एनीगदेदा परमेश्वरसे जेना आल? खाइ एनीगदेला विश्वास? 31 थेतबासेलमा ‘तिग चसे? तिग थुङ्से? ओच्छे तिग क्वान्से?’ भिसी धन्दा सुर्दा थालउ। 32 तिग्दा भिसम परमेश्वरदा ङोआसेबा अर्गु य्हुलला म्हिगदेसे चा चु जम्मान स्हे म्हाइमुला। तर स्वर्गरी धन्छ्याबा परमेश्वर आबासे एनीगदेदा चु जम्मान स्हे तोःला भिसी था मुला। 33 थेतबासेलमा ङाच्छा एनीगदेसे परमेश्वरला य्हुल्सा म्हाइगो ओच्छे थेसे म्हन्बा अन्छार गे लउ। जमाहेन्से परमेश्वरसे एनीगदेदा चु जम्मान स्हे पिन्ना। 34 थेतबासेलमा न्हङगरला लागिरी धन्दा सुर्दा थालउ। तिग्दा भिसम न्हङगरदा तोःबा स्हे न्हङगरनोन याङ्ला। तिनीला लागिरी तिनीलान दुख मुला।
<- मत्ती 5मत्ती 7 ->- a मत्ती २३:५
- b लूका १८:१०-१४
- c चु पदरी ग्रीक बाइबलरी “ह्राङला छानदा मान लगै” भिसी भ्रिबा मुला। तर मुल अर्थ चा परमेश्वरदा मान तगै भिबा हिन्ना।
- d “ह्राङला य्हुल्सादेन शक्ति ओच्छे ह्राङला मान सदनना लागिरी ह्राङलान हिन्ना, आमेन।” चु पदला ताम चा ल्हानान ह्रङ्बा ग्रीक बाइबलरी भ्रिबा आरे।
- e मर्कू ११:२५-२६
- f याकू ५:२-३
- g १ राजा १०:४-७; २ इति ९:३-६