1 जमाकुनु येशू दिमग्याम फेप्सी समुन्द्रला कुनीरी धन्छ्याजी। 2 ओच्छे थेरी म्हिला हुल मुबासेलमा येशू दोँगारी धन्छ्याजी। ओच्छे म्हिला हुल चा समुन्द्रला कुनीरीक्यार राप्सी चिजी।[a] 3 जमाहेन्से थेरी मुबा म्हिगदेदा येशूसे उखानग्याम ल्हानान ताम लोप्बान चुह्रङ् भिसी सुङ्जी, “च्यागो, ब्लु ढ्वबा म्हि गिक ब्लु ढ्वबारी भ्रजी। 4 थे म्हिसे ब्लु ढ्वमा कोइ ब्लु ग्यामरी परब तजी, थे ब्लु चरागदे खसी चजी। 5 कोइ ब्लु चा युङबाला घह्रङ मुबा सरी परब तजी, ओच्छे थेरी साप्रा ल्हाना आरेबासे लमा योनान फुइजी। 6 तर साप्रा ल्हाना आरेबासे लमा थेला टा नुप्ना निआम्याङ्नी। थेतबासेलमा धिनीसे क्रोसी थे दोङ सिजी। 7 कोइ ब्लु चा पुजु झाङरी परब तजी, ओच्छे थे ब्लुदेन पुजु दोङ छ्याम छ्यामनोन फुइजी। तर पुजु दोङ ल्हेबान निबासे लमा थे दोङदा हाप तजी। 8 कोइ ब्लु चा ज्यबा सरी परब तसी फुइजी, ओच्छे कोइ दोङरी दोब्बर, कोइ दोङरी तेब्बर, कोइ दोङरी चौबरधोना रोजी। 9 जुन म्हिदा ङ्यान्बा सेम मुला थेसे ङ्यान्सी घोउ।”
10 जमाहेन्से चेलागदेसे येशूदा “ह्राङसे थेनीगदेदा तिग्दा उखानग्यामसे जे लोप्बा?” भिसी ङ्योइमा, 11 येशूसे थेनीगदेदा चुह्रङ् भिसी जोहाब पिन्जी, “म्हिसे था आयाङ्बा स्वर्गला य्हुल्साला ताम ङाइ एनीगदेदा घोखम्बा ज्ञान बुद्धि पिन्बा मुला। तर थेनीगदेदा चु ज्ञान बुद्धि पिन्बा आरे। 12 तिग्दा भिसम जुन म्हिसे ङाइ लोप्बा तामदा सेम लसी ङ्यान्ना, थेदा ङाइ अझन घोना लला। तर ङाइ लोप्बा ताम आङ्यान्बादा चा थेसे जुन घोबा मुला थे तामएनोन म्हाना लला।[b] 13 थेनीगदेसे ङाइ लबा गे च्याबाम च्यामुला तर आम्राङ्मुला, ओच्छे ङाइ पाङ्बा ताम ङ्यान्बाम ङ्यान्मुला तर आघोमुला। थेतबासेलमान ङाइ थेनीगदेदा उखानग्याम पाङ्बा हिन्ना।
14 “परमेश्वरसे यशैया अगमवक्ताग्याम सुङ्बा ताम चुह्रङ् लसी पूरा तबा मुला,
16 जमाहेन्से येशूसे ह्राङला चेलागदेदा चुह्रङ् भिसी सुङ्जी, “एनीगदेसे परमेश्वरग्याम मोलम याङ्ला, तिग्दा भिसम एनीगदेसे म्राङ्बाएनोन मुला थेःबाएनोन मुला। 17 च्यागो, एनीगदेसे ङाला ताम ङ्यान्गो, ल्हानान अगमवक्तादेन परमेश्वरसे म्हन्बा अन्छार भ्रबा म्हिगदेसे एनीगदेसे म्राङ्बा चु तामगदे च्याबारी म्हाइमुबा। तर थेनीगदेसे आम्राङ्नी, ओच्छे एनीगदेसे थेःबा ताम थेनीगदेसे थेःबारी म्हाइजी, तर थेःबारी आम्याङ्नी।[d]
18 “लु, ब्लु ढ्वबा उखानना अर्थ ङ्यान्गो। 19 ग्यामरीक्यार परब तबा ब्लुला अर्थ चुनोन हिन्ना, जुन म्हिसे परमेश्वरला बचन ङ्यान्ना, तर थेसे घोबा भन्दा ङाच्छान शैतान खसी थेनीगदेला सेमग्याम थे ताम ब्यन्सी भोर्ला। 20 युङबाला घह्रङ मुबा सरीक्यार परब तबा ब्लुला अर्थ चुनोन हिन्ना, जुन म्हिसे परमेश्वरला बचन ङ्यान्सी तुरुन्तन विश्वास लला। 21 तर थेनीगदेला विश्वासला टा आरेबासे लमा, थे छिन्नङ जे चिला। ओच्छे परमेश्वरला बचनदा विश्वास लबासे लमा थेनीगदेदा आपत विपत खमाहेन्से थेनीगदेसे विश्वास लबा ख्लाला। 22 पुजु झाङ न्हङरी परब तबा ब्लुला अर्थ चा जुन म्हिसे परमेश्वरला बचन ङ्यान्ना, तर चु जम्बुलिङला धन्दा सुर्दादेन धन सम्पत्तिला लोभसे लमा परमेश्वरला बचनदा गे लआपुङ्। थेतबासेलमा थेला विश्वासग्याम तिगै आरो। 23 तर ज्यबा सरी परब तबा ब्लुला अर्थ चा जुन म्हिसे परमेश्वरला बचन ङ्यान्सी ह्राङला सेमरी थान्ना, ओच्छे थेला विश्वासग्याम दोब्बर, तेब्बर, चौबरधोनाला रो रोला।”
27 “थेतबासेलमा नोकरगदे दिमला मालिक मुबा ग्लारी खसी ‘बुरी ह्राङसे ग्वा जे ढ्वबा आहिन? थेरीम कोडोङएनोन फुइजीम’ भिसी भिजी।
28 “जमाहेन्से दिमला मालिकसे थेनीगदेदा ‘खालै शत्रुसे चुह्रङ् लबा हिन्ना’ भिसी भिमा, नोकरगदेसे ‘थेह्रङ् भिसम ङनी निसी थे कोडोङ स्योइसी भ्याङ्गो?’ भिसी भिजी।
29 “तर थे मालिकसे नोकरगदेदा चुह्रङ् भिसी पाङ्जी, ‘दान्देन थास्योइगो, तिग्दा भिसम एनीगदेसे कोडोङ भिसी स्योइमा ग्वाएनोन स्योइसी भ्याङ्ला। 30 बरु ग्वा खन्बा धुइ आततेधोना थेह्रङ्बान मुगै। ग्वा खन्बा धुइरी खन्बागदेदा ङाच्छा कोडोङ स्योइसी ख्राङ्बाला लागिरी ग्ला गिकरी थान्गो। तर एनीगदेसे ग्वा जे भसी ङाला भकारीरी थान्गो भिसी पाङ्ला।’ ”
31 दोःसी येशूसे थेनीगदेदा अर्गु उखान गिक सुङ्जी, “च्यागो, स्वर्गला य्हुल्सा म्हि गिकसे घुर्यानरी ढ्वबा पच्छै ब्लुला गेडा गिक ह्रङ्बान हिन्ना। 32 पच्छैला गेडा ढापढुपगदे न्हङरी जम्मान भन्दा जजा तसैनोन थे फुइसी ल्हेबान निसी दोङनोन दोला। ओच्छे थे पच्छै दोङला हाँगारी चरागदे खसी जङ स्होसी चिला।”
33 दोःसीनोन येशूसे थेनीगदेदा अर्गु उखान गिक सुङ्जी, “च्यागो, स्वर्गला य्हुल्सा चा गेङरी युबा खमीर ह्रङ्बान हिन्ना। थे खमीर म्रिङम्हेमे गिकसे फाम सोम ब्रारी युसी ज्योप्ला। ओच्छे थे ब्रा आभोतेधोना थेसे घप्सी थान्ना।”
34 येशूसे म्हिला हुलदा जम्मान ताम उखानग्यामसे जे लोप्जी। उखान आसुङ्तेधोना थेनीगदेदा येशूसे तिगै ताम आलोप्नी। 35 परमेश्वरसे अगमवक्ताग्याम सुङ्बा ताम चुह्रङ् लसी पूरा तजी,
45 “चुह्रङ् लसीन स्वर्गला य्हुल्सा ज्यबा खाल्ला मोती म्हाइसी भ्रबा व्यापारी ह्रङ्बान हिन्ना। 46 थेसे ज्यबा खाल्ला मोती स्याप्माहेन्से ह्राङदेन छ्याम मुबा जति जम्मान चुङ्सी थे मोती ग्लुजी।
53 चु उखानगदे सुङ्सी जिन्माहेन्से येशू थेग्याम ह्राङला नाम्सारी फेप्जी। 54 ओच्छे ह्राङला नाम्सारी धोखमाहेन्से यहूदीगदे ह्रुप तबा दिमरी फेप्सी थेरी मुबा म्हिगदेदा लोप्जी। येशूसे लोप्बा म्राङ्सी थेरी मुबा म्हिगदे उदेक तसी चुह्रङ् भिजी, “चु म्हिसे चुह्रङ्बा उदेकला गे लबा शक्तिदेन बुद्धि खानङग्याम याङ्जी? 55 चु सिकर्मीला झा आहिन? चुला आमा मरियम ओच्छे आलेगदे याकूब, योसेफ, सिमोनदेन यहूदा आहिन? 56 चुला जम्मान आङागदे य्हाङदेन छ्यामनोन आरे? तसैनोन चुसे चु जम्मान ज्ञान बुद्धिदेन शक्ति खानङग्याम याङ्जी?” 57 जमाहेन्से थेनीगदेदा येशूदेन छ्याम बोमो खजी।