1 येशूसे ह्राङला चेलागदेदा चुह्रङ् भिसी सुङ्जी, “च्यागो, म्हिदा पापरी फसब लबा तामगदे मी खनोन खमुला। तर स्य्हान्दोदा पापरी फसब लबा म्हिसे चा परमेश्वरग्याम सजाय याङ्ला। 2 जुन म्हिसे चु कोलागदेदा पाप लपुङ्ला थेह्रङ्बा म्हिदा पाप लपुङ्बा भन्दा खारेरी ह्रान्दा च्योसी समुन्द्ररी भ्याङ्बान ज्यबा तला। 3 थेतबासेलमा ह्राङला लागिरी होशियार तसी चिउ! एला आलेसे पाप लजी भिसम थेदा बङ्गो। ओच्छे थेसे ङाइ लबा पाप ख्लाला भिजी भिसम थेदा माफ लउ।[a] 4 एला आलेसे एला बिरोधरी धिनना निसरेमधोना पाप लसैनोन निसरेमधोनान थेसे ङाइ लबा पाप ख्लाला भिजी भिसम थेदा माफ लउ।”
5 जमाहेन्से प्रभुला मुल चेलागदेसे प्रभुदा “प्रभु, ङन्ना विश्वास ल्हेना लसी पिन्गो” भिसी भिजी।
6 प्रभुसे थेनीगदेदा “एनीगदेदेन छ्याम पच्छैला ब्लु गिक तेःबा जे विश्वास मुजी भिसम चु किम्बुला दोङदा ‘ए प्योक्सी समुन्द्ररी निउ’ भिजी भिसम थे एनीगदेसे भिबा ह्रङ्नोन तला।
14 जमाहेन्से येशूसे थेनीगदेदा “एनीगदे परमेश्वरला मन्दिररी पूजा लबा म्हि मुबा ग्लारी निसी ह्राङदा उन्गो” भिसी सुङ्जी। ओच्छे थेनीगदे निना निनान ग्यामरीन खम्जी।[b] 15 थेनीगदे न्हङला गिकसे ह्राङ खम्बा था याङ्सी परमेश्वरदा जयजयकार लबान दोःसी खजी। 16 ओच्छे थे म्हिसे येशूदा धन्यवाद पिन्सी येशूला स्य्हापरी फ्या लजी। थे म्हि चा सामरी य्हुलला मुबा।
17 जमाहेन्से येशूसे “कोरेग्याम खम्बा म्हि च्युइ न्हङरी चु गिक जेन हिन्ना? स्य्हान्दो म्हि कु चा खानङ निजी? 18 परमेश्वरदा धन्यवाद पिन्बारी चु सामरी बाहेक स्य्हान्दो खालै आतनी?” भिसी सुङ्जी। 19 जमाहेन्से येशूसे थे सामरी य्हुलला म्हिदा “दाहेन्से ए रेःसी निउ, एला विश्वाससे लमा एला कोरे म्हाबा मुला” भिसी सुङ्जी।
20 फरिसीगदेसे परमेश्वरला य्हुल्सा खाइमा खला भिसी ङ्योइमा, येशूसे थेनीगदेदा “परमेश्वरला य्हुल्सा म्राङ्ना लसी आख। 21 खालै म्हिसे परमेश्वरला य्हुल्सा चुरी मुला, थेरी मुला भिसी भिदेमा एनीगदेसे आम्राङ्। तिग्दा भिसम परमेश्वरला य्हुल्सा एनीगदेला गुङरीन मुला” भिसी सुङ्जी।
22 जमाहेन्से येशूसे ह्राङला चेलागदेदा चुह्रङ् भिसी सुङ्जी, “एनीगदेसे तिरेकुनु परमेश्वरसे पुइखबा म्हिदा च्याबा सेम लला, तसैनोन एनीगदेसे आम्राङ्। 23 म्हिगदेसे एनीगदेदा थे थेरी मुला, चुरी मुला भिसी भिला, जमा धुइरी एनीगदे थानिउ ओच्छे थेनीगदेला लिच्छा थाभ्रउ। 24 तिग्दा भिसम परमेश्वरसे पुइखबा म्हि तिप्लीङ खबा धुइरी मुला कुनी गिकग्याम अर्गु कुनीधोना य्हाल तबा ह्रङ् तला। 25 तर ङाच्छा थेसे ल्हानान दुखदेन म्हिगदेसे लबा बिरोध नातोःबा मुला।
26 “ओन्मा नोआला धुइरी तबा ह्रङ्नोन परमेश्वरसे पुइखबा म्हि दोःसी खबा धुइरीनोन तला।[c] 27 नोआ पानी जहाजरी वाङ्बा धिनकुनुधोना म्हिगदे चबा थुङ्बादेन ब्याह लबान मुबा। थेनोन धुइरी नामदेन भाल बाढी खसी जम्मान नाश लजी।[d]
28 “थेह्रङ् लसीन लोतला धुइरीनोन कोइ म्हिगदे चबा थुङ्बा, कोइ म्हिगदे ग्लुबा चूङ्बा, कोइ सूबा ओच्छे कोइ म्हिगदे दिम स्होबान मुबा। 29 लोत सदोमग्याम थोन्माकुनुन मुग्याम मेदेन बारूद ताइसी जम्मान नाश लजी।[e]
30 “परमेश्वरसे पुइखबा म्हि खबा धुइरीनोन थेह्रङ्नोन तला। 31 थे धुइरी तलाथोरी मुबा म्हिगदे ह्राङला सामान किन्बारी मार फाप्सी दिम न्हङरी थावाङ्गो, ओच्छे बुरी मुबागदेएनोन दिमरी दोःसी थानिउ।[f] 32 थेह्रङ् लसीन एनीगदेसे लोतला म्रिङदा तबा ताम ढन्गो। 33 तिग्दा भिसम जुन म्हिसे ह्राङला ज्यान जोगब लबारी म्हाइला थे म्हिसे जुकजुकधोनाला जुनी आयाङ्। तर ङाला लागिरी ज्याननोन पिन्खम्बा म्हिसे जुकजुकधोनाला जुनी याङ्ला। 34 थेतबासेलमा एनीगदेसे ङाला ताम ङ्यान्गो, म्हुनङ ग्ला गिकरीन म्हेर्सी चिबा म्हि न्ही न्हङरी गिकदा भोर्ला गिकदा थेरीन ख्लाला। 35 ओच्छे ह्रान्दारी ब्रा स्याङ्सी चिबा म्रिङम्हेमे न्ही न्हङरी गिकदा भोर्ला गिकदा थेरी ख्लाला। 36 थेह्रङ् लसीन बुरी मुबा म्हि न्ही न्हङरी गिकदा भोर्ला, गिकदा ख्लाला।”[g]
37 जमाहेन्से चेलागदेसे येशूदा “खानङ प्रभु?” भिसी ङ्योइमा, येशूसे थेनीगदेदा “जुन ग्लारी सिबा जन्तु मुला थेरी गिद्धागदे पोप तमुला” भिसी सुङ्जी।
<- लूका 16लूका 18 ->