5 “ओच्छे एनीगदे जुन दिमरी वाङ्ला ङाच्छा ‘थे दिमला म्हिदा शान्ति तगै’ भिसी मोलम पिन्गो। 6 थे दिमरी एनीगदेदेन छ्याम ढिक्बा म्हि मुसम थेनीगदेसे शान्ति याङ्ला। तर एनीगदेदेन छ्याम ढिक्बा म्हि आरेसम एनीगदेसे पिन्बा मोलम एनीगदेदान दोःसी खला। 7 ओच्छे थेनीगदेसे एनीगदेदा जस्तो चबा स्हे पिन्सै चबा थुङ्बा लसी थेनोन दिमरी चिउ। तिग्दा भिसम गे लबा म्हिसे ज्याला याङ्तोःमुला। ओच्छे एनीगदे दिम दिमरी वाङ्सी ज्यबा ज्यबा चबा स्हे म्हाइसी थाभ्रउ।[c]
8 “थेह्रङ् लसी एनीगदे शहरगदेरी निबा धुइरी थे शहरला म्हिगदेसे मान लसी चबा थुङ्बारी पिन्बा स्हे चउ। 9 ओच्छे थेरी आखम्बा म्हिगदेदा खम्ना लउ, ‘ओच्छे परमेश्वरला य्हुल्सा खसी जिन्बा मुला’ भिसी थेनीगदेदा पाङ्गो। 10 तर खजिबै शहररी एनीगदे निमा थे शहरला म्हिगदेसे एनीगदेदा मान आलनी भिसम थे शहरला ग्यामरी थोन्सी, 11 ‘ङन्से ङन्ना काङरी भेर्बा एनीगदेला नाम्साला धुलु सुत्तै एनीगदेलान नाम्सारी खर्बा मुला। तिग्दा भिसम ङन्से पाङ्बा ताम एनीगदेसे आङ्यान्नी। तर च्यागो, परमेश्वरला य्हुल्सा खसी जिन्बा मुला भिबा एनीगदेसे था याङ्गो’ भिसी थेनीगदेदा पाङ्गो। 12 एनीगदेसे ङाला ताम ङ्यान्गो, परमेश्वरसे निसाफ लबा धिनकुनु थे शहरला म्हिगदेला गति भन्दा मी सदोम[d] शहरला म्हिगदेला गति नाखम्बा तला।
13 “खोराजीनदेन बेथसेदाला म्हिगदे, एनीगदेसे परमेश्वरग्याम सजाय याङ्ला। तिग्दा भिसम एनीगदेला नाम्सारी लबा ह्रङ्बा उदेकला गेगदे टुरोसदेन सीदोन शहररी लबा हिन्सम ओन्मान थेनीगदेसे बोरा क्वान्सी मेफ्रा फोर्सी ह्राङ ह्राङला पाप ख्लासी परमेश्वरपट्टि दोःसेला मुबा 14 तर परमेश्वरसे निसाफ लबा धुइरी एनीगदेला गति भन्दा टुरोसदेन सीदोनला म्हिगदेला गति नाखम्बा तला। 15 कफर्नहुमला म्हिगदे, तिग एनीगदे स्वर्गरीन धोला भिसी म्हन्मुला? आधो! एनीगदेदा मी नर्गरी भ्याङ्ला।”
16 येशूसे ह्राङला चेलागदेदा “एनीगदेला ताम ङ्यान्बासे ङाला तामदाएनोन ङ्यान्ना, एनीगदेला ताम आङ्यान्बासे ङाला तामएनोन आङ्यान। ओच्छे ङाला ताम आङ्यान्बासे ङादा पुइखबाला तामएनोन आङ्यान” भिसी सुङ्जी।
21 थेनोन धुइरी येशूथोरी परमेश्वरला आत्मा फेप्खजी। ओच्छे येशू ताङ्सी, “मुदेन जम्बुलिङला प्रभु आबा, ह्राङदा धन्यवाद मुला, तिग्दा भिसम ह्राङसे ज्ञान बुद्धि मुबा म्हिगदेदेन सेबा घोबा म्हिगदेग्याम छुम्सी थान्बा ताम तिगै आसेबा म्हिगदेदा उन्सी पिन्जी। हिन्ना आबा, चुह्रङ् लमान ह्राङ ताङ्जी।
22 “ङाला आबासे ङादा जम्मान स्हे जिम्मा पिन्बा मुला। ओच्छे ङा खाल भिसी ङाला आबादा बाहेक स्य्हान्दो खालैदा था आरे। थेह्रङ् लसीन आबा खाल भिसी झादेन झासे आबादा ङोसेना लबा म्हिगदेसे बाहेक स्य्हान्दो खालैदान आबा खाल हिन्ना भिसी था आरे।”
23 जमाहेन्से येशू ह्राङला चेलागदेपट्टि दोःसी थेनीगदेदा जे चुह्रङ् भिसी सुङ्जी, “एनीगदेसे म्राङ्बा मुला, चु ताम म्राङ्बागदे चा परमेश्वरग्याम मोलम याङ्बा म्हिगदे हिन्ना। 24 तिग्दा भिसम ल्हानान अगमवक्तागदेदेन ग्लेगदेसे एनीगदेसे म्राङ्बा चु तामगदे च्याबारी म्हाइमुबा। तर थेनीगदेसे आम्राङ्नी, ओच्छे एनीगदेसे थेःबा ताम थेनीगदेसे थेःबारी म्हाइजी, तर थेःबारी आम्याङ्नी।”
25 तिरेकुनु यहूदी धर्मगुरु गिक येशू मुबा ग्लारी खसी येशूला सेम च्याबारी थेसे “गुरु जुकजुकधोना आसिबा जुनी याङ्बारी ङाइ तिग लतोःला?” भिसी ङ्योइमा, 26 येशूसे थेदा “परमेश्वरसे मोशादा पिन्बा ठिमरी तिग भ्रिबा मुला? एसे पढब लबा आरे?” भिसी सुङ्जी। 27 जमाहेन्से थेसे येशूदा “ह्राङला सेमहेन्सेन, ह्राङला प्राणसे, ह्राङला बुद्धिसे ओच्छे ह्राङला शक्तिसे एसे परमप्रभु ह्राङला परमेश्वरदा माया लउ। ओच्छे एसे ह्राङला खिम्जेमदा ह्राङदा ह्रङ्नोन माया लउ” भिसी भ्रिबा मुला। 28 भिसी भिमा, येशूसे थेदा “एसे ठीक भिजी दाहेन्से एसे थेह्रङ्नोन लउ। जमाहेन्से ए जुकजुकधोना सोला” भिसी सुङ्जी। 29 तर थे म्हिसे ह्राङसे ह्राङदान ङा ठीक मुला भिसी उन्बाला लागिरी “थेह्रङ् भिसम ङाला खिम्जेम खाल हिन्ना?” भिसी येशूदा ङ्योइजी।
30 जमाहेन्से येशूसे थेदा चुह्रङ् भिसी सुङ्जी, “च्यागो, म्हि गिक यरूशलेमग्याम यरीहो भिबा ग्लापट्टि निबान लमा थेदा य्होगदेसे स्याप्सी लिगन्डीन लसी सिबाधोनान तोजी। 31 ओच्छे छिन्नङ लिच्छा परमेश्वरला मन्दिररी पूजा लबा म्हि थेग्यामसेन खजी। तर थेसे थे य्होगदेसे तोसी सिबा तेबान तबा म्हिदा म्राङ्सीनोन आम्राङ्बा स्होसी निजी। 32 थेह्रङ् लसीन स्य्हान्दो लेवी गिकएनोन थेग्यामसेन खजी थेसेनोन थे सिबा तेबान तबा म्हिदा म्राङ्सीनोन आम्राङ्बा स्होसी निजी। 33 तर स्य्हान्दो सामरी य्हुलला[e] म्हि गिकएनोन थेग्यामसेन खजी। थे सिबा तेबान तबा म्हिदा म्राङ्सी थेदा ल्हानान दया रेःजी। 34 जमाहेन्से थे सिबा तेबान तबा म्हि मुबा ग्लारी निसी थेसे थे म्हिला पोरगदेरी छ्युगुदेन अङगुरला निङगु फोर्सी क्वानगेनसे खीजी। ओच्छे थेसे थे म्हिदा ह्राङलान गधाथोरी थान्सी म्हिगदे बास चिबा पाटी गिकरी भोर्सी म्हुन गिक ह्राङसेन थे म्हिला सयार लजी। 35 न्हङगरदङ निबा धुइरी थेसे थे पाटीला धनीदा म्हुइला डबल न्ही पिन्सी थेसे ‘ज्यना लसी चुला सयार लउ, अझ खर्च ल्हानान निसम ङा दोःसी खमा ह्राङदा पिन्ना’ भिसी भिजी।”
36 येशूसे थेदा “एला बिचाररी चु म्हि सोम न्हङरी खजिबा चा थे य्होसे स्याप्बा म्हिला खिम्जेम तजी?” भिसी ङ्योइमा, 37 थेसे येशूदा “थे य्होगदेसे तोबा म्हिदा दया लबा म्हि” भिसी भिजी।
- a मत्ती ९:३७-३८
- b मत्ती १०:१६
- c १ कोर ९:१४; १ तिमो ५:१८
- d उत्पत्ति १९:२३-२९ “सदोम” भिबा चा शहर हिन्ना। थेदा परमेश्वरसे नाश लजी। तिग्दा भिसम थे शहररी ल्हानान नइबा गेगदे लमुबा। चु ताम, मत्ती ११:२३-२४; लूका १०:१२, १७:२९; रोमी ९:२९; २ पत्रुस २:६; यहू १:७; उन्बा ११:८ पदरीएनोन मुला।
- e “सामरी य्हुल” चा यहूदीगदेला लागिरी जजा य्हुलला म्हि हिन्ना।