5 थे धुइरी परमेश्वरदा तेन्बा यहूदीगदे जम्बुलिङला जम्मान य्हुल्साग्याम यरूशलेमरी खसी चिबा मुबा। 6 चुह्रङ्बा काइ थेःमाहेन्से थेरी म्हिगदे पोप तजी। ओच्छे प्रभु येशूदा विश्वास लबा म्हिगदेसे ह्राङ ह्राङला ग्योइरी ताम पाङ्बा म्राङ्सी थेनीगदे उदेक म्हन्जी।
7 जमाहेन्से थेनीगदे उदेक तसी चुह्रङ् भिबारी छ्याइजी, “तिग चु ताम पाङ्बा जम्मान म्हिगदे गालीलला आहिन? 8 तर चुगदेसे खाह्रङ् लसी य्हाङ ह्राङ ह्राङला ग्योइ पाङ्खम्जी! 9 य्हाङ चुरी पार्थीला म्हिगदे, मादीला म्हिगदे, एलामला म्हिगदे, मेसोपोटामीयाला म्हिगदे, यहूदियाला म्हिगदे, कापाडोकियाला म्हिगदे, पोन्टसदेन एशियारी चिबा म्हिगदे हिन्ना। 10 ओच्छे फ्रिगियाला म्हिगदे, पामफिलियाला म्हिगदे, मिश्रदेन कुरेनीरी परब तबा लिबियाला ङाम ङामला ग्लागदेदेन रोमग्याम खबा 11 यहूदीदेन यहूदी धर्म तेन्बा अर्गु य्हुलला म्हिगदे मुला। ओच्छे क्रेट य्हुल्सारी चिबा म्हिगदेदेन अरबीला म्हिगदेएनोन मुला, थेनीगदेसे मी य्हाङला ह्राङ ह्राङलान ग्योइरी परमेश्वरसे लबा घ्रेन गेला बारेरी पाङ्बान चीम।
12 चुह्रङ्बा म्राङ्सी थेनीगदे जम्मान उदेक तसी अलमल तसी गिकसे गिकदा “चु तिग तबा?” भिसी ङ्योइबा छार्बा लबारी छ्याइजी। 13 तर स्य्हान्दोगदेसे थेनीगदेदा “चुगदे मी कलिलो निङगुसे ङ्य्होइजीम” भिसी खिसी लजी।
22 “इस्राएलला म्हिगदे ङाला ताम ङ्यान्गो, परमेश्वरसे येशूग्याम ह्राङनीला गुङरी शक्तिशाली गेगदे लबान उदेकला चिनुगदे उन्बा ताम ह्राङनीदा थानोन मुला। थे चिनुगदेग्याम परमेश्वरसे नासरतला येशूदा ङाइनोन पुइखबा हिन्ना भिसी उन्बा मुबा। 23 परमेश्वरसे ङाच्छान म्हन्बा अन्छार येशूदा ह्राङनीसे चुङ्जी। ओच्छे येशूदा ह्राङनीसे पापी म्हिगदेला यारी जिम्मा पिन्सी क्रुसरी टाँगब लसी साइपुङ्जी।[d] 24 तर येशूदा सिबाला शक्तिसे साइबाला साइबान लबारी आखम्नी। तिग्दा भिसम परमेश्वरसे येशूदा सिबाला दुखग्याम फेसी सोना लजी।[e] 25 तिग्दा भिसम दाऊद ग्लेसे येशूला बारेरी चुह्रङ् भिबा मुला,
29 “ज्योज्यो आले नाना आङागदे, ङाइ य्हाङला म्हेमे दाऊद ग्लेला बारेरी ढुक्क तसी पाङ्ला। थे सिसी ल्हुजी, ओच्छे दान्देधोना थेला धुर्सा मुनोन मुला। 30 दाऊद ग्ले अगमवक्ता तबासे लमा थेला ग्लारी ह्राङलान सन्तानना गिकदा परमेश्वरसे ग्ले स्होला भिसी परमेश्वरसे कबुल लबा ताम थेदा था मुबा।[g] 31 परमेश्वरसे लिच्छा तिग लला भिसी दाऊदसे ङाच्छान म्राङ्मुबा। थेतबासेलमा थेसे थार्बा पिन्बा ख्रीष्ट सिबाग्याम सोला भिसी चुह्रङ् भिमुबा, ‘थेदा सिबागदे निबा ग्लारी आख्लानी ओच्छे थेला सिबा ल्हुइ नइना आलनी।’
32 “ओच्छे चुनोन येशूदा परमेश्वरसे सिबाग्याम सोना लजी। चु तामला ङनी जम्मान साक्षी मुला। 33 परमेश्वर आबासे येशूदा घ्रेन मान पिन्सी ह्राङला दाहिने छ्यापट्टि थान्जी, ओच्छे कबुल लबा अन्छार परमेश्वरसे येशूदा ह्राङला आत्मा पिन्जी। दान्दे ह्राङनीसे म्राङ्बा चु तामदेन थेःबा तामगदे थेनोन परमेश्वरला आत्मा प्रभु येशूसे ङन्दा पिन्बा हिन्ना। 34-35 दाऊद ह्राङनोन स्वर्गरी आनिनी, तर थेसे चुह्रङ् भिसी भिबा मुला,
36 “थेतबासेलमा इस्राएलला जम्मान म्हिगदेसे चु ताम पक्का हिन्ना भिसी था याङ्गै, जुन येशूदा ह्राङनीसे क्रुसरी टाँगब लसी साइबा मुबा, थेनोन येशूदा परमेश्वरसे प्रभुदेन थार्बा पिन्बा ख्रीष्ट स्होबा मुला।”
37 जमाहेन्से पत्रुसला ताम थेःसी थेनीगदेला सेमरी ल्हानान दुख तजी, ओच्छे पत्रुसदेन स्य्हान्दो मुल चेलागदेदा “दाहेन्से ङन्से तिग लतोःला ज्योज्यो आले?” भिसी ङ्योइमा,
38 पत्रुससे थेनीगदेदा चुह्रङ् भिसी जोहाब पिन्जी, “दाहेन्से एनीगदेसे ह्राङ ह्राङला पाप ख्लासी परमेश्वरपट्टि दोःगो। ओच्छे पाप माफ याङ्बाला लागिरी एनीगदेसे येशू ख्रीष्टला मिनरी बप्तिस्मा किन्गो। जमाहेन्से एनीगदेसे परमेश्वरला आत्माला मोलम याङ्ला। 39 तिग्दा भिसम परमेश्वरसे लबा चु कबुल एनीगदेदेन छ्याम एनीगदेला कोलागदेला लागिरी हिन्ना, ओच्छे य्हाङला प्रभु परमेश्वरसे ङ्योइबा थारेङ थारेङ चिबा जम्मान म्हिगदेला[i] लागिरीनोन हिन्ना।”
40 ओच्छे पत्रुससे ल्हानान तामग्याम होशियार तना लजी। ओच्छे थेनीगदेदा अर्ती पिन्बान, “दान्देला नइबा म्हिगदेथोरी खबारी छ्याइबा सजायग्याम एनीगदे ह्राङनोन जोगब तसी चिउ” भिसी भिजी।
41 जमाहेन्से ल्हानान म्हिगदेसे पत्रुससे पाङ्बा तामरी विश्वास लसी बप्तिस्मा किन्जी। थेनोन धिनकुनु थेनीगदेला गुङरी विश्वास लबा म्हिगदे ओस्पन हजार सोम ते बढब तजी।
- a लेवी २३:१५-२१; व्यव १६:९-११
- b “परमेश्वरला आत्मासे प्लिङ्जी” भिबा चा म्हिदा परमेश्वरला आत्माला शक्तिसे पूरान चलब लबा हिन्ना।
- c योए २:२८-३२
- d मत्ती २७:३५; मर्कू १५:२४; लूका २३:३३; यूह १९:१८
- e मत्ती २८:५-६; मर्कू १६:६; लूका २४:५
- f भजन १६:८-११
- g भजन १३२:११; २ शमू ७:१२-१३
- h भजन ११०:१
- i “थारेङ थारेङ चिबा जम्मान म्हिगदे” भिबा चा लिच्छा लिच्छाला म्हिगदे अथवा थारेङ थारेङला ग्ला हिन्ना।
- j मुल ४:३२-३५