OWUSASUKO
owua Yowaana
Amangʼana ku owuimpi
Omujoji owa owusasuko wuno, ari Omutumwa Yowaana wamwawu Yakoobo. Yagijoja lunyima mu emiaka egituukre egia 90–96 no Omwami Domiitia yawanga omukangasi owa Rooma. Ebuuki eno eetwa mbwe owusasuko aeniki munsi yayo garimo owusasuko na amalooto aga Yowaana yawona na ari mu owusiwe ku ekizinga ekia Patiimo. Owufwanani owua amangʼana agari mu ebuuki eya owusasuko eno, na agari mu injiili eya Yowaana, gasimbiizia amaingirizio mbwe Yowaana ono nio owazijoja ziona. Kufwanana mbwe yajoja ebuuki eya owusasuko mu Olugiriiki na ari na amaingirizio aga Omuibrania.
Mu amiire aga ebuuki eno, no Omwami Niiro yawanga omukangasi owa Rooma, Awakristo waawona eminyako-nyaako emilulu egiluguulwa. Gano nigo amiire aga Petro ni Paulo waaitrwamo. Lunyima ni Domiitia yatoola owuami, eminyako-nyaako gino giaisonga. Awaruumi waataao mbwe Omwami nio owawanga ki katonda waawu owa awantu woona wasugaane wasawe. Na Awakristo waalowa okusawa Domiitia. Kuno kwagera Omwami Domiitia afumia ensikirra mbwe Awakristo wanyaasiwue wululu. Yowaana yairwa mu owusiwe mu ekizinga kino ku amangʼana gazani ago. Kutio, yajoja ebuuki eno okuambia Awakristo amaani kugere walowe wukalu okunigiriziwua okusawa awaami awa Rooma. Awalaga mbwe iiye erituukre agati ya Katonda ni Sataani paka rituuke. Sataani aaza okusonga eminyako-nyaako giae ku awari no okuganya ku Kristo, ni paka waimerre wukalu namba ni waitwa. Iwo wasanikiirwe na amaani aga Omwoyo Omweru owarinda ku ekintu-ukintu ekikawanyaasia omwoyo, kandi waaza okuwulusiwua ni Kristo airaane. Awooni wariluumwa mu omurro waonwe chwe, na awantu awa Katonda iwo wari-ingira mu owulamu owutariwua okumenya no owusangaavu amiire goona.

Amangʼana ku owuimpi

1 Wuno no owusasuko owua Katonda ya-aa Yesu *Kristo okulaga *awakurumu waae ku ewintu ewia paka wiikole ku wuangu. Yesu Kristo yalagana ewintu wino ku owueru olwa yatuma *enyankoi waae okundeetra owutumwa wuno, inze Yowaana omukurumu waae. 2 Wuno katio njoja amangʼana goona ku ewintu wiona ewia nyawona ku amangʼana aga Katonda, kandi ku ewintu wiona ewia Yesu Kristo yawoola kandi akola.

3 Awantu awasoma owugambi wuno, na awawuwurra kandi waingizia amangʼana aga owugambi agajojrwe gano mu emioyo giawu wasereekwe, aeniki enyinga ezia ewintu wino wiiza okuikola ziri ampi okutuuka.Owus 22:10

Amakeezio aga Yowaana

4 Inze Yowaana, mbajojera ebaruwa eno inywe Awakristo awari mu amakaniisa musamvu agari mu ekitemo ekia *Eesia.

Muwe no owuolu no owusiza owua Katonda orio, omiire okuwaao kandi ooza okuwaao, kandi owua emioyo musamvu awari emberi wa entewe eya *Owuami owua Katonda. 5 Kandi muwe no owuolu no owusiza owuemere ku Yesu Kristo owoola owuene ku amangʼana aga Katonda, owasooka okuziuka okuema ku awafu, kandi ori omukangasi owa awaami woona awari ku ekialo. Kristo otugonziizie kandi owatununula mala atugawula no owuoni wuifu na amasaai gaae, 6 nio owatuta mu owuami wuae kandi agera tuwa *awoozia awa Katonda Swae. Ka-aeewue owunene na amaani amiire goona! *Amin.

7 Muwurre! Aaza okuuza mu amare kandi awantu woona, namba awaamufumuta na amafumo woona, warimuwona. Kandi enganda ziona ezia awantu awa ku ekialo zirirra wululu olwa ariiza. Ee, nintio kuuza okuikola! Amin.Zaka 12:10; Math 24:30; Yowa 19:34, 37 8 *Omwami Katonda owa amaani goona orio, omiire okuwaao kandi ooza okuwaao awoola otino, “Inze ni inze *Alfa kandi Omeega, Owutaniko kandi Owutuuko.”Isaa 44:6; Owus 1:17; 2:8; 21:6; 22:13

Owusasuko owua Yesu ori Omwami oziukre

9 Inze Yowaana, wamwinyu ku Kristo, ori ni inywe alala mu Owuami owua Katonda, kandi mu okusikia omwoyo, ni mu eminyako-nyaako ku amangʼana aga Yesu, nyairwa mu ekizinga ekietwa mbwe Patiimo aeniki nyalanzianga amangʼana aga Katonda, kandi ku okuwa okwa nyawanga omuwoni owa amangʼana amalootu aga Yesu. 10 *Omwoyo Omweru ogwa Katonda yambangako, nyanga olwa omudiira ogwa okuwiri kandi nyawurra omwoyo ni gurra wukalu ki olwiga, enyima wange. 11 Omwoyo ogwo gwandaga gutino, “Joja ewintu ewia owona wino mu ebuuki nikwo otume ebuuki eyo ku Awakristo mu amakaniisa musamvu aga Efeeso, Simirna, Pagamuumi, Thiatiira, Sadiisi, Filadelfia ne eya Laodeesia.”

12 Nikuemao, nyagaluka okuwona omwene omwoyo ogwagamba-gambanga ni inze oyo. Olwa nyagaluka otino, nyawona ewintu musamvu ewilongrwe ne edhaabu ewia ewimuri witeewuako. 13 Nyawona ofwanana no omuzia owa omuntu†Dani 7:13 na aiwooye enguwo endiire etuuka ku amagulu ansi, ne ekitambaaya ekia edhaabu ku ekifuwa kiae, na aimeriire agati ya ewintu musamvu ewio.Dani 7:13–14 14 Emvwiri ezia ku omutwe gwae ziawanga enzeru zerre kandi amiiso gaae gaemanga ki omurro. 15 Amagulu gaae gaafwananga ne efeedha elongerwe geeza eakaka no owuakanyu owua ekiuma ekiteerwe mu omurro omuyu le, kandi omwoyo gwae gwafwananga na amanzi agaolomoka. 16 Nyakukono kwae okusaaza, yawanga na agingre engʼeni-ngʼeni musamvu. No omwambe omwogi oguri ne eminwa iwiri gwafumanga mu omunwa gwae, kandi ekieni kiae kiawalanga wukalu ki owueru owua enyanga owudangaazia.Awaib 4:12; Owus 2:12, 16; 19:15, 21 17 Olwa nyamuwona-uwona otino, nyagwa ansi ku amagulu gaae ki omuntu ofwire. Ni iye yagolola okukono kwae okusaaza antaako na andaga otino, “Otawa no owuti! Inze ni inze Owutaniko kandi Owutuuko,Dani 8:17; Owus 1:8 18 lwona ni inze orio omulamu. Nyawanga ni mfwire, ni wona, nyingeeno ndi omulamu amiire goona agawula ne entuuko, kandi ni inze ori ne ekifunguo ekia olumbe ne ekia asi aa awantu awafwire mu owuoni wari.Awaru 14:9; 1Kori 15:25–26 19 Kutio nyingeeno joja ansi mu ebuuki eyo ewintu ewia owuine, ewintu ewiikola ne ewiiza okuikola emberi. 20 Amangʼana agaiwisre agari ku engʼeni-ngʼeni musamvu ezia wawuine mu okukono kwange okusaaza, ne ewintu musamvu ewia edhaabu ewia ewimuri witeewuako gari gatino: engʼeni-ngʼeni musamvu, ziimeriire enyankoi musamvu awa amakaniisa musamvu. Ne ewintu musamvu ewia edhaabu ewia ewimuri witeewuako, wiimeriiire amakaniisa musamvu ago.”

OWUSASUKO 2 ->