1 Arinai ede isi Iesu Keriso boeana eai nige edi abahebaaeadi, isi buluma dobilana nige se laulauwatai, na Earua mo se laulauwatai. 2 Paana mauri Earuana laugagaeona Keriso Iesu boeana eai, baaea eo mate laugagaeona eai i iairihaiguo. 3 Na saha wa laugagaeo nige abina i ata i abi paana, buluma eai, i beruberu, Eaubada ia Natuna baaea hesabana i hetamariyama, ana ao hinage doha buluma baaeana, na ia buluma eai baaea i awabaaeaei. 4 Laugagaeo laulau‐duduraina abo se hemamohoiei ita boeada eai wa ita nige buluma ta lauwatai, na Earua mo ta lauwatai. 5 Isi buluma se lauwatai, buluma ginauridi mo se nuatuidi; na isi Earua se lauwatai, Earua ginauridi se nuatuidi. 6 Paana nuada eai buluma ginauridi ta nuanuatuidi ta mate; na Earua enana ta nuanuatuidi abo ta mauri eo ta loni. 7 Paana buluma nuatuna ta nuatu‐daoiei Eaubada abo ta hewaiunuei ede, Eaubada ena laugagaeo nige ta awaabiei, nige abina ta ata. 8 Isi buluma nuanuatuina eai se laulau, Eaubada henualolona abina nige se ata.

9 Na omi nige buluma boeana eai, na Earua boeana eai, ena Eaubada Earuana i miamia boeamiu eai. Ena tau esau Keriso Earuana nige i abi ia nige Keriso enana. 10 Eo ena Keriso i miamia nuaboeamiu eai taumiu ena se mate baaea debana eai, taiede earuamiu se mauri laulau‐dudurai debana eai. 11 Na taba Iesu mate eai tauhetorouioina Earuana i miamia nuaboeamiu eai, ia Keriso mate eai i hetorouioi wa taumiu posaposadi abo i hemauridi, Earuana i miamia boeamiu eai wa debana eai.

12 Egu tataoyao e, ita buluma nige ta mose‐hagai, buluma gadosisina ata ta lauwatai. 13 Ena buluma gadosisina au lauwatai, abo au mate; na ena Earua debana eai taumiu laulaudi au unuidi, abo au mauri. 14 Paana isi gamagamagaridi Eaubada Earuana i woeawoeaidi, isi Eaubada nanatunayao ede. 15 Paana omi earuamiu taba nige au abiuioidi doha se paiuioimiu, eo doha matausi arinai au guriuio; na omi gigiori earuana au abi, au hemala‐natu. Arinai ena ta eaba lailai ta ene “Aba! Tamada e!” 16 ia Earuana ma earuada ede se oiribaribaei, ita Eaubada nanatunayao; 17 na taba ita ia nanatunayao ita hinage ena gogo tauabina, eo Keriso maeda tau‐abiesegaina, ena taba ena amamna ta hearoesegai eo maeda ena hedebasae ta hearo hinage.

18 Amamna wa huia ta ta abidi se gagiri ariri, hedebaesae abotai abo se hemasarahayama boeada eai, meta mo ea nuatui ede i lai ariariri. 19 Ginauri eo abi gamagamagari se hetubudi wa, Eaubada nanatunayao edi hedebasae se bagibagiwatai, ma‐nualelehidi. 20 Paana ede abi gamagamagari se hetubudi se guridobi, se laulau gaibu mo, isi nige edi nuatu eai na tauheguridi mo ena nuatu eai se laulau; edi sunusunuma paana 21 ede abi gamagamagari posaposadi adi auau eai abo se hemauridi, eo abo se lulagema Eaubada nanatunayao edi iairihai lolo‐dumadumana eai. 22 Ita ta nuatui abi gamagamagari se ohihai se lepalepagogo, eo se amamna ariri i laoma e huia ta. 23 Nige isibom mo, na ita hinage Earua ena uaua ealahouna tauabina, ita hinage ta lepalepa nuaboeada eai, gigiorina ta bagibagiei, ia ede tauda wa abo se hemauridi. 24 Paana ita sunuma debana eai ta mauri; na sunuma ne se itaitai, meta nige sunuma mamohoina; tau ginauri matana eai ie ita saha abo i sunumaei? 25 Na ena ginauri nige ta ita, ta sunumaei, iaede abo ta bagiwatai, ma‐nuapaipaida.

26 Doha hinage eda beruberu eai Earua i sagusaguida, saha eo saha bena ta lau‐uuraedi, duduraina nige abina ta ata, na Earua iabom enada i aiboda gadogadora, taba nige ta ribaei, nige arinana. 27 Nuataueooidi Earua ena nuatu aniona i itayao, paana ede ia hetabu tataodi enadi i aiaiboda, Eaubada ena nuatu mo i lauwatai.

28 Ta nuatuiyao ginauri gamagamagari se lauloloesegaidi isi Eaubada taugadosisiena aridi eai, isi ia ena nuatu eai se eogahaidi. 29 Na isi i ita‐nonohaidio hinage i henuatu‐auridio ia Natuna ana ao abo hinage se abiwatai, ena tataoyao gamagamagari aridi eai ia bena abo i hemala natu‐ealahouna. 30 Isi i henuatuauridio wa, hinage i eogahaidi; isi i eogahaidi wa, hinage i heduduraidi; eo isi i heduduraidi wa, hinage i hedebasaedi.

31 Teina ribadi ta aridi eai abo ta ene edoha? Taba Eaubada i torotaunida, eai abo i guduguduida? 32 Ia, Natuna nige i nuahi na ita gamagarida debada eai i moselaei, ia maena hinage abo ginauri gamagamagari i ledima‐esegaidima, e nige’e? 33 Eaubada ena tauhinehineri tataodi, eai abo riba esau arinai i hegirudi? Eaubada ia tauheduduraina ede. 34 Eai abo i riba‐hebaaea? Keriso Iesu ie mate ede, taiede i torouio, ia Eaubada nimatutuna eai ie mia, eo enada i aiaiboda. 35 Keriso ena gadosisi eai ta, eai abo i abihesuarada? Amamna lailai e, nuadubu e, se hebaaeada e, guriam e, tauahaaha e, mate hanahanau e, elepa wa? 36 Doha se uriyao si ene,