1 Abo goila mauri sagana i heitagu, i namanamari ariri doha galasi, Eaubada ena terona, eo Mamoe enana, boeana eai i didima, 2 eo eanua dobilana duaduarina eai. Saga wa tupo eai ta eo hari sanaawasi eai, ede mauri oeagina, uauana udoudoi adi ao saudoudoi‐labui, aiaidi se toredi nawalai to nawalai; eo oeagi ta luguluguna basileia gamagari aba‐hemauridi ede. 3 Taba nige ribahemate i tubuuio nei eai, Eaubada ena terona, eo Mamoe enana, isi ede metai, ia ena heaheari tataodi ia se aiaihelahui; 4 ia matana abo se ita, ia esana abo se abi deba‐pogadi eai. 5 Taba nige i maionauio; taba nige lamepa marana se hepaisoai, taba nige mahana marana se nuatui paana Guiau Eaubada ia abo maradi ede, eo isi ma‐tanuagadi eai abo se mia i lau i lau e huia nige nosina.

6 Abo i ribalaoma arigu eai i ene, “Teina riba ta miatahitahidi, mamohoidi ede. Eo Guiau, peroveta earuadi edi Eaubada, ena aneru i hetamariyawa, ginauri nige baeaona abo se tubu, ena heaheari tataodi bena i heita‐nonohaidi. 7 Au ita, nige baeaona, ea heuheulawa.”

Kausara ia, buka ta riba‐perovetana tausogohina, nuana abo i woiwoina.

8 Eau Ioane, eau ede ina ginauri ta tauataiedi eo tauitadi. Huia ne ea ataiedi eo ea itadi, ea gurisalaoba aneru aena paana eai, wau ginauri tauheitagu wa bena ea aihelahui; 9 na i ribalaoma arigu eai i ene, “Tabu u ginauri doha nei! Eau hinage helem tauheaheari esau, eau maem ta, eo em tataoyao peroveta maedayao gonogonoada, eo tatao gamagaridi buka ta tausogohina. Eaubada u aihelahui.”

10 I heribagu i ene, “Ina buka ta ena peroveta ribana tabu u gudutawai, paana huiana i hanahanau. 11 Tau esa ena laulau nige se dudurai, besi ena laulau wa i laelaei, eo tau‐bii besi ma‐biina eai i laulau, eo tau dudurai besi ena laulau dudurai i he‐esegai, eo ia ie aa, ma‐aana eai i laulau.”

12 “Au ita, abo ea heulama, maisa nimagu eai, esa, esa, ena paipaisoa abo ea hemaisadi, saha wa i ginauri. 13 Eau Alepa ede, eo Omega, bagubagunana eo murimurita‐aririna, hetuhetubuna eo helahelautomna.”

14 Aidobudi adi lulu se deuridi, nuadi abo se woiwoina, arinai abo edi dobila i masaraha se laoma mauri oeagina arinai, eanua‐saesaena dobilana eai se lusora. 15 Murimuri eai ede kedewa, eo tau‐tabosima, eo tau‐enoenobiri, eo tau‐aiaiunu, eo oitau tau‐tabaohuidi, eo isi gamagaridi aidobudi borabora se henua, eo se hetubu.

16 “Eau Iesu, egu aneru ea hetamariyawa ta, egu ekalesia peledi enadi bena ea riba. Eau Davida lamna eo iniinina, ipora namanamarina, ubona.”

17 Earua eo *English: Bride; Heleni: Numpiosi. Siu‐bena‐i‐tawasora si ene, “U laoma.” Tauataiena hinage taba i ene, “U laoma.” Eo tau‐gadomagu hage i laoma, e eai taba i henua, abo i laoma goila maurina i abi‐gaibui.

18 Tatao gamagaridi buka ta ena peroveta ribadi tauataiedi, ea riba‐hesanapuedi, ena taba tau esau ribana esau i tubei, iwala baaea buka eai ta se uridi Eaubada abo i peidi ia potana eai, 19 eo ena taba tau esau buka ta ena peroveta ribana esau i abihai, ia hinage ena tupo Eaubada abo i abihai, mauri oeagina eai wa, eo eanua tabuna eai, doha ede se urihemasarahadio ina buka eai ta.

20 Teina ginauridi ta tau‐hemasarahadi wa i ene, “Mamohoi ea heuheulawa.” Amen. U laoma, Guiau Iesu e!

21 Guiau Iesu ena ainauia hetabu tataodi gamagaridi bena i hearodi. Amen.

<- HEMASARAHANA 21