HEMASARAHANA IOANE ARINAI

1 Eaubada ena hemasaraha i mosei Iesu Keriso arinai, bena ginauri sora abo se tubu ena heaheari tataodi i heitadi, ena aneru i hetamari, arinai i hemasaraha ena heaheari tauna Ioane arinai. 2 Ia Eaubada ena riba i hemasarahaei, eo Iesu Keriso aba‐italobaina ribana, eo ginauri gamagaridi ie itadi wa. 3 Kausara ia, riba‐peroveta ta tauhasirina, eo tauataiena, eo ginauri se uridi ta tausogohina; paana huiana i hanahanauma ede.

4 Ioane i uriuri ta, Ekalesia bodadi Asia eai, dubu haligigi‐labui enadi:

Ainauia bena enamiu, eo loni ia arinai i laoma, ia wau‐ta ede, eo beabeana eai ia ede, eo maraitom‐asubena eai abo ia ede, eo earua haligigi‐labui aridi eai i laoma, isi ede ena terona matana eai se totoro, 5 eo Iesu Keriso arinai i laoma, ia * tauriba torotahitahina ede, eo mate eai tautorouio baguna, tanoubu ta edi wasawasa ia tanuagadi ede.

Ia taugadosisieda wa, eda baaea eai i iarihaida iabom osinana eai 6 eo i hetoroda ena basileia, ena kohena tataoda, Eaubada, Tamana wa, ia enanayao, namanamarina ia enana eo iabom tanuaga, i lau e ana huia ana tasi. Amen. 7 Hage au ita, eada boeana eai abo i laolaoma, tatao gamagamagari abo se ita, eo isi gamagaridi hinage ia taugorina wa, eo tanoubu ta bodadi gamagaridi abo se doudou ia debana eai. Hedeona. Amen.

8 “Eau †Arina Heleni eai Ieta bagubagunana eo murimurita‐aririna esadi. Alepa eo Omega, hetuhetubuna eo helahelautomna,” Guiau Eaubada ena riba ina, ia wau‐ta wa ede, eo huia beabeana eai ede, eo maraitom‐asubena abo i laoma ede, Taugigiborina maudoudoina wa.

9 Eau emi tau wa, Ioane, heamamna boeana eai ami sagu esau eau, eo Iesu Keriso basileiana boeana eai hinage, eo taubigana eai eau maemiuyao. Bonabonarua esana Patamosa eai ea mimia, nei eai Eaubada ena riba debana eai se paigu, eo Iesu Keriso ribaribaena debana eai. 10 Guiau ena asubena eai eau Earuana eai, dagelagu eai arina lailai ea ataiei, doha bogigi arinana, 11 i ene, “Eau Alepa eo Omega, bagubagunana eo murimurita‐aririna, saha u ita bena u uri buka eai, eo u hetamari dubu haligigi‐labui aridi eai, isi ede Asia eai: Epeso eai, eo Semurina eai, eo Pegamosa eai, eo Taiatara eai, eo Sadis eai, eo Piladelepia eai, eo Laodisia eai.”

12 Na ea sinibui wau arina wa i ribalaoma wa, bena ea ita. Ma‐sinisinibuigu na lamepa aba‐toredi gold, haligigi‐labui ea itadi, 13 boeadi eai esau doha Tau‐Natuna, ana lulu i lui i dobi aena eai, eo nuapouna eai ena auduaduari gold. 14 Uruna eo uruna maiawana se posiposi ariri doha mamoe wuiana posiposina, ie posi doha ‡English: snow. sinou; matana doha oeagi i ala‐balebalelem, 15 aena doha brass se wosa henamanamari, doha oeagi alaalasi eai se heaa, eo arinana daguguna doha goila gamagamagari se dididi dagugudi; 16 nima‐tutuna eai ipora haligigi‐labui i abiabididinidi, awana eai elepa‐aiaiunu mata labulabuina, eo matana ana ao doha mahana ma‐adidirina i sinasina.

17 Huia ne ea ita, ma‐esega aena eai ea gurisalaoba, doha tau ie mate, abo nimana i hetaru potagu eai, i ene, “Tabu u matausi, eau bagubagunana wa, eo murimurita‐aririna, 18 eo maumaurina wa; ea mamate, na u itagu ta ea mauri i lau e nige nosina, Mate eo Hade ki‐na ede eau nimagu eai. 19 Arinai teina ginauridi u itadi ta, u uridi, ginauri se tubuo ede, eo ginauri sora abo se tubu, maraitom‐asubena eai. 20 Ipora haligigi‐labui nimatutugu eai ue ita wa, eo lamepa abatorena gold haligigi‐labui wa, aniodi eamuyamuidi ede: ipora haligigi‐labui isi ede aneru, ekalesia dubudi haligigi‐labui anerudi, eo lamepa abatorena haligigi‐labui, isi wau dubu haligigi‐labui ede.

HEMASARAHANA 2 ->