1 Na, ena henuaadidiri Keriso arinai ie ota, eo ena gadosisi nuaamnana ie ota, eo ena Earuana heoiesegaina ie ota, eo ena nuatoatoa eo nuabigabiga se ota, 2 egu kode ta au hemamohoiei, tabu nuamiu udoi, udoi, emi gadosisi esega mo, emi nuatu esega, nuamiu esega. 3 Tabu ginauri esau lulu eo haisaesae aridi eai au haihesaba; na nuatudobidobi eai tau esau ena nuatu i ene ana sagu mo i lolo ariri. 4 Tabu tau esau eo tau esau iabom ena dobila mo i nuanuatui, na tau esau eo tau esau hari tatao edi dobila hinage se nuanuatuidi. 5 Keriso Iesu nuana omi au abi hinage, nuamiu, 6 ia itaitana Eaubada mo itaitana, ia nige i nuatui i aiaigirihai doha i ene ia eo Eaubada gonogonoadi, 7 na i hemala wasakulobai, itaitana doha tauheaheari, eo ia se ginauri ana ao doha tatao adi ao. 8 Ia i hemala tau, abo iabom i nuatudobidobiuioi, mate awaabina i awaabiei, mamohoi, satauro matena eai hinage. 9 Arinai hinage Eaubada ia i hedebasae‐aririei, ia esana hinage i mosei esadi gamagamagari i saetawatawaidi, 10 Iesu esana eai gamagaridi turidi se bonodi, galewa ginauridi, eo tanoubu ginauridi, eo tanoubu ubuna ginauridi hinage, 11 memena gamagamagari abo se ribahemasaraha, abo si ene Iesu Keriso ia Guiau ede, Eaubada Tamada arinai se hedebasaei.

12 Egu nuanuai e, doha huia gamagamagari au awaabi, na eau arimiu eai mo nige’e, huia ta ea miasuaraemiu hinage, emi mauri paisoana au paisoaei ma nuamatamatausimiu eo ma nuatabutabubumiu. 13 Paana ede Eaubada nuaboeamiu eai i paipaisoa ena nuatu lolona abo au matamatayariedi eo au abiabiwataidi.

14 Ginauri gamagaridi au paisoaedi tabu au gadigadigugu eo tabu au haiawayagara, 15 abo nige au baaea eo nige au manamanabara, Eaubada nanatunayao omi, arimiu eai nige edi abaribaribasuu, omi eanua nuanuatugewagewadi eo awaawayagaradi boeadi eai, eo boeadi eai abo au mara doha lamepa tanoubu eai, 16 mauri ribana au ribaribahemasaraha; eau bena ea kode Keriso ena asubena eai, taba nige ea aitautau gaibu, eo nige ea paisoa gaibu hinage. 17 Mamohoi, hinage ena se gabalaegu emi sunuma abaaitalasamna eai eo paisoana eai, ea kode, gamagarimiu maemiu abo ta kode esega. 18 Matapaana esega omi hinage bena au kode, ta kode esega.

19 Guiau Iesu ea sunumaei Timoteo abo ea hetamariheulaiyawa arimiu eai, wasamiu ea ataiei nuagu abo i biga. 20 Paana nige tau esau nuana doha ia, omi i nuatu aririemiu. 21 Headi, isi gamagaridi isibom edi ginauri mo se eoodadaidi, Iesu Keriso ena ginauri nige se eoowataidi. 22 Timoteo mo iilana au itayao, doha natuna tamana arinai, evanelia paisoana eai maegu i sagusaguigu. 23 Egu nuatu nige baeaona ia abo ea hetamariyawa, laulau aisana abo se abi arigu eai sora ea ita baguna. 24 Taiede ea sunuma Guiau arinai eau hinage nige baeaona abo ea laowa.

25 Na ea ’ne i lolo Epaperoti ea hetamariyawa arimiu eai, ia egu tau eo maegu ai paipaisoa, eo ai ialaesega, na ia enamiu tautauwasa, ia hinage taubobodiegu. 26 Ia omi gamagarimiu i nuanuaiemiu, hinage nuana i porohe, paana ede omi ia wasana au ataieyao, i asiebo wa. 27 Mamohoi i asiebo lailai, mate i hanahanaui; na Eaubada mo ia i nuatoatoai; hinage ia mo nige’e, eau i nuatoatoaigu hinage, ata nuadubu ea hearo nuadubu esau potana eai. 28 Arinai nuagu i gigibori ia ea hetamariyawa, bena omi ia au itauioi abo au kode, eo egu nuamode hinage bena abo ie taru. 29 Guiau boeana eai ia au abi ma nualolomiu; tatao doha meta au ribatausaedi, 30 paana ede Keriso ana paisoa debana eai mate i hanahanaui, ia maurina nige i nuatui, ami paisoa bena au abi arigu eai wa, ia ie abi.

<- PILIPI 1PILIPI 3 ->