3 Parisea hinage se laoma ia arinai, ia se nohoi, se ribalau ia arinai si ene, “Laugagaeo si ene edoha, tau, hari mata hari mata aridi eai, monena abo i inavasei, e nige’e?” 4 I ribalau aridi eai i ene, “Omi nige au hasiri si ene ia wa huia hetubudi eai i ginauridi, tau eo sine i ginauridi. 5 Eo i ene, ‘Arinai ede tau tamana eo sinana abo i laugabaedi, abo i patulau monena arinai: isi taudi labui abo bulumadi esega mo?’ 6 Arinai isi labui nige’e, isi buluma esega mo. Arinai ede, saha Eaubada i hepatuesegai tabu tau esau i abihesuaradi.” 7 Isi ia si heriba si ene, “Na Mose ie saha i lauhesomdi i ene, inawasei pepana se abi abo sine wa i inawasei?” 8 Ie ribalau aridi eai i ene, “Nuamiu se oiura ariri, arinai Mose ie eari, monemiuyao abo au inawasedi: na huia bagubaguna eai wa nige doha nei. 9 Hinage ea heribamiu ta, ea ene, eai eo eai monena i inawasei sine esau abo i tawasorai, ia i ganawari: eo eai eo eai sine se inawasei wa i tawasorai, ia hinage i ganawari. Taba sine i ganawari, taiede, taba se inawasei.”

10 Ena heaheatayao ia se heriba si ene, “Ena tau monena arinai doha nei, tawasora nige i lolo.” 11 Ia i heribadi i ene, “Tatao gamagari nige abina se ata riba ta se abi, isibom mo enadi, aridi eai se mosei. 12 Headi sinadiyao bogadi eai isi eunauka: headi tatao se heeunaukadi: headi hinage, galewa basileiana debana eai isibom nuadi se eunauka. Taba esau abina i ata riba ta i abi, abo i abi.”

13 Abo merumeru gagiridi se woeaidima ia arinai bena nimana i toresaedi potadi eai, eo i lau‐uura: na ena heaheatayao se ribamataedi. 14 Iesu i ene, “Merumeru gagiridi au eari se laoma arigu eai, tabu au guduguduidi: galewa basileiana doha isi ede.” 15 Nimana i toresaedi potadi eai, nei dimo ne abo i laugabaei.

16 Esau abo i laoma ia arinai i heriba i ene, “Tauheaheata lolona e, laulau lolona esana abo ea abi, arinai abo ea mauri nige nosina?” 17 Ia i heriba i ene, “Ue saha u awanorigu? Nige esau i lolo, esega mo, ia ede Eaubada: taba u ene bena u lage mauri boeana eai, laugagaeo u sogohididini.” 18 Ia arinai i ene, “Aitea?” Iesu i, ene, “Tabu u aiunu, Tabu u ganaganawari, Tabu u aiaiyahari. Helem taumia tabu u hegirugaibui. 19 Tamam eo sinam u eogoeogoidi: eo Helem taumia u gadosisiei doha oabom u gadosisiuioim.” 20 Hewari wa i ribalau ia arinai i ene, “Ma‐hewarigu eai wa i laoma ina ta, teina ginauri gamagaridi ea nanabuheohidio: ginauri esana ea hedeha?” 21 Iesu i ribalau ia arinai i ene, “U henua u lolo esegaim u lau em gogo gamagaridi u unegabagabaedi, u mosedi gogogesagesa tataodi aridi eai: em gogo galewa eai abo se ota, abo u laoma u hemuriwataiguma.” 22 Na hewari wa, teina riba ta i ataiei, i lau‐suara, i nuadubu ariri: paana ede ena gogo se gamagari ariri.

23 Iesu abo i ribalau ena heaheatayao aridi eai i ene, “Mamohoi, ea heribamiu ta, taumonamonaune bena i lusora Eaubada ena basileia eai, i hetahetalaahi. 24 Hinage ea heribauioimiu ta, ea ene, kamela taba i lusora diu gudana eai, taumonamonaune mo Eaubada ena basileia dobilana eai bena i lusora abo i ahi.” 25 Ena heaheatayao ina riba ta se ataiei, se noo ariariri, si ene, “Taba nei doha, eai abo i mauri?” 26 Na Iesu i ita lau aridi eai, abo i heribadi, i ene, “Tatao nige abina se ata: na Eaubada ginauri gamagamagari abidi ie ata.”