1 GUIAU i ribalau Mose arinai i ene, “Iwala esega mo abo ea leama Parao potana eai eo Aigupito potana eai: murina eai abo i abigabaemiu: ena i abigabaemiu, abo i aiduyei esegaimiu. 2 Abo ina u riba tatao beadi eai, bena tatao gamagaridi se aibodalau heledi tatao aridi eai pasa udoi udoi silver eo gold aridi eai se ginauridi.” 3 Arinai GUIAU Aigupito tataodi nuadi i helolodi tatao wa aridi eai. Eo hinage tau wa, Mose, is sae ariariri Aigupito eanuana eai, Parao ena heaheari matadi eai, eo tatao matadi eai.

4 Abo Mose i ene, “Doha ina GUIAU i ribaei, ‘Bulinuana eai abo ea pesa ea lau Aigupito duaduarina eai, 5 abo ealahou tatao gamagaridi Aigupito eanuana eai abo se mate. Parao ena ealahou tau, ia ede i bawa terona potana eai, i lau e heaheari sinena ia sitona aba‐bibina dagelana eai ena ealahou tau. Eo suisui hinage lababagunadi gamagaridi. 6 Dou lailai abo ie tubu Aigupito eanuana maudoina boeana eai, sora nige doha nei se ataiei, eo abo taba nige se ataieiuioi. 7 Na Isaraela tataodi aridi eai, tau e suisui, taba nige kedewa esau i talabou, bena abo au italobai GUIAU i heseri Aigupito tataodi eo Isaraela tataodi boeadi eai. 8 Em heaheari gamagaridi abo se dobima arigu eai, se debatutu matagu eai, abo si ene, “U lausuara eo tatao gamagaridi isi tauhemuriwataim”: eo murina eai abo ea pesa.’ ” To Parao matana i pesagabaei ma ouyalayala‐aririna. 9 GUIAU hinage i ribalau Mose arinai i ene, “Parao taba nige em riba i ataiei, egu laulau gigiboridi bena se gamagari Aigupito tanona eai.”

10 Mose eo Arona laulau gigiboridi se ginauridi Parao matana eai; na GUIAU Parao nuana i heoiura, Isaraela tataodi taba nige i abigabaedi bena ena eanua se torohaigabaei.

<- ESODO 10ESODO 12 ->