4 आंइ कली पाप रे प्रोंइब परमप्रभु, आंइ कली लेंशा ङोंइती ङा खोदेंशो सेल्की। मिनु इन आंइ कली मदाक्तीके समीन। 5 मार, गे गेना हना यो गोपुकी नु गाइक्स ङा गाइक्स बाक्नीनी? गे गोपुकी नु आंइ चच युइ आन पाला सम्म गाइक्स ङा गाइक्स बाक्नीनी? 6 मार, गे इन मुर आंइ कली गे नु ग्येरसीचा कली लेंशा, मबोक्पाइक्नीनी? 7 परमप्रभु यावे, गे इन गेनायो मनुप्ब दाक्तीके कोंइदीकी। मिनु आंइ कली श्येत रे प्रोंइकी।
8 परमप्रभु, परमप्रभु यावेमी मार देंबा, आं कली नेंपतीन। मेकोमी आ मुर, आ लोव़ टीब नु आंम कली जिम्मा गेंसीशो मुरपुकी नु थुं नाइक्तीक लोव़ पाइब। मेको आन कली लेंशा दूली गाक्चा मगेने। येरमीया २९:११; मीका ५:४ 9 परमप्रभु कली मान पा हिंब मुर ब्रोंइचा ताइनीम। मेको आ छेङछेङ इं रागीम बाक्ल।
10 गेना हना यो दाक्तीक नु थमा पा दाक्शा मप्रोंइतीक गारनीस। ठीक पतीक नु थुं नाइक्तीक पुक्पु पमुइनीस। 11 थमा पा दाक्शा मप्रोंइतीके खप रे वाशो खोदेंशो पा ग्रूब। मिनु ठीक पतीकेमी सरीङ रे कोव़ब। 12 परमप्रभु यावेमी मार रिम्शो बाक्मे, मेको गेब। मिनु आंइ रागीम बाली नाली ग्रेल्पाइक्ब। 13 ठीक पतीकेमी मेको आ ङोंइती गाक्शा, आन लां सेल्ब।
<- भजन संग्रह 84भजन संग्रह 86 ->