1 मूर्खपुकीमी आन थुंमी “परमप्रभु मबाक्‍ब” देंनीम। मेकोपुकी काइ मरिम्‍शो दुम्‍शा ग्रांग्रा दिचा ङा गेय पाइनीम। रिम्‍शो पाइब का यो मबाक्‍नीम।

2 मिनु परमप्रभुमी स्‍वर्ग रे मुर आन कली कोव़ब। मारदे कोव़ब देंशा हना, आ कली माल्‍ब, रुप्‍ब मुर का बाक्‍म कों, दे कोव़ब। 3 मुर नेल्‍ले हेंथे लां खोइश्‍शो बाक्‍नीम। मेको नेल्‍ले दूली पाइब बाक्‍नीम। रिम्‍शो पाइब का यो मबाक्‍नीम। 4 मार, मरिम्‍शो पाइबपुकी मारेइ मशेंसीनीमी? मेकोपुकीमी शोब्‍ले जशो खोदेंशो पा आं मुर आन कली नेक्‍नीम। मेकोपुकीमी परमप्रभु कली काइ मपुंइनीम। 5 मिनु नोले मेकोपुकी थाम्‍पा हिंनीम। ङोंइती मोपा हिंतीके मबा। मारदे हना परमप्रभुमी थमा मसुइक्‍ब आन रुश फ्राइब। मिनु मेकोपुकी मुने दोक्‍नीम। मारदे हना परमप्रभुमी मेको आन कली तिल्‍शो बाक्‍ब। 6 इस्राएल कली श्‍येत रे प्रोंइब सियोन रे जाक्‍शो हना, गिश रिम्‍शो दुम वा। परमप्रभुमी आ मुर आन कली थुं नाइश्‍शा, रिम्‍शो पा बाक्‍तीक लेंशा गेप्‍तु हना, याकूब आ मुर कुम्‍सो पाइनीम। मिनु इस्राएल ङा मुर ग्‍येरसीनीम।

<- भजन संग्रह 52भजन संग्रह 54 ->