12 मिनु परमप्रभु आ अरेशो मटीबपुकीमी ठीक पाइब मुर आन पर्बम “दोपा श्येत गेचा नमी” दे मिम्शा, आन ख्रुइ शेप्शो बाक्नीम। 13 तन्न परमप्रभु मेको आन कली तशा, रिप्ब। मारदे हना मेको आन नाक्त नुप्शो तुइश्शो बाक्ब। अय्युब १८:२० 14 परमप्रभु आ अरेशो मटीबपुकीमी प्रुङग नु श्येत जाइब आन कली साइक्चा कली तरवार शोइक्नीम। आन लिब्रा कीनीम। रिम्शो थुं पाइश्शो मुर आन कली साइक्चा माल्नीम। 15 तन्न मेको आन तरवारमी आंमा आन लुङगीर तूचा पुंइसीनीम। आन लिब्रा जिक्नीम।
16 परमप्रभु आ अरेशो मटीब आन शुश शोंप क्येङा ठीक पाइब आन इच्का खोइ शोंप रिम्शो बाक्ब। हितोपदेस १५:१६ 17 मारदे हना परमप्रभु यावे आ अरेशो मटीब आन गुइ जिक्चा पुंइसीनीम। परमप्रभु यावेमी ठीक पाइब आन कली रिम्शो पा बाक्चा गेब। 18 परमप्रभु यावेमी दोस मताइब आन नाक्ती तुइक्ब। मिनु मेको आन शोंप गेना हना यो लीब। उपदेसक ८:१२ 19 ठेयब श्येत दुम नाक्ती मेकोपुकी मुने मदोक्नीम। मिनु अन्काल दुम नाक्ती मेकोपुकी जशा रूचा ताइनीम। हितोपदेस १०:३ 20 परमप्रभु आ अरेशो मटीबपुकी खतम दुम्नीम। मिनु परमप्रभु यावे आ जोरी सत्रु दिंम ङा रिम्शो घांस खोदेंशो बाक्नीम। मिनु मेकोपुकी सोल सुल बेक्शा, कुन खोदेंशो पा जाम्शा लाइनीम।
21 परमप्रभु आ अरेशो मटीबपुकीमी जेर जशा, मथाप्नीम। मिनु ठीक पाइबपुकीमी हाइश्शो दुम्शा गेनीम। 22 परमप्रभु रे आसीक ताइबपुकीमी रागी ताइनीम। परमप्रभु रे सराप ताइबपुकी जाम्शा लाइनीम। 23 परमप्रभु यावेमी आ मुर आन थेक्तीक बोल्यो सेल्ब। मेको आन कली तशा ग्येरब। 24 मेको दाइल पांइसाक्म हना यो, मगोल्नीम। मारदे हना परमप्रभु यावेमी मेको आन गुइ ग्याइश्शा, तिक्ब। हितोपदेस २४:१६
25 गो ठिटा बाक्ती, मुल खाल्पा दुम्ती। तन्न ठीक पाइबपुकी नु आन तमी तौ नु चच युइमी मुल सम्म पुंइशा जशो गेनायो मतङमी। 26 मिनु मेकोपुकीमी नेल्ल नाक्ती हाइश्शो दुम्शा, प्रुङग आन कली मार मार गेनीम। मिनु मेको आन आलपुकीमी आसीक ताइनीम। 27 मरिम्शो पतीके रे ङोन बाक्कीन। रिम्शो पने। मिनु गे गेना हना यो ब्रोंइचा ताइनीनी। 28 मारदे हना परमप्रभु यावेमी ठीक निसाफ दाक्ब। आ कली मप्रोंइब आन कली नेल्ल नाक्त गेना हना यो कोव़ब। ठीक पाइब गेना हना यो रिम्शो बाक्चा ताइनीम। तन्न आ अरेशो मटीब आन तमी तौ नु चच युइ तिल्चा पुंइसीनीम। 29 ठीक पाइबपुकीमी रागी ताइनीम। मिनु गेना हना यो मेकेर बाक्नीम। यसैया ६०:२१
30 ठीक पाइबपुकीमी जोक्तीक तुइक्तीक लोव़ पाइनीम। मिनु मेकोपुकीम ठीक पतीके शेंनीम। 31 आन परमप्रभु आ अरेशो लोव़ मेको आन थुंमी बाक्ब। मिनु हेंथे मपथु, परमप्रभु आ लांम गाक्नीम। 32 परमप्रभु आ अरेशो मटीबपुकीमी बाप्शा, ठीक पाइब आन कली साइक्चा माल्नीम। 33 तन्न परमप्रभु यावेमी ठीक पाइब आन कली मेको आन गुइम दुम्चा मगेब। ठीक पाइब आन निसाफ दुम्मेनु, दोस मताइब दुम्पाइक्ब। 34 परमप्रभु यावे कली रिम्दीन। मेको आ लांम गाक्कीन। मेकोमी इन कली ठेयब सेल्शा, रागी इन कली गेब। मिनु गे परमप्रभु आ अरेशो मटीब आन कली खतम सेल्चा ताइनीनी।
35 गो परमप्रभु आ अरेशो मटीब लेबानोन ङा ठेयब रवा खोदेंशो दुम्शो ताता। १सामुएल ३५:२-३८; इजीकीएल ३१:३-१४ 36 मिनु गो आ बाक्तीक कोव़ता, मेको मुर मबा। गो मेको कली माल्ता, मथिदु। 37 दोस मताइब आन कली कोव़ङीन। रिम्शो थुं पाइश्शो मुर कली कोव़ङीन। मारदे हना मेकोपुकी थुं नाइश्शा बाक्शो बाक्नीम। उत्पत्ती ३९:७-९ 38 तन्न हेंथे पाइब नेल्ल खतम दुम्नीम। परमप्रभु आ अरेशो लोव़ मटीब नेल्ल खतम दुम्नीम। आन तमी तौ चच युइ यो तिल्चा पुंइसीनीम। 39 परमप्रभु यावे ठीक पाइब आन कली वारच पाइब बाक्ब। मिनु मेको आन कली श्येत दुम्मेनु, मेको आन फाम्सीतीके दरवार बाक्ब। 40 परमप्रभु यावेमी मेको आन कली वारच पा प्रोंइब। मिनु आ अरेशो मटीब आन गुइ रे प्रोंइब। मारदे हना मेकोपुकी परमप्रभु कली जिम्मा गेंसीशो बाक्नीम। लूका १८:७-८
<- भजन संग्रह 36भजन संग्रह 38 ->