1 फरिसीपुकी नु सास्त्री का निक्शी यरूसलेम रे यिशा, येसु आ बाक्तीकेम जाक्मा बाक्त। 2 मिनु काथा बाक्मानु, येसु आ शेंसीबपुकीमी गुइ मचिक्थु जशो तामे बाक्त। 3 फरिसी नु यहूदी नेल्लेमी गुइ मचिक्थु मजाइनीम। आन जोक्ब तुइक्ब खाल्पापुकीमी वोइश्शो पतीके नेल्ल पाइनीम। 4 बजार लशा लेश्शा, खिं जाक्शा, चोव़खेसीशा ला जाइनीम। कचौरा, लोटा, गाग्री, नित्तीके नेल्ल चोव़खेचा माल्ब। मेको मोदेंशो पतीके शुश पाइनीम। मत्ती २३:२५ 5 मोपतीके येसु आ शेंसीबपुकीमी गुइ मचिक्थु जशो तशा, येसु कली “इन शेंसीबपुकीमी किकी पिपीमी वोइश्शो रिती थिती मारदे मपाइनीमी? मचोव़खेसीथु गुइ मचिक्थु जाइबाक्तेक्म” दे मदमे बाक्त। 6 मिनु येसुमी मेको आन कली “गे कपटीपुकी, यसैयामी पशो नोले दुम्ब लोव़ इन कली गारमाक्त। मार ब्रेक्शो बाक्त देंशा हना ‘मेकोपुकीमी शोव़ रे पा ला आं कली मान पाइनीम। आन थुंमी चहिं मदाक्नीम, आं देंशो यो मपाइनीम। यसैया २९:१३ 7 आं कली सेउ पखु पा, परमप्रभु यावे आ लोव़ बाक्त, दे शेंनीमी, तन्न मुरुमी मिम्शो ला शेंनीम’ दे ब्रेक्शो बाक्त। यसैया २९:१३ 8 परमप्रभु यावे आ अरेशो लोव़ प्रोंइशा, मुरुमी वोइश्शो पतीके पाइनीनी” दे माइक्मी बाक्त। 9 मिनु लोव़ बोइश्शा “गिश जोक्ब तुइक्ब ननी। परमप्रभु यावे आ देंशो शेंचा प्रोंइशा, आंम सेल्शो इन पतीके ला शेंनीनी। 10 मोसामी ब्रेक्शो लोव़ का ‘आम आफ आस कली मान पचा’ मिनु लोव़ का ‘सु सुमी आम आफ आस कली मरिम्शो लोव़ पामे, मेकोपुकी साइक्चा पुंइसमल’ दे ब्रेक्शो बाक्त। प्रस्थान २०:१२; प्रस्थान २१:१७ 11 गेपुकीमी चहिं सुमी आम आफ आस कली ‘इन कली गेचा माल्शो थोव़क लाइश्शा, कुरबन कली गेता’ दे माइक्बा, मेकोमी आम आफ आस कली मारेइ गेचा ममाल्ब दे शेंनीनी। ‘कुरबन गेता’ देंशो चहिं ‘परमप्रभु कली गेता’ देंशो रुम्सीब। 12 मोपा इन शेंतीक लोव़मी आम आफ आस कली वारच पचा तेक्नीनी। 13 इन वोइश्शो रिती थितीमी परमप्रभु यावे आ देंशो टिचा प्रोंइपाइक्नीनी। मिनु मोदेंशो कपटी गेय शुश पाइनीनी” दे हुइक्तीमी बाक्त।
24 मिनु बोक्शा, मेकेर रे टायर नु सीदोन गे लशा, खिं का ओव़माक्त। सुइमी मतुइक्तमेक्ल देंत हना यो, ख्रुइश्शा बाक्ने मचबा बाक्त। 25 मिनु ग्रांग्रा दिचा ङा वोलम सुम्शो आइक्च आल आ ममामी “येसु जाक्माक्त” देंशो नेंशा, येसु आ बाक्तीके जाक्दीम्माक्त। 26 मेको मीश मुर अर्को रागी ङा, सुरोफोनीसीयामी जरमेशो ङा बाक्माक्त। मिनु मेको जाक्शा, येसु आ ङोंइती खुम्की पा बाप्शा “आं तमी रे वोल ग्रुंइदीने” दे पुना बाक्त। 27 मिनु येसुमी “ङोंइती आल आन कली थुल्चा माल्ब। आल आन कली गेचा माल्शो शोब्ले कुचुम आन कली गेचा मदुम्ब” दे मदा बाक्त। 28 मिनु मेको मीश मुरुमी “मदुम्ब, प्रभु, तन्न कुचुमपुकीमी यो आलपुकीमी तोक्शो शोब्ले जचा ताइनीम” देंमाक्त। 29 मिनु येसुमी “इ मो देंतीके इ पुंइशो गेतन। वोल इ तमी रे ग्रूत” दे मदा बाक्त। 30 मिनु आ खिं लेश्शा जाक्मेनु, वोल ग्रूशा, आल सेस दुम्शा इप्शो बाक्माक्त।