मिनु येसुमी 3 “महिक्‍सीशो मुरपुकी आसीक राइनीम। मारदे हना स्‍वर्ग ङा राज्‍य मेको आन केन बाक्‍ब। यसैया ५७:१५ 4 आन थुं खाइश्‍शोपुकी आसीक राइनीम। मारदे हना आन थुं नाइक्‍चा ताइनीम। भजन संग्रह १२६:५; प्रकाश ७:१७ 5 ब्रेम्‍शोपुकी आसीक राइनीम। मारदे हना रागी आन केन दुम्‍ब। मत्ती ११:२९; भजन संग्रह ३७:११ 6 ठीक पशो तचा दाक्‍बपुकी आसीक राइनीम। मारदे हना आन दाक्‍शो ताइनीम। लूका १८:९-१४; यूहन्‍ना ६:३५ 7 शिशी पाइबपुकी आसीक राइनीम। मारदे हना आं यो शिशी ताइनीम। मत्ती २५:३५-४६; याकूब २:१३ 8 आन पाप क्‍याम्‍चा पुंइसीशा, रिम्‍शो थुं दुम्‍शोपुकी आसीक राइनीम। मारदे हना परमप्रभु यावे कली ताइनीम। भजन संग्रह २४:३-५; भजन संग्रह ५१:१२-१३; १यूहन्‍ना २:२-३ 9 दुशा गारशा बाक्‍बपुकी आसीक राइनीम। मारदे हना परमप्रभु यावे आ तमी तौ देंचा पुंइसीनीम। हिब्रू १२:१४ 10 ठीक पशा यो खेदा पचा पुंइसीबपुकी आसीक राइनीम। मारदे हना स्‍वर्ग ङा राज्‍य मेको आन केन बाक्‍ब। १पत्रुस ३:१४ 11 आं पर्बम मुरपुकीमी इन कली हेला पा, खेदा पा, जोल पा, मरिम्‍शो लोव़ पाम्‍तेक्‍म हना यो, आसीक राइनीनी। मत्ती १०:२२; प्रेरित ५:४१; १पत्रुस ४:१४ 12 ग्‍येरसीने। मारदे हना स्‍वर्गमी इन कली ठेयब इनाम वोइश्‍शो बाक्‍ब। साइ नेसी रे मुल सम्‍म परमप्रभु यावे आ लोव़ पाइब आन कली खेदा पा श्‍येत गेस ङा गेस पाम्‍तेक्‍म। हिब्रू ११:३३-३८; याकूब ५:१०

13 गे रागी ङा हिक्‍सी ननी। हिक्‍सी आ ङाम्‍चा जाम्‍त हना, मारेइ काम मलाप्‍ब। लांमी ताइश्‍शा मुर गाक्‍मानु, दिम्‍शा ख्राक्‍चा पुंइसीब। मर्कूस ९:५०; लूका १४:३४-३५

14 गे रागी ङा छेङछेङ ननी। डांडामी सेल्‍शो सहर मारेइमी मफारसीब। यूहन्‍ना ८:१२ 15 सुइमी बत्ती दाशा, पाथीम गुप्‍शा मवोइक्‍नीम। खिं आगा नेल्‍ल छेङछेङ पा तचा ङा पा वोइक्‍नीम। मर्कूस ४:२१; लूका ८:१६ 16 मेको ब्रशो बत्ती खोदेंशो पा गेमी इन रिम्‍शो गेय रे पा इन छेङछेङ मुर आन कली कोंइदीने। मिनु इन रिम्‍शो पशो तशा, स्‍वर्गमी बाक्‍ब इन आफ कली ठेयब सुइश्‍शा मान पाइनीम। फि‍लिप्‍पी २:१४-१५; यूहन्‍ना १५:८; एफिसी ५:८-९

17 परमप्रभु यावे आ अरेशो लोव़ नु परमप्रभु यावे आ लोव़ पाइबपुकीमी ब्रेक्‍शो लोव़ क्‍याम्‍ब, दे ममिम्‍तीने। क्‍याम्‍चा कली ममाइ, नेल्‍ल पचा कली जाक्‍ती। मत्ती ३:१५; रोमी ३:३१; रोमी १०:४; १यूहन्‍ना २:७ 18 नोफा दाइश्‍शा नेनीने, सरीङ नु रागी मग्‍याम्‍म सम्‍म परमप्रभु यावे आ लोव़ का यो मग्‍याम्‍ब। नेल्‍ल थमा दुम्‍ब। लूका १६:१७ 19 सुमी परमप्रभु यावे आ अरेशो लोव़ के लोव़ का मपाइबा, मुर आन कली मो पचा शेंबा, मेको मुर स्‍वर्ग ङा राज्‍यमी नेल्‍ल क्‍येङा आइक्‍च दुम्‍ब। सुमी लोव़ का यो मप्रोंइथु, नेल्‍ल पशा ङा मिन, मुर आन कली शेंबा, मेको चहिं स्‍वर्ग ङा राज्‍यमी ठेयब दुम्‍ब। याकूब २:१०

20 सास्‍त्री नु फरिसी आन पशो क्‍येङा गे रिम्‍शो ठीक गेय मपाइतीनी हना, गेपुकी यो स्‍वर्ग ङा राज्‍य ओव़चा मताइनीनी, दे इन कली देंनुङ। मत्ती २३:२-३३

21 साइ नेसी इं किकी पिपी आन कली ‘मुर कली मसाइक्‍चा। सुइमी अरु कली साइक्‍तु हना, मेको सजाइ गेचा पुंइसीब’ दे देंशो लोव़ बाक्‍ब, दे तुइक्‍नीनी। प्रस्‍थान २०:१३, प्रस्‍थान २१:१२ 22 गोमी चहिं इन कली मार देंनुङ देंशा हना, सु मुर नु ईख पा ब्राशा बाक्‍बा, मेको सजाइ गेचा पुंइसीब। सुमी अर्को कली मरिम्‍शो लोव़ पाइबा, मेको कछडी पचा पुंइसीब। सुमी अर्को कली ‘ए मूर्ख’ देंबा, मेको नरक ङा मीम हुम्‍चा पुंइसीब। १यूहन्‍ना ३:१५

23 मोपतीके गे परमप्रभु यावे कली मार मार चढ़ेचा सादीनीनु, सुइ गेपुकी नु गाइश्‍शो, चुरशो फ्रुक्‍तीनी हना, 24 चढ़ेचा क्‍येङा ङोंइती मेको आन कली ग्रुम्‍शा, दुशा गारशा ला चढ़ेने। मर्कूस ११:२५

25 इन कली मरिम्‍शो पाइब नु लांमी बाक्‍नीनुन, गारीने। मारदे हना मेकोमी इन कली अडडाम लाइश्‍शा, निसाफ पाइब आ ङोंइती चाक्‍दीप्‍ब। मिनु निसाफ पाइबमी पुलीस आन गुइमी गेब। मिनु पुलीसम जेल्‍खानम चोक्‍नीम। मत्ती १८:२३-३५; लूका १२:५८-५९ 26 नोफा दाइश्‍शा नेनीने, इन कली नोले ङा क्‍वद्रन्‍स मथाप्‍पाइक्‍थु मप्रोंइनीम।क्‍वद्रन्‍स नेल्‍ल क्‍येङा आइक्‍च क्‍येट बाक्‍त।

27 ग्‍युंबे पशोपुकी आन मीश वोंइश नाता ब्राचा मदुम्‍ब देंशो बाक्‍ब, दे तुइक्‍नीनी। प्रस्‍थान २०:१४ 28 गो मार देंनुङ देंशा हना, ग्‍युंबे पशो मुरुमी अर्को मीश मुर तशा वाल्‍त हना, आ थुंमी मीश वोंइश आस नाता ख्रोइक्‍ब। २सामुएल११:२; अय्‍युब ३१:१; २पत्रुस २:१४ 29 इ ग्‍युरा मिक्‍चीमी इ कली पाप पपाइक्‍तु हना, फेश्‍शा ताइक्‍तो। मारदे हना रां नेल्‍ल नरकम ख्रुम्‍चा पुंइसीचा क्‍येङा रां ङा मिक्‍च का जाम्‍शा लशो रिम्‍शो दुम्‍ब। मत्ती १८:८-९; मर्कूस ९:४७; कलस्‍सी ३:५ 30 इ ग्‍युरा गुइमी इ कली पाप पपाइक्‍तु हना, ख्रोइश्‍शा ताइक्‍तो। मारदे हना रां नेल्‍ल नरकम ख्रुम्‍चा पुंइसीचा क्‍येङा रां ङा गुइ का जाम्‍शा लशो रिम्‍शो दुम्‍ब।

31 सु आ मीश नु ब्राबा, मेकोमी छोड पत्र ब्रेक्‍शा गेचा माल्‍ब, दे यो देंशो बाक्‍ब। ब्‍यवस्‍था २४:१; मत्ती १९:३-९; मर्कूस १०:४-१२ 32 गोमी मार देंनुङ देंशा हना, सुमी आ मीश आं नु फ्राशा सोइक्‍बा, मेकोमी आ मीश कली मीश वोंइश आस नाता ख्रोइक्‍पाइक्‍ब। मीश मुरुमी आ वोंइश बाक्‍ना बाक्‍न अर्को वोंइश मुर नु मरिम्‍शो गेय पाप्‍तु हना, मोदेंशो मीश मुर कली प्रोंइचा दुम्‍ब। सुमी छोड पत्र गेचा पुंइसीशो मीश मुर ग्‍युंबे पाइबा, मेकोमी यो मीश वोंइश आस नाता ख्रोइक्‍ब। लूका १६:१८; १कोरिन्‍थी ७:१०-११

33 साइ नेसी इं किकी पिपी आन कली ‘जोल पा कसम मजचा। परमप्रभु यावे कली मार मार गेनुङ, पाइनुङ, दे कसम जाइतीनी हना, मेकोन गेचा पचा माल्‍नीनी’ दे देंशो बाक्‍ब, दे यो तुइक्‍नीनी। लेवी १९:१२; गन्‍ती ३०:३ 34 गोमी मार देंनुङ देंशा हना, कसम का यो मजने। सरीङ आ नेंमी कसम मजने। मारदे हना सरीङ परमप्रभु यावे आ नित्‍तीके बाक्‍ब। मत्ती २३:१६-२३२; यसैया ६६:१ 35 रागी आ नेंमी यो कसम मजने। मारदे हना रागी परमप्रभु यावे आ खोइल थेक्‍तीक बाक्‍ब। यरूसलेम सहर आ नेंमी यो कसम मजने। मारदे हना यरूसलेम नेल्‍ल क्‍येङा ठेयब पिप आ सहर बाक्‍ब। भजन संग्रह ४८:३ 36 इन पिया थिशा यो कसम मजने। मारदे हना चां का यो बुश के क्‍येर, क्‍येर के बुश सेल्‍ने मचाप्‍नीनी। 37 इन देंशो लोव़ चहिं ‘दुम्‍ब हना दुम्‍ब, मदुम्‍ब हना मदुम्‍ब’ देनीने। मेको क्‍येङा लाक्‍शो लोव़ चहिं मरिम्‍शो लां रे पीब। याकूब ५:१२

38 ‘सुइमी इन मिक्‍च पुक्‍ताक्‍म हना, मेको आन कली यो मिक्‍च पुक्‍तीने। सुइमी इन ख्रुइ जिक्‍ताक्‍म हना, मेको आन कली यो ख्रुइ जिक्‍तीने’ देंशो बाक्‍ब, दे तुइक्‍नीनी। प्रस्‍थान २१:२४ 39 गो मार देंनुङ देंशा हना, सुइमी इन कली मरिम्‍शो पाम्‍तेक्‍म हना यो, मेको आन कली आन क्‍येक्‍क मलेत्‍तीने। इन ग्‍युरा चोव़चो राप्‍तेक्‍म हना, पेरा यो राप्‍चा गेने। बिलाप ३:३०; यूहन्‍ना १८:२२-२३; रोमी १२:१९,२१; १पत्रुस २:२०-२३ 40 इन कली मुददान कोप्‍शा, अडडाम लाइश्‍शा, इन फेक्‍शो वा लाइक्‍चा माल्‍तेक्‍म हना, इन बरखी यो गेशा सोइक्‍तीने। १कोरिन्‍थी ६:७; हिब्रू १०:३४ 41 इन कली आधा कोस सम्‍म लचा, दे ढिपी पाम्‍तेक्‍म हना, कोस का सम्‍म यो लने। 42 इन के मारेइ थोव़क पुंइतेक्‍म हना, आन पुंइशो गेने, जेर पुंइतेक्‍म हना यो, मगेनीकी, दे श्‍येत्‍थी मसोइक्‍तीने।

43 ‘गेपुकी नु बाक्‍ब मुर आन कली दाक्‍तीने। जोरी सत्रु आन कली चहिं मदाक्‍तीने’ देंशो बाक्‍ब, दे तुइक्‍नीनी। लेवी १९:१८ 44 गोमी इन कली मार देंनुङ देंशा हना, जोरी सत्रु आन कली दाक्‍तीने। इन कली हेला पा खेदा पाइब आन पर्बम परमप्रभु यावे कली पुनीने। प्रस्‍थान २३:४-५; लूका ६:२७-२८; रोमी १२:१४,२०; लूका २३:३४; प्रेरित ७:५९; लूका ६:२७-२८ 45 मो पाइतीनी हना, इन स्‍वर्ग ङा आफ आ तमी तौ नकी, दे कोंइनीनी। स्‍वर्गम बाक्‍ब आफोमी रिम्‍शो मरिम्‍शो पाइब नेल्‍ल आन कली नां दाप्‍पाइक्‍ब। नेल्‍ल आन कली रेउ यिपाइक्‍ब। एफिसी ५:१ 46 इन कली दाक्‍ब आन कली ला दाक्‍ताक्‍नी हना, मार इनाम ताइनीनी ङा? तिरो पोक्‍बपुकीमी यो मो मपाइनीम ङा? 47 इन जात, थर ङा मुर आन कली ला मान पा सेत्‍ताक्‍नी हना, मार इनाम ताइनीनी ङा? परमप्रभु कली मतुइक्‍बपुकीमी मसेम्‍मुइनीमी ङा? 48 मोपतीके दोपा इन स्‍वर्ग ङा आफोमी रिम्‍शो पाइबा, मोपा गे यो रिम्‍शो पने। लेवी १९:२

<- मत्ती 4मत्ती 6 ->