1 मेको नाक्त येसु खिं रे गाक्शा, समुन्द्र आ नेक्था लशा निस्साक्व। 2 मिनु शुश मुर जाक्शा देल्तेक्म। मिनु येसुमी शुश मुर आन कली देल्शो तशा, डोंगा ङोइश्शा निस्साक्व। मुरपुकी चहिं समुन्द्र आ नेक्था बाक्तेक्म। 3 मिनु कथा सेल्शा, शुश लोव़ शेंताक्मी। कथा का ओं देंत “मुर कामी वांचेर शोक्थ लमाक्त। 4 मिनु ब्वारानु, गेडा का निक्शी लांमी जुक्तमे बाक्त। मिनु चिक्बीम गुप्शा जामे बाक्त। 5 का निक्शी ग्याङग्रो ठाउंमी जुक्तमे बाक्त। मिनु शुश खप मबाक्तीके जिव जाव वामा बाक्त। 6 तन्न नां पवानु, सोल सुल बेक्मा बाक्त। मारदे हना शाक्श मपाइश्शो बाक्मा बाक्त। 7 का निक्शी चू घारीमी जुक्तमे बाक्त। मिनु चूम सुम्शा, वाचा मगेवा बाक्त। 8 मिनु का निक्शी रिम्शो खपीम जुक्तमे बाक्त। मिनु वाशा शुश ग्रेल्शा, गेडा का के सहे का, ६०, ३० सिम्मा बाक्त। 9 सु नोफा पाइश्शो बाक्मे, मेकोमी नेंनल” देंत।
10 मिनु शेंसीबपुकीमी येसु कली “मारदे कथा सेल्शा, मुर आन कली शेंनीनी?” दे हिल्लो पाम्तेक्म। 11 मिनु येसुमी “इन कली स्वर्ग ङा राज्य आ पर्बम ख्रुइश्शो लोव़ रुप्तीक थुं गेशो बाक्त। तन्न मेको आन कली मगेमी बाक्त। १कोरिन्थी २:१० 12 थीबमी तेम्शा गेचा पुंइसीब, मिनु शुश दुम्ब। मथीब चहिं बाक्शो यो रोइक्चा पुंइसीब। हितोपदेस ९:९; मत्ती २५:२८-२९; मर्कूस ४:२४; लूका ८:१८ 13 कथा सेल्शा शेंनुङमी। मारदे हना कोव़शा यो मताइनीम। नेंशा यो मरुप्नीम। यूहन्ना १६:२५; ब्यवस्था २९:३ 14 साइ नेसी यसैयामी देंशो नोले दुम्ब लोव़ मुल थमा दुम्त। मार ब्रेक्शो बाक्त देंशा हना ‘नेंचा दा नेंनीनी, तन्न दोपा यो मरुप्नीनी। कोव़चा दा कोव़नीनी, तन्न दोपा यो मताइनीनी। 15 मेको मुर आन थुं ग्याम्शो बाक्नीम। आन नोफा थांइशो बाक्नीम। आन मिक्च क्रिप्शो बाक्नीम। मोदेंशो मपशो नम हना, आन मिक्चीम ताम वा, नोफाम नेंनेम वा, थुंमी रुबेम वा, मिनु आं गे लेम्म वा, मिनु गो सापदुमी वा’ दे ब्रेक्शो बाक्त। यसैया ६:९-१०; यूहन्ना ९:३९ 16 गेपुकी चहिं ग्येरसीने। इन मिक्च नु नोफा मेको आन के खोदेंशो ममाइ। मिक्चीम ताइनीनी, नोफाम नेंनीनी। लूका १०:२३-२४ 17 नोफा दाइश्शा नेनीने, गेमी मुल तशो नेंशो साइ नेसी रे परमप्रभु यावे आ लोव़ पाइबपुकीमी तचा नेंचा दाक्बाक्मा बाक्त। तन्न तचा नेंचा मतामे बाक्त। १पत्रुस १:१०
18 वांचेर ब्वारशो कथा आ अर्थ शेंनन्नी, 19 सुमी परमप्रभु यावे आ राज्य ङा लोव़ नेंशा मरुबा, मेको लांमी जुक्शो वांचेर खोदेंशो बाक्ब। सैतानमी आ रुप्शो क्याम्शा गेब। 20 ग्याङग्रो खपीम शोक्शो खोदेंशो बाक्त हना, देंशो चोटी बिश्शा ग्येरसीब। 21 तन्न शाक्श थोक्चा मतथु शुश मलीब। परमप्रभु यावे आ लोव़ आ पर्बम श्येत जाप्तु हना, थु प्रोंइशा गाक्ब। 22 चू घारीम जुक्शा सुम्शो खोदेंशो बाक्त हना, लोव़ नेंब। तन्न दोपा ठेयब दुम्नुङा? दोपा क्येट चेमु? दे मिम्शा, आ थमा सुइक्तीके देक्ब। मिनु नेंशो लोव़मी फल मसिप्ब। मत्ती ६:१९-३४; १तिमोथी ६:९ 23 सुमी नेंशा रुप्बा, मेको चहिं रिम्शो खपीम जुक्शो वांचेर खोदेंशो शुश ग्रेल्शा, गेडा का के सहे का, ६०, ३० सम्म सिप्ब” दे शेंताक्मी।
31 येसुमी “स्वर्ग ङा राज्य ओदेंशो यो बाक्ब, मुर कामी आ रूमी तोरी शोक्गा बाक्त। 32 वांचेर नेल्ल क्येङा आइक्च गेडा तोरी गेडा बाक्माक्त हना यो, वाशा ठेयब रवा दुम्माक्त। मेको रवामी चिक्बीम ग्योव़ सेल्शा बाक्मा बाक्त” दे अर्को कथा का शेंताक्मी।
34 येसुमी मेको लोव़ नेल्ल कथा सेल्शा शेंताक्मी। कथा मसेल्थु मारेइ लोव़ मशेंदीमी। मर्कूस ४:३३-३४ 35 मारदे हना साइ नेसी परमप्रभु यावे आ लोव़ पाइबमी देंशो लोव़ मुल थमा दुम्ल, दे कथा रे पा शेंताक्मी। मेको साइ ब्रेक्शो लोव़ चहिं मार बाक्ब देंशा हना “सरीङ नु रागी सेल्शो रे मुल सम्म ख्रुइश्शो लोव़ कथा सेल्शा नेंपाइक्नुङमी” दे ब्रेक्शो बाक्त। भजन संग्रह ७८:२
51 आं शेंतीक लोव़ नेल्ल रुम्नी?” दे हिल्लो पवानु “रुप्तक” देंतेक्म। 52 मिनु येसुमी “स्वर्ग ङा राज्य आ पर्बम शेंसीशो जोक्ब तुइक्ब दुम्शो मुर खिं ङा होव़प खोदेंशो बाक्ब। मेकोमी आ भकारी रे माइत नु नक थोव़क शोल्ने चाप्ब” देंत।
53 मिनु येसुमी मेको लोव़ शेंने थुम्शा, मेकेर रे लत। 54 मिनु लशा, आ बाक्शो सहरम जाक्दीश्शा, ग्रुम्तीक खिंमी शेंताक्व। शेंदानु, आ लोव़ नेंबपुकीमी छक लाक्शा “आमाइ, एकोमी ओदेंशो लोव़ दोपा जोक्गा? सु आ सक्तिमी छक लाक्चा ङा गेय पवा? 55 शी के सेल्ब आ तौ ममाइ ङा? आ ममा मरीयम ममाइ ङा? आ लोक्ब याकूब, योसेफ, सिमोन, यहूदा मनमी ङा? 56 आ समीपुकी गोपुकी नु बाक्ब मनमी ङा? मिनु मोदेंशो आन तौमी दोपा जोक्शा ठेयब दुम्मे?” दे आन थुं मनुशो लोव़ पमुमा बाक्त। यूहन्ना ६:४२; यूहन्ना ७:१५,५२ 57 मिनु येसुमी मेको आन थुं मनुशो तुइश्शा, मेको आन कली “तेइ तेइ परमप्रभु यावे आ लोव़ पाइब आन कली ठेयब सुइश्शा मान पाइनीम। आंम रागी, आंम खिंमी चहिं महिक्नीम” दे माइक्तीमी। यूहन्ना ४:४४ 58 मेकेर छक लाक्चा ङा गेय का निक्शी ला पाप्तु। मारदे हना मेकोपुकीमी थमा मसुदेम।
<- मत्ती 12मत्ती 14 ->