1 मिनु आ शेंसीब १२ जना आन कली खुप्‍शा, वोल आन कली ग्रुंइशा, खेरतीक, रोइमी गुरशो नु रोइ पाइब आन कली सापाइक्‍तीक अधिकार गेम्‍तीमी। 2 मोदेंशो अधिकार ताइब आन कली “सोइश्‍शोपुकी” दे यो देंसीब। मेकोपुकी सु सु बाक्‍तेक्‍म देंशा हना, पत्रुस माइश्‍शो सिमोन नु आ दाग्‍यु अन्‍द्रीयास, जब्‍दी आ तौ याकूब नु यूहन्‍ना, मर्कूस ३:१६-१९; लूका ६:१४-१६; प्रेरित १:१३ 3 फिलीप नु बारथोलोमाइ, थोमास, तिरो पोक्‍ब मत्ती, अल्‍फयस आ तौ याकूब, थदेयस, 4 कनानी सिमोन नु इस्‍कारीयोत ङा यहूदा बाक्‍तेक्‍म। मेको यहूदा नोले येसु कली साइक्‍चा, दे माल्‍ब आन कली वारच पाइब दुम्‍बाक्‍माक्‍त।

5 येसुमी आ १२ जना शेंसीब आन कली सोइश्‍शा, मेको आन कली “अर्को जात ङा मुर आन रागी मलने। सामरीया ङा मुरपुकी आन रागी यो मलने। 6 तन्‍न गोठला मबाक्‍शो, लां जाम्‍शो भेडा खोदेंशो, इं इस्राएली आन बाक्‍तीके लने। मत्ती १५:२४; प्रेरित १३:४६ 7 ‘स्‍वर्ग ङा राज्‍य जाक्‍चशो बाक्‍त’ दे शेंदीने। लूका १०:१-१२; मत्ती ४:१७ 8 रोइ पाइब आन कली सापतीन। बेक्‍शो मुर आन कली सेंपतीन। कोर पाइब आन कली सापतीन। वोल आन कली ग्रुंइशा खेरीन। मेको नेल्‍ल मोशा ताइतीनी। मिनु मोशा गेने। मर्कूस १६:१७ 9 सुन चांदी तांबा का यो मकुरीन। प्रेरित २०:३३ 10 लां कली फेक्‍तीक वा, जु‍त्ता जोड निक्‍शी, झोला नु कोक्‍के मकुरीन। मारदे हना गेय पाइबपुकीमी जचा गेचा पुंइसीनीम। गन्‍ती १८:३१; १कोरिन्‍थी ९:१४; १तिमोथी ५:१८

11 सहर गाउं तेइ जाक्‍दीन्‍नीनु, रिम्‍शो थुं पाइश्‍शो मुर आ खिं हिल्‍लो पा बाक्‍थ लने। मिनु बास गेम्‍तेक्‍म हना, गाक्‍ची मजाक्‍म सम्‍म बाक्‍कीन। 12 मिनु खिं ओव़नीनु ‘परमप्रभु यावेमी इन कली रिम्‍शो पवल’ दे आसीक गेने। 13 मेको खिंमी रिम्‍शो थुं पाइश्‍शो मुर बाक्‍तेक्‍म हना, आसीक रशा, आन थुं नाइक्‍चा ताइनीमी। मोदेंशो मुर मबाक्‍तेक्‍म हना चहिं मेको आन रचा ङा आसीक गे राइनीनी। 14 मुरपुकीमी इन लोव़ मनेंथु, बास मगेम्‍तेक्‍म हना, इन खोइल ङा फुरक थुर थुर पाइश्‍शा गाक्‍कीन। प्रेरित १३:५१ 15 नोफा दाइश्‍शा नेनीने, निसाफ पची नाक्‍त सोदोम नु गोमोररा सहर निक्‍शीमी बाक्‍ब मुर आन क्‍येङा इन लोव़ मनेंब मटीबपुकीमी शुश सजाइ ताइनीम। उत्‍पत्ती १९:१-२९

16 भेडा आन कली फर आन दातेम सोइश्‍शो खोदेंशो पा सोइक्‍नन्‍नी। बुस्‍स खोदेंशो पा निप्‍स पाइश्‍शो दुमीने। मिनु परवा खोदेंशो दुम्‍शा, सुइ कली मरिम्‍शो मपने। लूका १०:३; रोमी १६:१९; एफिसी ५:१५ 17 होस पा गाक्‍कीन। मारदे हना मेको फरपुकीमी इन कली सभा कछ‍डीम वोइक्‍नीम। ग्रुम्‍तीक खिंमी लाइश्‍शा युक्‍नीम। प्रेरित ५:४०; २कोरिन्‍थी ११:२४ 18 इन कली श्‍येत गेबपुकी नु अर्को रागी ङा मुर आन ङोंइती सांकछी दुम्‍चा कली ठेयब मुर नु पिप आन ङोंइती राप्‍पाइक्‍नीम। प्रेरित २५:२३; प्रेरित २७:२४ 19 इन कली मोपा राप्‍पदमेनु, मार लोव़ पका? मार देंका? दे सुर्ता मपने। मार देंचा माल्‍बा, मेको लोव़ तुइक्‍पाइक्‍चा पुंइसीनीनी। प्रस्‍थान ४:१२; लूका १२:११-१२; प्रेरित ४:८ 20 मारदे हना गे इन थुं रे पिशो लोव़ मपाइनीनी, तन्‍न इन आफ आ सोक्‍तीमी इन शोव़ रे पा लोव़ पाइब। १कोरिन्‍थी २:४ 21 लोक्‍बमी आ लोक्‍ब कली साइक्‍पाइक्‍चा गेब। आफोमी तमी तौ आन कली नु तमी तौपुकीमी यो आम आफ कली मरिम्‍शो पा साइक्‍पाइक्‍नीम। मीका ७:६ 22 आं नें आ पर्बम नेल्‍लेमी इन कली मदाक्‍नीम। तन्‍न सु सुमी चहिं नोले सम्‍म फाल्‍शा बाक्‍नीमी, मेकोपुकी परमप्रभु यावे नु ब्रोंइशा बाक्‍चा ताइनीमी। २तिमोथी २:१२; मत्ती २४:९-१३ 23 सहर कामी खेदा पाम्‍तेक्‍म हना, प्रोक्‍शा अर्को सहरमी जाक्‍दीश्‍शा बाक्‍कीन। नोफा दाइश्‍शा नेनीने, रागीम जरमेशो मजाक्‍म सम्‍म इस्राएल ङा सहर नेल्‍ल हिरशा मग्रुम्‍नीनी। प्रेरित ८:१; मत्ती १६:२८