1 परमप्रभु यावेमी मोसा नु हारून आस कली 2 “इस्राएली आन कली ‘सुइ वोंइश मुर आन के मार मार यित हना यो, मेको यितीके मेको मुर ग्रांग्रा दिशो बाक्‍ब। गन्‍ती ५:२ 3 मेको आ रां रे यितीके मार बाक्‍ब देंशा हना, रां रे यित हना यो, देक्‍त हना यो, मेको मुर ग्रांग्रा दिशो बाक्‍ब। 4 मेको मुर इप्‍शो ब्राख्‍ये नेल्‍ल नु आ निश्‍शो नित्‍तीके नेल्‍ल ग्रांग्रा दिशो बाक्‍नीम। 5 सुमी मेको आ ब्राख्‍ये थीबा, मेकोमी आ वा मुरशा, चिक्‍सीचा माल्‍ब। मिनु मेको नां मरिक्‍म सम्‍म ग्रांग्रा दिशो दुम्‍ब। 6 मिनु सु मेको आ नित्‍तीकेमी निप्‍बा, मेकोमी आ वा मुरशा, चिक्‍सीचा माल्‍ब। मिनु मेको नां मरिक्‍म सम्‍म ग्रांग्रा दिशो दुम्‍ब। 7 सुमी मेको मुर कली थीबा, मेकोमी आ वा मुरशा, चिक्‍सीचा माल्‍ब। मिनु मेको नां मरिक्‍म सम्‍म ग्रांग्रा दिशो दुम्‍ब। 8 मेको मुरुमी चोव़खो मुर कली तोक्‍ताक्‍व हना, मेको चोव़खो मुर चिक्‍सीचा माल्‍ब। मेकोमी आ वा मुरचा माल्‍ब। मिनु मेको नां मरिक्‍म सम्‍म ग्रांग्रा दिशो दुम्‍ब। 9 मेको मुर तेको शारा तार ब्रतीके थेंकाम निप्‍बा, मेको ग्रांग्रा दिशो दुम्‍ब। 10 सुमी मेको आ नित्‍तीके थीबा, मेको नां मरिक्‍म सम्‍म ग्रांग्रा दुम्‍ब। सुमी मेको थोव़क कुरबा, मेकोमी आ वा मुरशा, चिक्‍सीचा माल्‍ब। मेको नां मरिक्‍म सम्‍म ग्रांग्रा दुम्‍ब। 11 मेको मुरुमी आ गुइ मचिक्‍थु, सुइ कली थिप्‍तु हना, मेको थिचा पुंइसीब मुरुम आ वा मुरशा, चिक्‍सीचा माल्‍ब। मिनु मेको नां मरिक्‍म सम्‍म ग्रांग्रा दुम्‍ब। 12 मेको मुरुम तेकोइ खप के बोस थिप्‍तु हना, मेको प्रोल्‍चा माल्‍ब। तन्‍न शी के बाक्‍त हना, ब्‍वाक्‍कुम शेक्‍चा माल्‍ब। लेवी ११:३३

13 मेको मुरुमी आ ग्रांग्रा दिशो देक्‍म नोले, चोव़खो दुम्‍चा कली ७ नाक्‍त रिम्‍चा माल्‍ब। मिनु आ वा मुरशा, आ रां नेल्‍ल ब्‍वाक्‍कुम चिक्‍सीचा माल्‍ब। मिनु मेको चोव़खो दुम्‍ब। 14 मिनु मेकोमी ८ नाक्‍ती परवा निक्‍शी कि ढुकुर निक्‍शी कुरशा, परमप्रभु यावे आ ङोंइती ग्रुम्‍तीक ताम्‍बु आ ओव़तीक जाक्‍शा, मेको चढ़ेब कली गेचा माल्‍ब। लेवी ५:७ 15 मिनु चढ़ेबमी मेको का पाप आ पर्बम नु का चोशा चढ़ेतीक चढ़ेचा माल्‍ब। मोपा चढ़ेबमी मेको ग्रांग्रा दिशो यिशो मुर आ पर्बम परमप्रभु यावे आ ङोंइती पाप क्‍याम्‍तीक गेय पचा माल्‍ब।

16 मिनु सुइ वोंइश मुर आ बिउ मोशा यित हना, मेकोमी आ रां नेल्‍ल ब्‍वाक्‍कुम चिक्‍सीचा माल्‍ब। मिनु मेको नां मरिक्‍म सम्‍म ग्रांग्रा दुम्‍ब। लेवी २२:४ 17 मिनु आ बिउ तेको वा नु कुशुल के सेल्‍शो मारेइमी दोक्‍त हना, मेको मुरचा माल्‍ब। मिनु मेको नां मरिक्‍म सम्‍म ग्रांग्रा दुम्‍ब। 18 सुइ वोंइश मुर मीश मुर नु इम्‍मेनु, बिउ दोक्‍त हना, मेको निम्‍फा चिक्‍सीचा माल्‍नीस। मिनु नां मरिक्‍म सम्‍म ग्रांग्रा दुम्‍नीस।

19 सुइ मीश मुर मथिचा दुम्‍त हना, मेको आ रां ङा दुम्‍तीक बाक्‍ब। मेको ७ नाक्‍त सम्‍म ग्रांग्रा दिशो दुम्‍ब। सुम मेको कली थीबा, मेको नां मरिक्‍म सम्‍म ग्रांग्रा दिशो बाक्‍ब। लेवी १८:१९ 20 मेको मीश मुर ग्रांग्रा दिशो दुम्‍मेनु, आ इप्‍तीके नु नित्‍तीके नेल्‍ल ग्रांग्रा दिशो दुम्‍नीम। 21 सुम मेको आ ब्राख्‍ये थीबा, मेकोमी आ वा मुरशा, चिक्‍सीचा माल्‍ब। मिनु मेको नां मरिक्‍म सम्‍म ग्रांग्रा दिशो दुम्‍ब। 22 सुम मेको आ निश्‍शो थोव़क थीबा, मेकोमी आ वा मुरचा माल्‍ब। मिनु चिक्‍सीचा माल्‍ब। मिनु मेको नां मरिक्‍म सम्‍म ग्रांग्रा दिशो दुम्‍ब। 23 सुइ मुरुमी आ ब्राख्‍ये कि आ निश्‍शो पीरा थिप्‍तु हना, मेको नां मरिक्‍म सम्‍म ग्रांग्रा दिशो दुम्‍ब। 24 मिनु वोंइश मुर मेको नु इप्‍त नु मेको आ ग्रांग्रा दिशो लुम्‍साक्‍व हना, मेको ७ नाक्‍त सम्‍म ग्रांग्रा दिशो दुम्‍ब। मिनु मेको आ इप्‍शो ब्राख्‍ये यो ग्रांग्रा दिशो दुम्‍ब।

25 मिनु सुइ मीश मुर आ रां ब्रोल्‍शो प्रोंइशा मेको क्‍येङा शुश नाक्‍त सम्‍म हुश यिस ङा यिस बाक्‍त हना, आ मथिचा दुम्‍शो नङा खोदेंशो पा ग्रांग्रा दिशो दुम्‍ब। मेको आ मथिचा नाक्‍त खोदेंशो पा मेको ग्रांग्रा दिशो दुम्‍ब। 26 मेको आ हुश यिशो नाक्‍त, आ इप्‍शो ब्राख्‍ये आ मथिचा दुम्‍शो नङा खोदेंशो पा ग्रांग्रा दिशो दुम्‍ब। आ निश्‍शो पीरा आ मथिची नङा खोदेंशो पा ग्रांग्रा दिशो दुम्‍ब। 27 मेको थोव़क थीब ग्रांग्रा दिशो दुम्‍ब। मेकोमी आ वा मुरशा, चिक्‍सीचा माल्‍ब। मिनु मेको नां मरिक्‍म सम्‍म ग्रांग्रा दिशो दुम्‍ब।

28 मेकोमी आ हुश यिचा देक्‍म नोले ७ नाक्‍ती रिम्‍चा माल्‍ब। मिनु मेको नोले मेको ग्रांग्रा मदिशो दुम्‍ब। 29 मिनु ८ नाक्‍ती मेकोमी ढुकुर निक्‍शी कि परवा निक्‍शी चाक्‍शा, ग्रुम्‍तीक ताम्‍बु आ ओव़तीक चढ़ेब आ ङोंइती जाक्‍चा माल्‍ब। 30 मिनु चढ़ेबमी का पाप आ पर्बम नु का चोशा चढ़ेतीके चढ़ेचा माल्‍ब। मोपा चढ़ेबमी मेको आ हुश यिशो आ पर्बम परमप्रभु यावे आ ङोंइती मेको आ पर्बम चोव़खो दुम्‍तीक गेय पचा माल्‍ब।

31 मोपा गे निक्‍शीमी इस्राएल ङा मुर आन कली ग्रांग्रा दितीक रे ङोन वोतीस। मो मपाइतीसी हना, मेकोपुकीम आं बाक्‍तीक ताम्‍बु ग्रांग्रा दिशो सेल्‍नीम। मिनु मेको आन ग्रांग्रा आ पर्बम बेक्‍नीम।

32 एको ग्रांग्रा दिशो यितीक कि बिउ दोक्‍शो ग्रांग्रा दिशो दुम्‍शो वोंइश मुर आ पर्बम चोव़खो सेल्‍तीके गेय बाक्‍ब। 33 मिनु मथिचा दुम्‍शो, ग्रांग्रा यिशो वोंइश मुर कि मीश मुर नु ग्रांग्रा दिशो दुम्‍शो मीश मुर नु इप्‍ब वोंइश मुर आन कली ग्रांग्रा मदिशो सेल्‍तीक गेय एकोन बाक्‍नीम’ देंचा माल्‍नीसी” देंत।

<- लेवी 14लेवी 16 ->