1 परमप्रभु यावेमी मोसा नु हारून आस कली गन्‍ती १२:१०-१२; ब्‍यवस्‍था २४:८-९; अय्‍युब १८:१३ 2 “सुइ मुर आन रां ङा कुशुल बोरत हना, गार दुम्‍त हना, बुश दुम्‍त हना, मेको कोव़र खोदेंशो दुम्‍त हना, मेको कली चढ़ेब हारून कि आ तौ का आ बाक्‍तीके चाक्‍चा माल्‍ब। 3 मिनु मेको चढ़ेबमी आ रांम दुम्‍शो गार कोव़चा माल्‍ब। मिनु मेको आ गारम बाक्‍शो चां बुश बाक्‍त नु मेको आ गार इच्‍का लुक्‍च लशो बाक्‍त हना, मेको याक्‍सीब रोइ बाक्‍ब। मिनु चढ़ेबमी मेको कली कोव़ङा नोले ‘एको ग्रांग्रा बाक्‍ब’ देंचा माल्‍ब। 4 तन्‍न मेको कुशुल ङा बुश गार कुशुल लुक्‍च मलशो बाक्‍त हना, मिनु मेकेर वाशो चां यो बुश मदुम्‍शो बाक्‍त हना, चढ़ेबमी मेको रोइ पाइब मुर कली ७ नाक्‍त सम्‍म तिल्‍शा वोइक्‍चा माल्‍ब। 5 मिनु चढ़ेबमी ७ नाक्‍त नोले मेको गार लेंशा कोव़चा माल्‍ब। मिनु मेको कुशुल ङा गार एर ओंथ मबारशो बाक्‍त हना, चढ़ेबम मेको कली अर्को ७ नाक्‍त सम्‍म तिल्‍शा वोइक्‍चा माल्‍ब। 6 मिनु लेंशा ७ नाक्‍त नोले चढ़ेबमी कोव़ङानु, आ गार बारचा नांइसाक्‍व हना, आ कुशुलम मब्रशो बाक्‍त हना, चढ़ेबम मेको कली ग्रांग्रा मदिशो बाक्‍ब, मेको गार ला बाक्‍ब, देंचा माल्‍ब। मेको मुर आ वा मुरचा माल्‍ब। मिनु मेको चोव़खो दुम्‍ब। 7 तन्‍न चढ़ेबमी ‘चोव़खो दुम्‍त’ देंम नोले यो गार बारत हना, मेको लेंशा चढ़ेब आ बाक्‍तीक जाक्‍शा, आ गार कोंइचा माल्‍ब। 8 मिनु चढ़ेबमी लेंशा कोव़चा माल्‍ब। आ गार कुशुलम बारशा लशो बाक्‍त हना, चढ़ेबमी ‘मेको कली ग्रांग्रा दिशो बाक्‍ब’ देंचा माल्‍ब। मेको कोव़र खोदेंशो याक्‍सीब रोइ बाक्‍ब।

9 मिनु सुइ मुर कली कोव़र खोदेंशो याक्‍सीब रोइ दुम्‍शो बाक्‍त हना, चढ़ेब आन बाक्‍तीकेम चाक्‍चा माल्‍ब। 10 मिनु चढ़ेबमी मेको कली कोव़चा माल्‍ब। मिनु आ कुशुल बुश दुम्‍शा बोरशो बाक्‍त हना, नु मेको आ गार ङा चां बुश दुम्‍शा, बोरशो कुशुल ङा गारम श्‍ये तांइसाक्‍व हना, 11 मेको शुश नाक्‍ती सम्‍म बाक्‍ब कुशुल ङा रोइ कोव़र बाक्‍ब। मिनु चढ़ेबमी मेको कली ‘ग्रांग्रा दिशो बाक्‍ब’ देंचा माल्‍ब। मेकोमी मेको कली तिल्‍शा वोइक्‍चा ममाल्‍ब। मारदे हना मेको ग्रांग्रा दिशो बाक्‍ब।

12 मिनु मेको आ रोइ कुशुलम बारना बारन लशा, चढ़ेबमी कोव़ङानु, आ गार पिया रे खोइल सम्‍म बाक्‍त हना, 13 चढ़ेबमी मेको कली रिम्‍शो पा कोव़चा माल्‍ब। मिनु मेको कुशुल ङा रोइम आ रां नेल्‍ल कली सुम्‍शो बाक्‍त हना, चढ़ेबमी मेको कली ‘ग्रांग्रा मदिशो बाक्‍ब’ देंचा माल्‍ब। मारदे हना मेको आ रां नेल्‍ल बुश दुम्‍तीके, मेको मुर ग्रांग्रा मदिशो बाक्‍ब। 14 तन्‍न मेको मुर आ रांम श्‍ये तांइसाक्‍व हना, मेको ग्रांग्रा दिशो बाक्‍ब। 15 मिनु चढ़ेबमी मेको तांइसीशो श्‍ये कोव़शा, मेको कली ‘ग्रांग्रा दिशो बाक्‍ब’ देंचा माल्‍ब। मेको तांइसीशो श्‍ये ग्रांग्रा बाक्‍ब। मारदे हना मेको कोव़र बाक्‍ब। 16 तन्‍न मेको तांइसीशो श्‍ये लेंशा बुश दुम्‍त हना, मेको मुर लेंशा चढ़ेब आ बाक्‍तीक लचा माल्‍ब। 17 मिनु मेको गार बुश दुम्‍शो बाक्‍त हना, मेको चढ़ेबमी ग्रांग्रा मदिशो बाक्‍ब देंचा माल्‍ब। मिनु मेको मुर चोव़खो बाक्‍ब।

18 सुइ मुर आ रांमी कान ग्रूशा, सात हना, 19 मिनु मेको कान ग्रूशा साशो गारम बुश दुम्‍शा, बोरत हना, कि लल दुम्‍शा बुश पा बोरत हना, मेको मुरुमी मेको आ गार चढ़ेब कली कोंइचा माल्‍ब। 20 मिनु चढ़ेबमी रिम्‍शो पा कोव़ङानु, मेको गार लुक्‍च लशो बाक्‍त नु चां यो बुश दुम्‍शो बाक्‍त हना, मेको कली ‘ग्रांग्रा दिशो बाक्‍ब’ देंचा माल्‍ब। मेको कोव़र खोदेंशो रोइ कान रे ग्रूशो बाक्‍ब। 21 तन्‍न चढ़ेबमी रिम्‍शो पा कोव़ङानु, मेकेर बुश चां मग्रूशो बाक्‍त नु मेको कुशुल क्‍येङा लुक्‍च मलशो बाक्‍त हना, तन्‍न सोव़ना सोव़न, जाम्‍ना जाम्‍न लशो बाक्‍त हना, चढ़ेबमी मेको कली ७ नाक्‍त सम्‍म तिल्‍शा वोइक्‍चा माल्‍ब। 22 मेको गार कुशुलम बारना बारन लत हना, चढ़ेबमी मेको कली ‘ग्रांग्रा दिशो बाक्‍ब’ देंचा माल्‍ब। मारदे हना मेको याक्‍सीब रोइ बाक्‍ब। 23 तन्‍न मेको गार एर ओंथ मबारथु, मेक उइ ला बाक्‍त हना, मेको कान आ खत बाक्‍ब। चढ़ेबमी मेको कली ‘ग्रांग्रा मदिशो बाक्‍ब’ देंचा माल्‍ब।

24 सुइ मुर आन रांमी दुप्‍शा गार दुम्‍त नु मेको दुप्‍शो गारम नक श्‍ये ग्रूशा, लल दुम्‍त हना यो, बुश दुम्‍त हना यो, 25 चढ़ेबमी मेको गार रिम्‍शो पा कोव़चा माल्‍ब। मिनु मेको गार ङा चां बुश दुम्‍शा, कुशुल क्‍येङा लुक्‍च लशो बाक्‍त हना, मेको याक्‍सीब रोइ बाक्‍ब। मेको दुप्‍शो गार रे ग्रूशो बाक्‍ब। मिनु चढ़ेबमी मेको कली ‘ग्रांग्रा दिशो बाक्‍ब’ देंचा माल्‍ब। मेको कुशुल ङा याक्‍सीब रोइ बाक्‍ब। 26 तन्‍न चढ़ेबमी रिम्‍शो पा कोव़ङानु, मेको गार ङा चां बुश मबाक्‍थु नु कुशुल क्‍येङा लुक्‍च मलथु, सोव़ना सोव़न बाक्‍त हना, चढ़ेबमी मेको मुर कली ७ नाक्‍त सम्‍म तिल्‍शा वोइक्‍चा माल्‍ब। 27 मिनु चढ़ेबमी मेको कली ७ नाक्‍त नोले रिम्‍शो पा कोव़चा माल्‍ब। मिनु मेको कुशुलम एर ओंथ बारशो बाक्‍त हना, चढ़ेबमी मेको कली ‘ग्रांग्रा दिशो बाक्‍ब’ देंचा माल्‍ब। मेको याक्‍सीब कुशुल ङा रोइ बाक्‍ब। 28 तन्‍न मेको गार एर ओंथ मबारथु, सोव़ना सोव़न लशो बाक्‍त हना, मेको दुप्‍शो रे होम्‍शो ला बाक्‍ब। मिनु चढ़ेबमी मेको कली ‘ग्रांग्रा मदिशो बाक्‍ब’ देंचा माल्‍ब। मारदे हना, मेको दुप्‍शो गार आ खत ला बाक्‍ब।

29 सुइ मीश मुर, वोंइश मुर आन पियाम, गाल शोक्रेम मारेइ गार का बाक्‍त हना, 30 चढ़ेबमी मेको गार रिम्‍शो पा कोव़चा माल्‍ब। मिनु मेको कुशुल क्‍येङा लुक्‍च लशो बाक्‍त हना, नु मेको गार ङा चां हाव जिशो नु आइक्‍च बाक्‍त हना, चढ़ेबमी मेको कली ‘ग्रांग्रा दिशो बाक्‍ब’ देंचा माल्‍ब। मेको रक सुइब आ पिया ङा नु गाल शोक्रे ङा याक्‍सीब रोइ बाक्‍ब। 31 मिनु चढ़ेबमी मेको रक सुइब रोइ रिम्‍शो पा कोव़ङानु, मेको कुशुल क्‍येङा लुक्‍च मलशो नु मेकेर क्‍येर चां यो मबाक्‍तेक्‍म हना, चढ़ेबम मेको कली ७ नाक्‍त सम्‍म तिल्‍शा वोइक्‍चा माल्‍ब। 32 मिनु ७ नाक्‍त नोले चढ़ेबमी मेको कली रिम्‍शो पा कोव़चा माल्‍ब। मिनु मेको रक सुइब रोइ मबारशो बाक्‍त हना, मेक ङा चां हाव मजिशो बाक्‍त नु गार यो कुशुल क्‍येङा लुक्‍च मलशो बाक्‍त हना, 33 मेकोमी गार प्रोंइशा आ चां प्रेक्‍चा माल्‍ब। मिनु चढ़ेबम मेको रोइ पाइब कली अर्को ७ नाक्‍त सम्‍म तिल्‍शा वोइक्‍चा माल्‍ब। 34 मिनु ७ नाक्‍त नोले चढ़ेबमी मेको रक सुइब गार रिम्‍शो पा कोव़चा माल्‍ब। मिनु मेको मबारथु, कुशुल क्‍येङा लुक्‍च मलशो बाक्‍त हना, चढ़ेबमी मेको कली ‘ग्रांग्रा मदिशो बाक्‍ब’ देंचा माल्‍ब। मिनु मेको मुर आ वा मुरशा, चोव़खो दुम्‍ल। 35 तन्‍न मेको चोव़खो दुम नोले यो मेको रक सुइब रोइ बारशा लत हना, 36 चढ़ेबमी मेको गार रिम्‍शो पा कोव़चा माल्‍ब। मेको कुशुलम बारशा लशो बाक्‍त हना, चढ़ेबमी मेकेर ङा चां हाव बाक्‍म कों मबाक्‍म, दे कोव़चा ममाल्‍ब। मेको मुर ग्रांग्रा दिशो बाक्‍ब। 37 तन्‍न चढ़ेबमी मेको रक सुइब रोइ रिम्‍शो पा कोव़ङानु मेकेर क्‍येर चां वाशो बाक्‍त हना, मेको साशो बाक्‍ब। मेको ग्रांग्रा मदिशो बाक्‍ब। मिनु चढ़ेबम मेको कली ‘ग्रांग्रा मदिशो बाक्‍ब’ देंचा माल्‍ब।

38 सुइ मीश मुर, वोंइश मुर आन रांम बुश गारपुकी बाक्‍तेक्‍म हना, 39 चढ़ेबमी मेको रिम्‍शो पा कोव़चा माल्‍ब। मिनु मेको आन रां ङा गारपुकी बुश बाक्‍तेक्‍म हना, मेको कुशुल ङा रोइ ला बाक्‍ब। मेको कुशुल रे ला ग्रूशो बाक्‍ब। मेको मुर ग्रांग्रा मदिशो बाक्‍ब।

40 सुइ मुर आन पिया ङा चां दुल्‍शो बाक्‍त हना, मेको ग्रांग्रा मदिशो बाक्‍नीम। 41 मेको आ चां कुप्‍फी रे दुल्‍शो बाक्‍त हना, मेको ग्रांग्रा मदिशो बाक्‍ब। 42 तन्‍न मेको आन कुप्‍फीमी लल बुश गार ग्रूत हना, मेको कुप्‍फीम ग्रूशो याक्‍सीब रोइ बाक्‍ब 43 मिनु चढ़ेबमी मेको कली रिम्‍शो पा कोव़ङानु, आ कुप्‍फीम होम्‍शो गार लल बुश नु कोव़र खोदेंशो तांइसाक्‍व हना, 44 मेको मुर कोव़र पशो नु ग्रांग्रा दिशो बाक्‍ब। मिनु चढ़ेबमी मेको कली ‘ग्रांग्रा दिशो बाक्‍ब’ देंचा माल्‍ब। मेको रोइ आ पियाम बाक्‍ब।

45 कोव़र प‍शो मुरुम गाक्‍शो वा फेक्‍शा, आ पियाम मारेइ गुप्‍चा मदुम्‍ब। मेकोमी आ गाल शोक्रे कली सुम्‍शा ‘ग्रांग्रा दिशो, ग्रांग्रा दिशो’ दे ग्रीचा माल्‍ब। 46 मेको आ रोइ गेना सम्‍म लीबा, मेना सम्‍म मेको ग्रांग्रा दिशो दुम्‍ब। मेको आ कांइचीक बाक्‍चा माल्‍ब। मिनु मेको मुर आन बाक्‍तीक क्‍येङा ङोन बाक्‍चा माल्‍ब। गन्‍ती ५:२-३; २राजा १५:५

47 मिनु वाम बुंखी ङाइक्‍ताक्‍व हना, ऊन के वासी बाक्‍त हना यो, सुती के वासी बाक्‍त हना यो, 48 फेक्‍तीक नेल्‍ल, कुशुल के सेल्‍शो मारेइ मारेइमी 49 बुंखी ङाइश्‍शा गिगी लल लुम्‍सीशो बाक्‍त हना, वासी नेल्‍ल नु मारेइ मारेइ चढ़ेब कली कोंइचा माल्‍ब। 50 मिनु चढ़ेबमी मेको रिम्‍शो पा कोव़चा माल्‍ब। मिनु मेको बुंखी ङाइश्‍शो थोव़क आन कली ७ नाक्‍त सम्‍म तिल्‍शा वोइक्‍चा माल्‍ब। 51 मिनु चढ़ेबमी ७ नाक्‍त नोले लेंशा रिम्‍शो पा कोव़चा माल्‍ब। मिनु मेको वासी, कुशुल के सेल्‍शो मारेइ थोव़कीम बुंखी बारशा लशो बाक्‍त हना, मेको बिग्रेब बुंखी ङाइश्‍शो बाक्‍ब। मेको थोव़क ग्रांग्रा दिशो बाक्‍ब। 52 मिनु मेकोमी बुंखी ङाइश्‍शो वासी कि कुशुल के सेल्‍शो मारेइ थोव़क चोचा माल्‍ब। मारदे हना मेको राक्‍ब बुंखी बाक्‍ब। मेको मीम चोचा माल्‍ब।

53 तन्‍न चढ़ेबमी रिम्‍शो पा कोव़ङानु, मेको वासी, कि कुशुल के सेल्‍शो मारेइ थोव़कम मेको बुंखी मबारशो बाक्‍त हना, 54 मिनु चढ़ेबमी मेको मुर कली ‘मेको बुंखी ङाइश्‍शो थोव़क मुरचा माल्‍ब’ दे अरेचा माल्‍ब। मिनु मेकोमी चिनु ७ नाक्‍त सम्‍म मेको वासी कली तिल्‍शा वोइक्‍चा माल्‍ब। 55 मेको मुरशो नोले चढ़ेबम मेको कली रिम्‍शो पा कोव़चा माल्‍ब। मिनु मेको बुंखी आ लुम्‍सीशो रङ मफांइसीशो बाक्‍त हना यो, मेको ग्रांग्रा दिशो बाक्‍ब। मेको बुंखी आ तार गे बाक्‍त हना यो, आगा गे बाक्‍त हना यो, मेको कली मीम चोचा माल्‍ब। 56 तन्‍न चढ़ेबमी मेको मुरशो नोले कोव़ङानु, बुंखी जाम्‍ना जाम्‍न लशो बाक्‍त हना, मेको वासी कि मारेइ मारेइ कुशुल के सेल्‍शो मेको लुम्‍सीशो ला खाक्‍शा ताइक्‍चा माल्‍ब। 57 तन्‍न मेको बुंखी, वासी, कुशुल के सेल्‍शो मारेइ मारेइमी लेंशा तांइसाक्‍व हना, मेको बारना बारन लशो बाक्‍ब। मेको बुंखी ङाइश्‍शो थोव़क मीम चोचा माल्‍ब। 58 मिनु मेको वासी, कुशुल के सेल्‍शो मारेइ मारेइ थोव़क मुरशोनु, मेको रे बुंखी लत हना, मेको लेंशा मुरचा माल्‍ब। मेको ग्रांग्रा मदिशो बाक्‍ब।

59 ऊन के सेल्‍शो वासीम, सुती के वासी नु कुशुल के सेल्‍शो मारेइ थोव़कम बुंखी ङाइश्‍शो आ पर्बम ग्रांग्रा दिशो नु मदिशो आन पर्बम पचा माल्‍शो गेय एकोन बाक्‍नीम, दे शेंचा” दे मोसा नु हारून आस कली देंत।

<- लेवी 12लेवी 14 ->